ކްރިމިނަލް ކޯޓުގެ ހުރުމަތް ކެނޑި މައްސަލައެއްގައި މީހަކު ނުވަ މަސް ދުވަހަށް ޖަލަށްލާން އެ ކޯޓުން ހުކުމްކޮށްފިއެވެ.
ކޯޓު ހުރުމަތް ކެނޑި މައްސަލައެއްގައި ނުވަ މަސް ދުވަހަށް ޖަލަށްލާން ހުކުމް ކުރީ، ޢަލީ އަދުހަމް، އއ.ތޮއްޑޫ / ރަތްވިލާގެ އެވެ. އޭނާގެ މައްޗަށް ނުވަ މަސް ދުވަހުގެ ހުކުމެއް އިއްވީ، ޝަރުއަތުގެ މަޖިލީހުގައި ޝަރިއަތަށް ގޮންޖަހައި ބޭއަދަބީކޮށް ވާހަކަ ދައްކާތީ އެކަން ނުކުރުމަށް ތަކުރާރުކޮށް ނަސޭހަތްތެރިވުމުންވެސް އެކަން ގަބޫލު ނުކުރުމުންނެވެ.
ކޯޓުގެ ހުރުމަތް ކެނޑުމަކީ އަދުލު އިންސާފު ގާއިމުކުރުމަށް ހުރަސްއެޅޭ ފަދަ އަމަލެއް ކުރުން ނުވަތަ ކޯޓުގެ ގަދަރާއި ކަރާމާތަށް އުނިކަން އަންނަ ފަދަ ކަމެއް ކުރުމެވެ. ކޯޓުގެ ހުރުމަތް ކެނޑޭނެ ހާލަތްތަކުގެ ތެރޭގައި ކޯޓުގެ މަޖިލީހެއްގެ ތަރުތީބު ގެއްލުވާލުން ނުވަތަ ހަޅޭއްލެވުން، ފަނޑިޔާރަކަށް ނުވަތަ ކޯޓުގެ މުވައްޒަފަކަށް ބަދުބަސް ބުނުން ނުވަތަ ބިރުދެއްކުން އަދި ކޯޓުން ނެރޭ އަމުރަކަށް ގަސްދުގައި ނުކިޔަމަންތެރިވުމާއި ޝަރީއަތް ކުރިއަށްދާ ގޮތާ މެދު ދޮގު ހަދައި، ކޯޓުގެ އިތުބާރު ގެއްލޭ ފަދަ މައުލޫމާތު ފެތުރުން ފަދަ ކަންކަން ހިމެނެއެވެ.
ކޯޓުތަކުގެ ގާނޫނުގެ ދަށުން، ކޯޓުގެ ހުރުމަތް ކަނޑާ ފަރާތްތަކާ މެދު ވަގުތުން ފިޔަވަޅު އެޅުމުގެ ބާރު ފަނޑިޔާރަށް ލިބިގެންވެއެވެ. މިއީ އިތުރު ދައުވާއަކާ ނުލައި، އެ ވަގުތު ކޯޓުގެ މަޖިލީހުގައި ފަނޑިޔާރަށް ނިންމޭނެ ނިންމުމެކެވެ.
ކޯޓު ހުރުމަތް ކަނޑައިގެން ނުވަ މަސް ދުވަހުގެ ހުކުމެއް މިއަދު އައިއިރު، އޭނާ ކޯޓަށް މިއަދު ހާޒިރުކޮށްފައިވަނީ ޖިނާއީ އެހެން މައްސަލަތަކެއްގައެވެ. އެއީ، ދައުލަތުން އަދުހަމްގެ މައްޗަށް އުފުލާފައިވާ އެނގިހުރެ ހުއްދަނޫން ތަނަކަށް ވަނުމުގެ ކުށުގެ ދައުވާއަކާއި އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާގެ މައްސަލައަށެވެ.
މި ދެ މައްސަލައިގެވެސް އޭނާގެ މައްޗަށް މިއަދު ހުކުމް އިއްވާފައިވެއެވެ.
ދެ މައްސަލައަކީ، އަމީނިއްޔާ ސްކޫލު އިމާރާތް ކުރަމުން ދިޔައިރު، ހުއްދަނެތި އެ ތަނަށް ވަނުމުގެ މައްސަލައަކާއި އެ ތަނުން 18 ބިޑި ވަގަށް ނެގި މައްސަލައެވެ.