އަބުރަށް ގެއްލުންދޭ ކޮންޓެންޓް އިންޓަނެޓުގައި ފަތުރާ ކަމަށް ބުނެ ނާގާ ކޯޓަށް

ތެލުގޫ އެކްޓަރު ނާގާ ޗައިތަންޔާ--ފޮޓޯ/އެންޑީޓީވީ

ދެކުނު އިންޑިއާގެ އެކްޓަރު ނާގާ ޗައިތަންޔާގެ އަބުރަށް ގެއްލުންދޭ ފަދަ ކޮންޓެންޓްތައް އިންޓަނެޓު މެދުވެރިކޮށް ފަތުރަމުންދާ ކަމަށް ބުނެ ދިއްލީ ހައިކޯޓަށް މައްސަލަ ހުށަހަޅައިފިއެވެ.

މަޝްހޫރު ތެލުގޫ އެކްޓަރު ދިއްލީ ހައިކޯޓަށް މި މައްސަލަ ހުށަހެޅީ އެކްޓަރުގެ ވަކިވަކި ސިފަތަކާއި އަމިއްލަ ވަންތަކަން ނަހަމަ ގޮތުގައި ބަޔަކު މީހުން ބޭނުންކުރާ ކަމަށް ބުނެ "ޕާސަނަލިޓީ ރައިޓްސް" ހިމާޔަތްކޮށްދިނުމުގެ އަމުރަކަށް އެދިއެވެ.

އިންޑިއާގެ ނޫޙެއް ކަމަށްވާ އެންޑީޓީވީގެ ރިޕޯޓެއްގައި ބުނެފައިވާ ގޮތުގައި، ނާގާގެ ނަމާއި، ފޮޓޯ އާއި، ސިފަތައް ޑިޖިޓަލް މަންސަތަކުގައި ހުއްދަ ނެތި ބޭނުންކުރަމުންދާއިރު، އޭގެތެރޭގައި ކުރީގެ އަނބިމީހާ، ބަތަލާ ސަމަންތާ ރޫތު ޕްރަބޫއަށް ބޭވަފާތެރިވި ކަމަށް ބުނެ ތިންވަނަ ފަރާތްތަކުން ކުރާ ދޮގު ތުހުމަތުތަކާއި، އޭއައި ބޭނުންކޮށްގެން އުފައްދާފައިވާ ވީޑިއޯތަކާއި، ނާގާގެ ހުއްދަނެތި އޭނާގެ ނަމުގައި ވިއްކާ މުދަލާއި، އަދި ބަދުއަހުލާގީ ކޮންޓެންޓްތައް ހިމެނެއެވެ.

ނާގާ އަދި ކުރީގެ އަނބިމީހާ ބަތަލާ، ސަމަންތާ ރޫތު ޕްރަބޫ--ފޮޓޯ/އެންޑީޓީވީ

ނާގާ ކޯޓުގައި އެދުނީ މިފަދަ ކަންކަމުން އެކްޓަރުގެ ޙައްޤުތައް ހިމާޔަތްކޮށްދިނުމަށެވެ.

މި މައްސަލައާ ގުޅިގެން މިދިޔަ ހުކުރު ދުވަހު ދިއްލީ ހައިކޯޓުގައި ބޭއްވި އަޑުއެހުމުގައި ނާގާގެ ވަކީލު ވިދާޅުވީ، ބައެއް ކޮންޓެންޓްތަކުގައި ނާގާ އަކީ ސަމަންތާއަށް ބޭވަފާތެރިވެ، ބަތަލާގެ ކެރިއަރު ހަލާކުކޮށްލި މީހެއްގެ ގޮތުގައި ސިފަކޮށްފައިވާ ކަމަށެވެ.

ވަކީލު އިތުރަށް ފާހަގަކުރެއްވި ގޮތުގައި ނާގަ އަކީ ތެލުގޫ ފިލްމީ ދާއިރާގައި 10 އަހަރަށް ވުރެ ގިނަ ދުވަހު މަސައްކަތްކޮށްފައިވާ، ބެލުންތެރިންގެ އިހުތިރާމާއި ލޯބި ހޯދާފައިވާ އެކްޓަރެކެވެ. އެހެންކަމުން ހުއްދަނެތި މިފަދަ ކޮންޓެންޓްތައް އުފައްދައި ފެތުރުމުގެ ސަބަބުން ނާގާގެ އަބުރަށާއި، އަމިއްލަ ދިރިއުޅުމަށް ނޭދެވޭ އަސަރުކޮށްފައިވާ ކަމަށް ވަކީލު ވަނީ ވިދާޅުވެފައެވެ.

މި މައްސަލަ ބެއްލެވި ޖަސްޓިސް ސިންގް ފާހަގަކުރެއްވި ގޮތުގައި، އާންމު ރައްޔިތުންނަށް ވުރެ ބޮޑަށް މަޝްހޫރު ފަރާތްތަކަށް ފާޑުކިޔުން އަމާޒުވި ނަމަވެސް، އެކަމުގައި ވެސް ހައްދުތަކެއް އޮންނަންވާނެއެވެ.

ނާގާ މިހާރުގެ އަނބިމީހާ ސޯބިތާ ދޫލިޕާލާއާ އެކު--ފޮޓޯ/އެންޑީޓީވީ

އަޑުއެހުން ނިންމާލަމުން ކޯޓުން ވަނީ ނާގަ ޗައިތަންޔާގެ ޕާސަނަލިޓީ ރައިޓްސް ހިމާޔަތްކުރުމަށް ވަގުތީ އަމުރެއް ނެރެދޭނެ ކަމަށް ބުނެފައެވެ. މި މައްސަލައިގެ ދެން އޮންނަ އަޑުއެހުން ތާވަލުކޮށްފައި ވަނީ މި އަހަރުގެ ސެޕްޓެމްބަރު މަހުގެ 30 ވަނަ ދުވަހަށެވެ.

ސަމަންތާއާ ވަރިވި ފަހުން، ނާގާ ވަނީ 2024 ވަނަ އަހަރު ބަތަލާ ސޯބިތާ ދޫލިޕާލާއާ ކައިވެނިކޮށްފައެވެ. އޭގެ ފަހުން ސަމަންތާ ވަނީ މިދިޔަ އަހަރުގެ ޑިސެމްބަރު މަހު ފިލްމު އުފައްދާ ރާޖް ނިދިމޯރޫ އާ ކައިވެނިކޮށްފައެވެ.

ދެކުނު އިންޑިއާގެ ތެލުގޫ ފިލްމީ ދާއިރާގެ މަޝްހޫރު ފަންނާނު ނާގާ ޗައިތަންޔާގެ އަބުރަށް އުނިކަން އަންނަ ފަދަ ތަފާތު ކޮންޓެންޓް އިންޓަނެޓުގައި ފަތުރަމުންދާތީ، އޭނާގެ ޕާސަނަލިޓީ ރައިޓްސް ހިމާޔަތްކޮށްދިނުމުގެ އަމުރަކަށް އެދި ދިއްލީ ހައިކޯޓަށް ވަނީ މައްސަލަ ހުށަހަޅާފައެވެ. އެންޑީޓީވީގެ ރިޕޯޓުތަކާ ހަވާލާދީ ހާމަކޮށްފައިވާ ގޮތުގައި، ނާގާގެ ނަމާއި ސިފަތައް ބޭނުންކޮށްގެން ހުއްދަނެތި އޭއައި ވީޑިއޯތައް އުފެއްދުމާއި، ބަދުއަހުލާގީ މަންޒަރުތައް ފެތުރުން ފަދަ ކަންކަން ދަނީ ކުރަމުންނެވެ. މީގެ އިތުރުން ކުރީގެ އަނބިމީހާ ސަމަންތާ ރޫތު ޕްރަބޫއަށް ބޭވަފާތެރިވި ކަމުގެ ދޮގު ތުހުމަތުތައް ފެތުރުމުގެ ސަބަބުން ނާގާގެ ޒާތީ ދިރިއުޅުމަށާއި މަސައްކަތަށް ނޭދެވޭ އަސަރުކުރަމުންދާ ކަމަށް އޭނާގެ ވަކީލު ފާހަގަކުރެއްވިއެވެ. މި މައްސަލައިގެ އަޑުއެހުމަށްފަހު، ދިއްލީ ހައިކޯޓުގެ ޖަސްޓިސް ސިންގް ވަނީ މަޝްހޫރު ފަރާތްތަކަށް ފާޑުކިޔުން އަމާޒުވި ނަމަވެސް އެކަމުގައި ހައްދުތަކެއް ހުންނަންވާނެކަން ފާހަގަކުރައްވާފައެވެ. އަދި ނާގާގެ ޙައްޤުތައް ހިމާޔަތްކުރުމަށް ކޯޓުން ވަގުތީ އަމުރެއް ނެރެދޭނެކަން ހާމަކޮށް، މައްސަލައިގެ ދެން އޮންނަ އަޑުއެހުން މި އަހަރުގެ ސެޕްޓެމްބަރު މަހުގެ 30 ވަނަ ދުވަހަށް ވަނީ ތާވަލުކޮށްފައެވެ.

  • ނާގާ ޗައިތަންޔާގެ އަބުރަށް ގެއްލުންދޭ ކޮންޓެންޓްތައް ހުއްޓުވުމަށް ދިއްލީ ހައިކޯޓަށް މައްސަލަ ހުށަހެޅުން.
  • ހުއްދަނެތި ނާގާގެ ނަމާއި ފޮޓޯ ބޭނުންކޮށްގެން އޭއައި ވީޑިއޯތަކާއި ބަދުއަހުލާގީ ކޮންޓެންޓް ޑިޖިޓަލް މަންސަތަކުގައި ފެތުރުން.
  • ކުރީގެ އަނބިމީހާ ސަމަންތާއަށް ބޭވަފާތެރިވި ކަމުގެ ދޮގު ތުހުމަތުތަކުން ނާގާގެ ކެރިއަރަށް ގެއްލުންވަމުންދާކަން ވަކީލު ފާހަގަކުރެއްވުން.
  • ނާގާގެ ޕާސަނަލިޓީ ރައިޓްސް ހިމާޔަތްކުރުމަށް ކޯޓުން ވަގުތީ އަމުރެއް ނެރެދޭން ނިންމުން.
  • ފަންނާނުންގެ ޕާސަނަލިޓީ ރައިޓްސް ހިމާޔަތްކުރުމުގެ މުހިންމުކަން.
  • އޭއައި އަދި ޑިޖިޓަލް ވަސީލަތްތައް ނަހަމަ ގޮތުގައި ބޭނުންކުރުމާ ދެކޮޅަށް ޤާނޫނީ ފިޔަވަޅު އެޅުން.
  • އަބުރާ ބެހުމުގެ މައްސަލަތަކުގައި ކޯޓުތަކުން ވަގުތީ އަމުރު ނެރެދީ ރައްކާތެރިކަން ކަށަވަރުކޮށްދިނުން.
comment ކޮމެންޓް