ބެލުންތެރިންގެ މެދުގައި ބޮޑު މަގުބޫލުކަމެއް ލިބުނު ފިލްމު "ހަލްކް"ގެ ރޯލުން މަޝްހޫރުވި އެކްޓަރު މާކް ރަފަލޯ، ޕެރަމައުންޓުން އޭނާ 'ބްލެކްލިސްޓް' ކޮށްފާނެތީ ކަންބޮޑުވުން ފާޅުކޮށްފިއެވެ.
ހޮލީވުޑްގެ ކުޅަދާނަ އެކްޓަރު ރަފަލޯ ބުނާ ގޮތުގައި، ޕެރަމައުންޓް-ސްކައިޑާންސް ކުންފުނިން ވޯނާ ބްރަދާސް ޑިސްކަވަރީ ގަތުމަށް ނިންމާފައިވާ ނިންމުމާ ދެކޮޅަށް އޭނާ ފާޅުގައި އަޑުއުފުލުމުގެ ސަބަބުން، އެ ކުންފުނީގެ އިސްވެރިން އޭނާ ނުރަސްމީކޮށް 'ބްލެކްލިސްޓް' ކޮށްފައި އޮވެދާނެ ކަމަށް ގަބޫލުކުރެވެއެވެ.
"އައިވް ހޭޑް އިޓް" ޕޮޑްކާސްޓްގައި ވާހަކަ ދައްކަމުން ރަފަލޯ ބުނީ، މި މުއާމަލާތާ ދެކޮޅަށް އޭނާ ކިޔާ ފާޑުކިޔުންތަކާ ގުޅިގެން، އެ ކުންފުނީގެ ފަރާތުން ފުރުސަތު ނުދޭން ކަނޑައަޅާފައިވާ ފަންނާނުންގެ ލިސްޓުގައި މިހާރުވެސް އޭނާގެ ނަން އޮންނާނެ ކަމަށް ބެލެވޭ ކަމަށެވެ.
"އަހަރެން މިކަން ކުރަނީ މިއީ ކުރަންޖެހޭ ކަމެއްކަން އެނގޭތީ. އަހަރެން އަޑުނުއުފުލި ނަމަވެސް ނަތީޖާ އަންނާނީ ހަމަ އެއްގޮތަކަށް. މިހާރުވެސް އަހަރެން އޮތީ އެމީހުންގެ ލިސްޓެއްގައި. އަހަރެންނަކީ އެމީހުންގެ ރަހުމަތްތެރިއެއް ނޫން. އެހެންވީމާ އޮތީ ދެގޮތެއް، އެއީ ހަނގުރާމަކުރުން ނުވަތަ ބަލި ގަބޫލުކޮށް އަމާންދިނުން. ނަމަވެސް، އެއްވެސް ފިޔަވަޅެއް ނާޅާ ހުރި ނަމަވެސް ކުރިމަތިވާނީ ހަމަ އެއް ނަތީޖާއެއް. ދުނިޔޭގައި މީހުންނަށް ބިރުދައްކާ ކޮންމެ ބަޔަކާ މެދުވެސް ކަން ހިނގަނީ މިފަދައިން،" މާކް ބުނެފައިވެއެވެ.
މާކް ރަފަލޯ އަދި ފިލްމު "ހަލްކް"ގެ މަންޒަރެއްގައި މާކް--ފޮޓޯ/ޓެލެގްރާފްއިންޑިއާ
އޮސްކާ އެވޯޑަށް ނޮމިނޭޓްވެފައިވާ މި އެކްޓަރާއި އޭނާގެ ވަކީލު ނޯމް އައިޒަން މިހާރު ދަނީ، ވިޔަފާރީގެ ވާދަވެރިކަން ހިފެހެއްޓުމާ ބެހޭ ގާނޫނުތަކުގެ ދަށުން މި ދެ ކުންފުނި އެއްވުން ހުއްޓުވުމަށް ކަމާބެހޭ ފަރާތްތަކަށް ބާރުއަޅަމުންނެވެ.
މި އެއްވުމާ ދެކޮޅަށް އެމީހުން ތައްޔާރުކުރި ސިޓީގައި މިހާތަނަށް 5,000 އަށްވުރެ ގިނަ މީހުން ވަނީ ސޮއިކޮށްފައެވެ. ރަފަލޯ ބުނި ގޮތުގައި ހޮލީވުޑްގެ ގިނަ ބަޔަކު މި ކެމްޕޭނަށް ފާޅުގައި ތާއީދުކުރަން ފަސްޖެހެނީ، އެކަމުގެ ސަބަބުން އެމީހުންގެ މަސައްކަތުގެ ދާއިރާއިން ބަދަލުހިފުމުގެ ފިޔަވަޅެއް ކުރިމަތިވެދާނެތީއެވެ.
ރަފަލޯ ފުރަތަމަ މި ސިޓީ އާންމުކުރީ މިދިޔަ އޭޕްރީލް މަހުއެވެ. އޭގެ ފަހުން މެއި މަހު އޭނާ ވަނީ "ދަ ނިއުޔޯކް ޓައިމްސް"ގައި ލިޔުމެއް ޝާއިއުކޮށް، މި މުއާމަލާތާ ދެކޮޅަށް ތެދުވުމަށް އާންމުންނަށް ގޮވާލާފައެވެ.
އެ ލިޔުމުގައި ރަފަލޯ ފާހަގަކޮށްފައިވާ ގޮތުގައި، މިފަދަ ބޮޑެތި ކުންފުނިތައް އެއްވުމާ ދެކޮޅަށް އަޑުއުފުލައިފިނަމަ، ފަންނާނުންނާއި ފިލްމު އުފައްދާ ފަރާތްތަކުގެ ވަޒީފާގެ ކުރިމަގަށް ނޭދެވޭ އަސަރުތަކެއް ކޮށްފާނެ ކަމުގެ ބިރު އެބައޮތެވެ.
މި މުއާމަލާތުގެ މަސައްކަތްތައް ހަލުވިވެގެންދިޔައީ، ވޯނާ ބްރަދާސް ޑިސްކަވަރީ ގަތުމަށް ނެޓްފްލިކްސްއިން ކުރި މަސައްކަތް ހުއްޓާލުމާ ގުޅިގެން މި އަހަރުގެ ކުރީކޮޅުގައެވެ. އޭގެ ފަހުން ޕެރަމައުންޓުން ވަނީ އެ ސްޓޫޑިއޯއާއި އޭގެ މިލްކިއްޔާތުގައިވާ ތަންތަން ގަތުމަށް ހުށަހެޅި ހުށަހެޅުން ފައިނަލްކޮށްފައެވެ.
ރޮއިޓާސްއިން ރިޕޯޓްކޮށްފައިވާ ގޮތުގައި، 110 ބިލިއަން އެމެރިކާ ޑޮލަރުގެ އަގުހުރި މި މުއާމަލާތުގެ ދަށުން ޕެރަމައުންޓް ސްކައިޑާންސްއިން ވޯނާ ބްރަދާސް ޑިސްކަވަރީ ގަތުމަށް ވަނީ އެއްބަސްވެފައެވެ.
މިދިޔަ ހުކުރު ދުވަހު ދެ ކުންފުނިން ނެރުނު ގުޅިފައިވާ ބަޔާނެއްގައި ބުނެފައިވަނީ، 81 ބިލިއަން ޑޮލަރުގެ އިކުއިޓީ އަގަކާ އެކު ކުރިއަށްދާ މި މުއާމަލާތް މި އަހަރުގެ ތިންވަނަ ކުއާޓަރުގައި އެއްކޮށް ނިމޭނެ ކަމަށް ބެލެވޭ ކަމަށެވެ.