އޭއެފްސީ ޗެމްޕިއަންސް ލީގު ޓޫގެ ފައިނަލްގައި ޖަޕާނުގެ ގަމްބާ އޮސާކާ އަތުން 1-0 އިން ބަލިވެ، ސައުދީ އަރަބިއްޔާގެ އަލް ނަސްރަށް ކުޅެމުންދާ ކްރިސްޓިއާނޯ ރޮނާލްޑޯ އެ ކްލަބާއެކު ފުރަތަމަ ބޮޑު ތަށި ހޯދުމަށް ކުރަމުންދާ އިންތިޒާރު އިތުރަށް ދިގުލައިގެން ހިނގައްޖެއެވެ.
އޭޝިއާގެ ދެވަނަ ފަންތީގެ ކްލަބް މުބާރާތުގެ ފައިނަލް މެޗު ކުޅުނީ އަލް ނަސްރުގެ އަމިއްލަ ދަނޑު ކަމަށްވާ ކިންގް ސައުދު ޔުނިވަރސިޓީ ސްޓޭޑިއަމްގައެވެ.
ގާތްގަނޑަކަށް 26,000 އެއްހާ ސަޕޯޓަރުންގެ ކުރިމަތީގައި ކުޅުނު މި މެޗު ކާމިޔާބުކުރާނެ ކަމަށް އެންމެ ބޮޑަށް ބެލެވުނީ އަލް ނަސްރެވެ.
މުބާރާތުގެ ޗެމްޕިއަަންކަން ހޯދި ޖަޕާނުގެ ގަމްބާ އޮސާކާ--
ނަމަވެސް މެޗުގެ 30 ވަނަ މިނެޓުގައި އިސާމް ޖެބާލީ ތަނަވަސްކޮށްދިން ފުރުސަތަކުން ގަމްބާ އޮސާކާއަށް ލަނޑު ޖަހައިދިނީ ޑެނިޒް ހުމެޓްއެވެ. މެޗުގެ ދެވަނަ ހާފުގައި އަލް ނަސްރުން ގިނަ ހަމަލާތަކެއް އުފެއްދި ނަމަވެސް، ޖަޕާނުގެ ޓީމުން ވަނީ ލީޑު ދަމަހައްޓައި، މި މުބާރާތް ކާމިޔާބުކުރި ޖަޕާނުގެ ފުރަތަމަ ކްލަބުގެ ޝަރަފް ހޯދާފައެވެ. އަދި މިއީ މި މުބާރާތުގެ ތަށި ސައުދީ ކްލަބަކަށް ހޯދުމަށް ލިބުނު ފުރުސަތެއްވެސް މެއެވެ.
2023 ވަނަ އަހަރުގެ ޖެނުއަރީ މަހު އަލް ނަސްރާ ގުޅުނު ފަހުން ރޮނާލްޑޯއަށް ބޮޑު ތައްޓެއް ނުލިބި އޮތްއިރު، މިއީ ހަފްތާއެއްގެ ތެރޭގައި އޭނާއަށް ކުރިމަތިވި ދެވަނަ ނާކާމިޔާބީއެވެ.
މީގެ ހަތަރު ދުވަސް ކުރިން ސައުދީ ލީގުގައި އަލް ހިލާލާ ދެކޮޅަށް ކުޅުނު މެޗުގެ ފަހު ވަގުތު ކީޕަރު ބެންޓޯ އަތުން ބައިކޮޅަށް ވަތް ލަނޑާއެކު މެޗު 1-1 އިން އެއްވަރުވެ، ލީގު ކަށަވަރުކުރުމުގެ ފުރުސަތުވެސް ވަނީ ފަސްވެފައެވެ.
އެހެންނަމަވެސް، ލީގުގެ ފަހު މެޗުގައި އަންނަ ބުރާސްފަތި ދުވަހު ދަމަކް އަތުން މޮޅުވެގެން، 2019 ވަނަ އަހަރުގެ ފަހުން ފުރަތަމަ ފަހަރަށް ލީގު ޗެމްޕިއަންކަން ހޯދުމުގެ ފުރުސަތު އަލް ނަސްރަށް އެބައޮތެވެ.
އަލް ނަސްރުގެ ކޯޗު ބުނީ، ބޭނުންވި ނަތީޖާ މި މެޗުން ނުލިބުނު ނަމަވެސް، ކުރިއަށް އަދި ވަރަށް މުހިންމު ފައިނަލެއް އެބައޮތް ކަމަށާއި އެއީ ސައުދީ ޕްރޯ ލީގުގެ ތަށި ކަމަށެވެ. އަދި ދެރަވެފައި ތިބޭނެ ވަގުތެއް ނެތް ކަމަށާއި، ފަސް ދުވަހުގެ ތެރޭގައި އެ މެޗަށް ތައްޔާރުވެ، ލީގު ކާމިޔާބުކުރަން ހުރިހާ ބާރެއްލާނެ ކަމަށްވެސް ކޯޗު ފާހަގަކުރިއެވެ.