ޙައްޖުގެ މަތިވެރި އަޅުކަމަށް ފަހު ޙައްޖާޖީން އެނބުރި ރާއްޖެ އަންނަން ފަށާފައިވާއިރު، އެ މީހުން ބަލިވެގެން ޑޮކްޓަރަށް ދެއްކޭނޭ އިންތިޒާމު ހޮސްޕިޓަލްތަކުގެ ޖެނެރަލް އޯޕީޑީ މެދުވެރިކޮށް ހަމަޖައްސާފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިއަދު ބުނެފިއެވެ.
އެޗްޕީއޭއިން ހާމަކުރި ގޮތުގައި މި ފަހަރު ޙައްޖުވެރިންނަށް ޚާއްސަކޮށް ވަކި ފްލޫ ކްލިނިކްތަކެއް ގާއިމު ނުކުރި ނަމަވެސް، ހުރިހާ ހޮސްޕިޓަލެއްގެ އޯޕީޑީން ފަސޭހަކަމާ އެކު ފަރުވާ ލިބޭނެ އިންތިޒާމުތައް ވަނީ ފަހިކޮށްދީފައެވެ.
ޙައްޖުވެރިން ރާއްޖެ އެނބުރި އައުމަށް ފަހު ބަލިތަކުން ރައްކާތެރިވުމަށް އެޗްޕީއޭއިން ވަނީ އިލްތިމާސްކޮށްފައެވެ. އެގޮތުން، އަރިދަފުސް ރޯގާ ޖެހިއްޖެނަމަ ކިނބިހި އަޅާއިރު އަނގަމައްޗާއި ނޭފަތް ނިވާކުރުމަށާއި، ޓިޝޫ ފަދަ ތަކެތި ބޭނުންކުރުމަށް ފަހު ރައްކާތެރި ގޮތުގައި ނައްތާލުމަށް ވަނީ އިރުޝާދު ދީފައެވެ.
މީގެ އިތުރުން، ގިނަގިނައިން ސައިބޯނި ލައިގެން އަތް ދޮވުމާއި، ބަލީގެ އަލާމާތްތައް ހުރިނަމަ މާސްކް އެޅުމަކީ އެދެވިގެންވާ ކަމެއް ކަމަށް އެޗްޕީއޭއިން ފާހަގަކުރެއެވެ.
"އަޅުގަނޑުމެން މިދަނީ އެ ކަމާ ގުޅޭ ހޭލުންގެރިކަން އިތުރުކުރުމުގެ މައުލޫމާތު ޓީވީ އަދި ރޭޑިއޯ މެދުވެރިކޮށް ފޯރުކޮށްދެމުން. ޙައްޖަށް ގޮސް އެނބުރި އަންނަ ފަރާތްތަކުން ރޯގާގެ އަލާމަތެއް ހުރި ނަމަ ހޮސްޕިޓަލްތަކުގެ ޖެނެރަލް އޯޕީޑީން ޑޮކްޓަރަށް ދެއްކޭނެ އިންތިޒާމު ވަނީ ހަމަޖެހިފައި،" އެޗްޕީއޭގެ މީޑިއާ އޮފިޝަލް "ސަން"އަށް ވިދާޅުވިއެވެ.
އެޗްޕީއޭއިން ބުނި ގޮތުގައި ޙައްޖުން ނުވަތަ ޢުމްރާއިން އެނބުރި އަންނަތާ 14 ދުވަސް ތެރޭގައި ހުން އައުން، ކެއްސުން، ނޭވާލާން އުނދަގޫވުން ނުވަތަ މޭގައި ރިއްސުން ފަދަ އަލާމާތެއް ފެނިއްޖެނަމަ ލަސްނުކޮށް ޑޮކްޓަރެއްގެ މަޝްވަރާ ހޯދަންވާނެއެވެ. ޑޮކްޓަރަށް ދައްކާއިރު އެއީ ޙައްޖުން ނުވަތަ ޢުމްރާއިން އެނބުރި އައި މީހެއްކަމުގެ މައުލޫމާތު ދިނުމަކީ ވަރަށް މުހިންމު ކަމެކެވެ. އަދި، ރޯގާ ޖެހި ކެއްސާނަމަ މީހުން އެއްވެ އުޅޭ ތަންތަނަށް ނުދިއުމަށާއި، ކުޑަކުދިންނާއި އުމުރުން ދުވަސްވީ މީހުންނާ ބައްދަލުކުރުމުގައި ސަމާލުވުމަށް ވަނީ އެދިފައެވެ.
ހުން އަދި އަރިދަފުސް ރޯގާ ޖެހިއްޖެނަމަ ގޭގައި ދެވިދާނެ ފަރުވާތަކުގެ ތެރޭގައި ގިނަގިނައިން ދިޔާތަކެތި ބޭނުންކުރުމާއި، ރަނގަޅަށް އަރާމުކުރުން ހިމެނެއެވެ. ހުން ގަދަނަމަ އާދައިގެ ތާފަނާ ފެނުން ގައިގައި ފެންހޭކުމަށް ވެސް ވަނީ އިރުޝާދު ދީފައެވެ. އަދި، ޕެރެސެޓްމޯލް ފިޔަވާ އެހެން އެއްވެސް ބޭހެއް ޑޮކްޓަރެއްގެ މަޝްވަރާއާ ނުލައި ބޭނުން ނުކުރުމަށް އެޗްޕީއޭއިން ވަނީ ހަނދާންކޮށްދީފައެވެ.
އެޗްޕީއޭއިން ބުނީ ޙައްޖަށް ދިއުމަށް ފަހު އެނބުރި އަންނަ ފަރާތްތަކުން ރޯގާގެ އަލާމެއް ހުރި ނަމަ އެފަދަ ބަލިތަކުން ރައްކާތެރިވުމާ ގުޅޭ މައުލޫމާތު ފެތުރުމަށް ޓީވީ އަދި ރޭޑިއޯ މެދުވެރިކޮށް ހޭލުންތެރިކުރުވުމުގެ މަސައްކަތްތައް ވެސް ކުރަމުން އަންނަ ކަމަށެވެ.
ޙައްޖުވެރިން އެނބުރި އަންނައިރު ރޯގާގެ އަލާމާތެއް ހުރި ނަމަ، ހޮސްޕިޓަލްތަކުން ފަސޭހަކަމާ އެކު ޑޮކްޓަރަށް ދެއްކޭނެ އިންތިޒާމު މިހާރު ވަނީ ހަމަޖައްސާފައެވެ.