ގޫގުލްގެ އާޓިފިޝަލް އިންޓެލިޖެންސް (އޭއައި) ޗެޓްބޮޓް، ޖެމިނައި އަކީ ތަފާތު އެކި އެޕްލިކޭޝަންތަކާއި ޕްލެޓްފޯމްތަކުގެ މަސައްކަތްތައް އެއްތަނަކުން ކުރެވޭ ސުޕަ އެޕަކަށް ހެދުމަށްޓަކައި އެޑޯބީ އަދި ކެންވާ އާއެކު އާ ކަނެކްޓަރުތަކެއް ތައާރަފުކޮށްފިއެވެ.
މި ބަދަލާއެކު، ޖެމިނައިގެ އެކި ޓިއާތައް ބޭނުންކުރާ ފަރާތްތަކަށް އެހެން އެޕްތަކަށް ނުވަދެ ސީދާ ޖެމިނައިގެ ތެރެއިން މި ދެ ޕްލެޓްފޯމްގެ ފީޗާސްތައް ބޭނުންކުރުމުގެ ފުރުސަތު ލިބިގެންދާނެއެވެ.
އެޑޯބީން ނެރުނު ބްލޮގް ޕޯސްޓެއްގައި ހާމަކޮށްފައިވާ ގޮތުގައި ކުރިއަށް އޮތް ހަފުތާތަކުގެ ތެރޭގައި ޖެމިނައިއަށް އެޑޯބީގެ ކަނެކްޓަރު ލިބެން ފަށާނެއެވެ. މީގެ ސަބަބުން ކްރިއޭޓިވް ކްލައުޑް ބޭނުންކުރާ ފަރާތްތަކަށް ފޮޓޯޝޮޕް، އިލަސްޓްރޭޓާ، ޕްރިމިއާ އަދި އެކްސްޕްރެސް ފަދަ ޓޫލްތަކުގެ މަސައްކަތްތައް ސީދާ ޖެމިނައި މެދުވެރިކޮށް ކުރިއަށް ގެންދެވޭނެއެވެ. އެޑޯބީގެ އަމާޒަކީ އެކުންފުނީގެ ފަންނީ ކްރިއޭޓިވް ޓޫލްތައް، މަސައްކަތްކުރާ ކޮންމެ މާހައުލަކުންވެސް ފަސޭހަކަމާއެކު ލިބޭނެ ގޮތް ހެދުމެވެ.
ކެންވާގެ ކަނެކްޓަރު މިހާރު ވަނީ ބައެއް މާކެޓްތަކަށް ދޫކޮށްލަން ފަށާފައެވެ. ޖެމިނައިގެ ތެރޭގައި "@Canva" ޖެހުމަށްފަހު ބޭނުންވާ ޚިޔާލެއް ނުވަތަ ކޮންސެޕްޓެއް ލިޔުމުން ކެންވާގެ އެޖެންޓް މަސައްކަތް ފަށާނެއެވެ. މިގޮތަށް އުފައްދާ ޑިޒައިންތަކަކީ ކެންވާގެ ބްރޭންޑް ކިޓާ ގުޅިފައިވާ، ފަސޭހައިން އެޑިޓްކުރެވޭނެ ޑިޒައިންތަކެއް ކަމަށް އެކުންފުނިން ބުނެއެވެ.
މި އާ ކަނެކްޓަރުގެ ސަބަބުން ގޫގުލްގެ "ނެނޯ ބަނާނާ" އިމޭޖް ޖެނެރޭޝަން މޮޑެލް އާއި ކެންވާގެ "މެޖިކް ލޭޔާސް" އެކުވެގެންދާނެއެވެ. މީގެ މާނައަކީ ޖެމިނައިން އުފައްދާ ފޮޓޯތައް ސީދާ ކެންވާއަށް ގެންގޮސް، ތަކުރާރުކޮށް ޕްރޮމްޕްޓް ލިޔުމުގެ ބަދަލުގައި، އޭގެ އެކި ބައިތަކާއި އެލިމެންޓްތަކަށް ބަދަލުތައް ގެނެސް ފުރިހަމަ ކުރެވޭނެއެވެ.
ކެންވާގެ ކޯ-ފައުންޑާ ވިދާޅުވި ގޮތުގައި މީގެ ސަބަބުން އޭއައި އިން އުފައްދާ ކޮންޓެންޓްތައް ބްރޭންޑްތަކާ ގުޅޭގޮތަށް ފުރިހަމަ ޑިޒައިންތަކަކަށް ބަދަލުކުރުން ވަރަށް ބޮޑަށް ފަސޭހަވެގެންދާނެއެވެ.
މި ބަދަލަކީ ގޫގުލްގެ "އޭއައި އޭޖެންޓް" ޤާބިލުކަން އިތުރުކޮށް، ޖެމިނައި ބޭނުންކުރާ ފަރާތްތަކަށް އެހެން އެޕްލިކޭޝަންތަކަށް ނުވަދެ ސީދާ ޗެޓްބޮޓްގެ ތެރެއިން ޑާޓާ ހަބްތަކާއި ޕްލެޓްފޯމްތަކަށް ވާސިލުވެވޭނެ ގޮތް ހެދުމަށް ގޫގުލްއިން ކުރަމުންދާ މަސައްކަތުގެ ދަށުން ގެނައި ބަދަލެކެވެ.
މީގެ ކުރިންވެސް އެޑޯބީން ވަނީ އެންތްރޮޕިކް ކުންފުނީގެ "ކްލޯޑް" އޭއައި އަށް މިފަދަ ކަނެކްޓަރެއް ތައާރަފުކޮށް، ކްރިއޭޓިވް ފަންނުވެރިންނަށް 50 އަށްވުރެ ގިނަ ޓޫލްސް ބޭނުންކުރެވޭނެ މަގު ފަހިކޮށްދީފައެވެ. އަދި ދާދިފަހުން ބޭއްވި ގޫގުލް އައި/އޯ ކޮންފަރެންސްގައިވެސް އޭއައިގެ ދާއިރާއިން ގިނަ ކުރިއެރުންތަކެއް ދައްކާލާފައިވާއިރު، މި އާ ފީޗާސްތަކާއެކު ޖެމިނައި ވެގެންދާނީ ހަމައެކަނި ސުވާލަށް ޖަވާބުދޭ ބޮޓެއްގެ ބަދަލުގައި، އަމަލީ ގޮތުން ތަފާތު ގިނަ މަސައްކަތްތައް އެއްތަނަކުން ނިންމާލެވޭނެ "ސުޕަ އެޕް" އަކަށެވެ.