އިޓާލިއަން ކަޕްގެ ފައިނަލުގައި ރޭ ލާޒިއޯއާ ދެކޮޅަށް ކުޅުނު ފޯރިގަދަ މެޗު 2-0 އިން ކާމިޔާބުކޮށް، އިންޓަ މިލާނުން އެ ކްލަބުގެ ތާރީޚުގައި 10 ވަނަ ފަހަރަށް މި ތަށި އުފުލާލައިފިއެވެ.
މި ސީޒަނުގެ ލީގު ޗެމްޕިއަންކަން 21 ވަނަ ފަހަރަށް ކަށަވަރުކުރި އިންޓަ އިން ރޭގެ ފައިނަލަށް ނުކުތީ ވަރުގަދަ އަޒުމެއްގައެވެ. މީގެ ހަތަރު ދުވަސް ކުރިން ލީގުގައި ވެސް ލާޒިއޯއާ ބައްދަލުކޮށް 3-0 އިން މޮޅުވެފައިވާ އިންޓަ އިން ރޭގެ މެޗުގެ ދެ ލަނޑުވެސް ކާމިޔާބުކުރީ ފުރަތަމަ ހާފުގައެވެ.
މެޗު ފެށުނީއްސުރެ ލާޒިއޯގެ ޑިފެންސަށް ބާރުބޮޑުކުރަމުންދިޔަ އިންޓަ އިން ވަނީ ކުރީކޮޅުގައި ނުރައްކާތެރި ހަމަލާތަކެއް އުފައްދާފައެވެ. އެގޮތުން ނިކޯލޯ ބަރެއްލާ ނެގި ހުރަހަކުން ލައުޓާރޯ މާޓީނޭޒް ބޮލުން ފޮނުވާލި ބޯޅަ ގޯލާ ސީދާނުވެ ދިޔައިރު، އެ ޓީމުން މެޗުގެ ލީޑު ނެގީ 14 ވަނަ މިނެޓުގައެވެ.
މިއީ ފެޑެރީކޯ ޑި މާކޯ ނެގި ކޯނަރަކަށް މާކަސް ތުރާމް އެރި ވަގުތު، ލާޒިއޯގެ އެޑަމް މަރުސިޗް ގައިގައި ޖެހިފައި ވަން ބައިކޮޅަށް ވަން ލަނޑެކެވެ.
އިންޓަގެ ދެވަނަ ލަނޑު ފެނިގެންދިޔައީ ފުރަތަމަ ހާފު ނިމެން 10 މިނެޓަށް ވެފައި ވަނިކޮށެވެ.
ލާޒިއޯގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި، ޑެންޒެލް ޑަމްފްރީސް އޭރިއާ ތެރެއަށް ވަދެ ހުސްކޮށްލާފައި ދިން ބޯޅަ މާޓީނޭޒް ވަނީ ފަސޭހަކަމާއެކު ގޯލުގެ ތެރެއަށް ފޮނުވާލާފައެވެ.
މިއީ މި ސީޒަނުގައި މާޓީނޭޒް ކާމިޔާބުކުރި 22 ވަނަ ލަނޑެވެ. އޭގެ ފަހުން ޕިއެޓްރޭ ޒިއެލިންސްކީ ފޮނުވާލި ހަމަލާއެއް ލާޒިއޯގެ ކީޕަރު އެޑޮއާޑޯ މޮޓާ ދިފާއުކުރިއިރު، ފުރަތަމަ ހާފު ނިމުނީ އިންޓަ ދެ ލަނޑުގެ ލީޑެއްގައި އޮވެގެންނެވެ.
މެޗުގެ ދެވަނަ ހާފުގައި ލާޒިއޯ އިން ކުޅުން ރަނގަޅުކޮށް، ލަނޑެއް ޖެހުމަށް ގިނަ މަސައްކަތްތަކެއް ކުރިއެވެ.
ނަމަވެސް އިންޓަގެ ވަރުގަދަ ޑިފެންސް ފޫއަޅުވާލެވޭ ގޮތެއް ނުވިއެވެ. އަނެއްކޮޅުން، ކައުންޓާ އެޓޭކުގައި އިންޓަގެ ތުރާމް އާއި ޒިއެލިންސްކީ އަށް ލީޑު ފުޅާކުރަން ލިބުނު ރަނގަޅު ފުރުސަތުތަކުގެ ބޭނުން ހިފޭގޮތެއް ނުވިއެވެ.
މެޗު ނިމުނީ 2-0 ގެ ނަތީޖާއަކުން އިންޓަ މިލާން މޮޅުވެ، އިޓަލީގެ ރަސްކަން އެ ޓީމުން ދަމަހައްޓަމުންނެވެ.
މިއީ މި ސީޒަނުގެ އިޓާލިއަން ލީގު ޗެމްޕިއަންކަން ވެސް ހޯދާފައިވާ އިންޓަ އިން، އެއް ސީޒަނެއްގައި ލީގާއި ކަޕް ކާމިޔާބުކޮށް ހޯދި ބޮޑު ކާމިޔާބީއެކެވެ.
މީގެކުރިން އިންޓަ އަށް މި ޝަރަފު ލިބުނީ 2009-10 ވަނަ ސީޒަނުގައި ހޯސޭ މޮރީނިއޯގެ އިރުޝާދުގެ ދަށުންނެވެ.