ގަވާއިދާ ޚިލާފު ވިޔަފާރިތަކާއި ކުށްތަކުގައި ފަތުރުވެރިން ބައިވަރިވަމުންދާތީ ކުށްކުރުން މަދުކުރުމުގެ ގޮތުން 93 ގައުމަކުން ތައިލެންޑަށް ވިސާއާ ނުލައި ދަތުރުކުރާ ފަތުރުވެރިންނަށް އެ ގައުމުގައި ތިބެވޭ މުއްދަތު 60 ދުވަހުން 30 ދުވަހަށް ކުރުކުރުމަށް ތައިލެންޑް ސަރުކާރުން ރާވަމުންދާ ކަމަށް އެ ގައުމުގެ ޚާރިޖީ ވަޒީރު ސިހަސަކް ޕުއަންކެޓްކާއޯ ވިދާޅުވެއްޖެއެވެ.
ފަތުރުވެރިން ވިސާއާ ނުލާ ތިބޭ މުއްދަތު 60 ދުވަހުން 30 ދުވަހަށް ކުޑަކުރުމަށް ރުހުން ހޯދުމަށް ކެބިނެޓަށް ހުށަހެޅުމެއް ހުށަހަޅާނެ ކަމަށް ޕުއަންކެޓްކާއޯ ވަނީ ވިދާޅުވެފައެެވެ. އެ ގައުމުތަކުގެ ތެރޭގައި ދިވެހި ރާއްޖެ ހިމެނެއެވެ.
އަދި ތައިލެންޑްގެ ލިބަރަލް ވިސާ ޕޮލިސީތައް އޯވަހޯލް ކުރުމުގެ ތެރެއިން އިންވެސްޓްމަންޓް ވިސާއާއި ދިގު މުއްދަތުގެ ރެޒިޑެންސީ ޕާމިޓާއި ސްޓޫޑެންޓް ވިސާއާއި ޑިޖިޓަލް ނޮމެޑް ސްކީމްތަކުގެ ޝަރުތު ހަމަވާ މިންގަނޑުތައް ވެސް މި ހުށަހެޅުމުގައި މުރާޖައާ ކުރާނެއެވެ.
މި ފިޔަވަޅު އެޅުމަށް ނިންމާފައި ވަނީ ބޭރުގެ ރައްޔިތުން ޚާއްސަކޮށް ރަޝިޔާ، ޗައިނާ އަދި އެހެނިހެން ބިދޭސީން ތައިލެންޑުގައި ގަވާއިދާ ހިލާފަށް ވިޔަފާރި ކުރަމުން އަންނަ ކަމަށް ތުހުމަތު ކުރެވޭތީ ކަމާބެހޭ ފަރާތްތަކަށް ޕްރެޝަރު ބޮޑުވަމުން އަންނަ ދަނޑިވަޅެއްގައެވެ.
އިގްތިސާދު ވަރަށް ބޮޑަށް ފަތުރުވެރިކަމުގެ މައްޗަށް ބަރޯސާވެފައިވާ ތައިލެންޑުން ކޯވިޑް-19ގެ ބަލިމަޑުކަމުގެ ސަބަބުން ދުނިޔޭގެ ދަތުރުފަތުރަށް ބުރޫއެރުމުގެ ކުރިން 2019 ވަނަ އަހަރު ގާތްގަނޑަކަށް 40 މިލިއަން ފަތުރުވެރިންނަށް ވަނީ މަރުހަބާ ކިޔާފައެވެ.
ރަޝިޔާ-ޔޫކްރެއިން ހަނގުރާމައާއި ޣައްޒާ ހަނގުރާމަ ހިމެނޭހެން ހަމަނުޖެހުން އޮތް ސަރަހައްދުތަކުން ތައިލެންޑަށް މީހުން ބަދަލުވުުމުން ކޮވިޑަށްފަހު އޭގެފަހުން ފާއިތުވި އަހަރުތަކުގައި ފަތުރުވެރިންގެ އަދަދު އަނެއްކާވެސް ވަނީ އިތުރުވެފައެވެ.
ނަމަވެސް އެކަމުގެ ސަބަބުން ފަތުރުވެރިންގެ ބައެއް ހޮޓްސްޕޮޓްތަކުގައި ގައުމުން ބޭރު މީހުން ވިޔަފާރިކޮށް އަގުތައް މަތިކުރަމުންދާ ކަމުގެ ޝަކުވާ ތައިލެންޑުންގެ އާންމުން އަންނަނީ ކުރަމުންނެވެ.
ތައިލެންޑްގެ ބޮޑުވަޒީރު އަނޫޓިން ޗާންވިރަކުލް ވިދާޅުވީ ވިސާ ފްރީ ސިޔާސަތު މުޅިން ދޫކޮށްލަން ސަރުކާރުން މަސައްކަތް ނުކުރާ ކަމަށާއި ފަތުރުވެރިކަމަކީ ގައުމަށް އާމްދަނީގެ މުހިންމު މަސްދަރެއް ކަމަށް ފާހަގަކުރައްވާ ކަމަށެވެ.