ބޮލީވުޑްގެ ކުރީގެ ބަތަލާ ސެލީނާ ޖެއިޓްލީގެ ފިރިމީހާ، ޕީޓާ ހާގްގެ މައްޗަށް، އަނިޔާވެރިވުމާއި، ފުރައްސާރަކުރުމާއި، ބިރުދެއްކުމުގެ އިތުރުން ޖިސްމާނީ އަނިޔާ ކުރިކަމުގެ ތުހުމަތުގައި މުމްބާއީ ފުލުހުން މައްސަލައެއް ރަޖިސްޓްރީކޮށްފިއެވެ.
މި މައްސަލަ ހުށަހެޅީ ސެލީނާ އަމިއްލައަށެވެ. މި މައްސަލައިގެ ތަހުގީގު ކުރިއަށްދަނީ އިންޑިއާގެ އާ ޖިނާއީ ގާނޫނު، 'ބާރަތިޔާ ނިޔާޔާ ސަންހިތާ' 2023ގެ އެކި މާއްދާތަކުގެ ދަށުންނެވެ.
ފުލުހުން ބުނާ ގޮތުގައި، މި މައްސަލަ ރަޖިސްޓްރީކޮށްފައި ވަނީ ބާރަތިޔާ ނިޔާޔާ ސަންހިތާގެ 85، 115(2)، 351(2) އަދި 352 ވަނަ މާއްދާގެ ދަށުންނެވެ.
މި މާއްދާތަކަކީ އަނިޔާވެރިވުމާއި، ގެއްލުން ދިނުމާއި، ބިރުދެއްކުމާއި އަދި މެދުނުކެނޑި ކުރާ ފުރައްސާރައާ ގުޅޭ މާއްދާތަކެކެވެ. މީގެ އިތުރުން، މި މައްސަލައަކީ 2005 ވަނަ އަހަރުގެ 'ޕްރޮޓެކްޝަން އޮފް ވުމަން ފްރޮމް ޑޮމެސްޓިކް ވަޔަލަންސް އެކްޓް' (ގެވެށި އަނިޔާއިން އަންހެނުން ރައްކާތެރިކުރުމުގެ ގާނޫނު)ގެ ދަށުން ވެސް ބަލަމުންދާ މައްސަލައެކެވެ.
ސެލީނާ ފިރިމީހާ ޕީޓާ ހާގްއާ އެކު--ފޮޓޯ/ބޮލީވުޑްހަންގާމާ
މި މައްސަލަ އިތުރަށް ސީރިއަސްވެ، މުމްބާއީ ފުލުހުން މިހާރު ވަނީ އޮސްޓްރިއާއަށް ނިސްބަތްވާ ޕީޓާ ހާގްއާ ދެކޮޅަށް 'ލުކް އައުޓް ސާކިއުލާ' (އެލްއޯސީ)އެއް ނެރެފައެވެ.
މައުލޫމާތު ލިބޭ ގޮތުގައި މި ފިޔަވަޅު އެޅީ ތަހުގީގަށް އޭނާ އެއްބާރުލުން ނުދޭތީއެވެ. އާންމުގޮތެއްގައި 'ލުކް އައުޓް ސާކިއުލާ' ނެރެނީ ތުހުމަތުކުރެވޭ މީހަކު ސުވާލުކުރުމަށް އުޒުރުވެރިވާނަމަ ނުވަތަ ގައުމުން ބޭރަށް ފުރައިގެން ގޮސްދާނެ ކަމަށް ބެލެވޭ ހާލަތްތަކުގައެވެ.
ސެލީނާ އަކީ އިންޑިއާގެ މުނިފޫހިފިލުވުމުގެ ދާއިރާގައި މަޝްހޫރު ފަންނާނަކަށް ވުމާއެކު، މި ހާދިސާއަށް ގިނަ ބައެއްގެ ސަމާލުކަން ވަނީ ހުއްޓިފައެވެ. ނަމަވެސް ފުލުހުން ބުނެފައި ވަނީ މައްސަލައިގެ ތަހުގީގު އަދިވެސް ކުރިއަށްދާ ކަމަށާއި، އިތުރު ފިޔަވަޅުތައް އަޅާނީ ތަހުގީގަށް ލިބޭ ހެކިތަކުގެ މައްޗަށް ބިނާކޮށް ކަމަށެވެ.
މިހާތަނަށް ޕީޓާ ހާގްގެ ފަރާތުން ނުވަތަ އޭނާގެ ގާނޫނީ ވަކީލުންގެ ފަރާތުން މި ތުހުމަތުތަކާ ގުޅޭގޮތުން އެއްވެސް ބަހެއް ބުނެފައެއް ނުވެއެވެ. މުމްބާއީ ފުލުހުން ދަނީ މި މައްސަލައާ ގުޅުންހުރި ބަޔާންތައް ނަގައި ހެކި އެއްކުރުމުގެ މަސައްކަތް ކުރަމުންނެވެ.
މި މައްސަލައާ އެކު، ގެވެށި އަނިޔާ އާއި އަންހެނުންނަށް ލިބިދޭ ގާނޫނީ ރައްކާތެރިކަމުގެ ވާހަކަތަކުގެ އިތުރުން، އިންޑިއާގައި އަލަށް އަމަލުކުރަން ފެށި 'ބާރަތިޔާ ނިޔާޔާ ސަންހިތާ ގެ ބޭނުންކުރެވޭ މިންވަރާ ބެހޭގޮތުން އަނެއްކާވެސް ވަނީ ބަހުސްތައް ފެށިފައެވެ.
ސެލީނާ ބަތަލާގެ ތިން ކުދިންނާ އެކު--ފޮޓޯ/ބޮލީވުޑްހަންގާމާ
ގިނަ އަހަރުތަކެއް ވަންދެން އާންމުންގެ ކުރިމަތީގައި މި ދެމަފިރިންނަކީ ވަރަށް އުފާވެރި ބައެއްގެ ގޮތުގައި ފެނުނު ކަމުގައި ވިޔަސް، ސެލީނާ ތުހުމަތު ކުރާ ގޮތުގައި އެމީހުންގެ ކައިވެނި ބިނާވެފައި އޮތީ އެކަކު އަނެކެއްގެ މައްޗަށް ބާރު ފޯރުވުމާއި ނުފޫޒު ހިންގުމުގެ މައްޗަށެވެ.
ސެލީނާ ތުހުމަތު ކުރާ ގޮތުގައި، 2017 ވަނަ އަހަރު އޭނާއަށް ލިބުނު ދަރިފުޅު (ޝަމްޝޭރު) މަރުވުމާ ގުޅިގެން އޭނާ ނަފްސާނީ ގޮތުން އެންމެ ބަލިކަށިވެފައި ހުރި ވަގުތުތަކުގައި ޕީޓަ ވަނީ އޭގެ ނާޖާއިޒު ފައިދާ ނަގާފައެވެ.
އޭގެތެރޭގައި ސެލީނާގެ ނަމުގައި އިންޑިއާގައި ހުރި މުދާތަކުގެ މިލްކުވެރިކަން ޕީޓަގެ ނަމަށް ބަދަލުކުރުމަށް އޭނާއަށް ބިރުދައްކައި ޕްރެޝަރު ކުރުން ހިމެނޭ ކަމަށް ބަތަލާ ވަނީ ބުނެފައެވެ.
ސެލީނާ އާއި ޕީޓަގެ ކައިވެނި ކުރީ 2012 ވަނަ އަހަރުއެވެ. މި ކައިވެންޏަށް ހަތަރު ކުދިން ލިބިފައިވާއިރު ދުނިޔޭގައި ތިބީ ތިން ކުދިންނެވެ. ސެލީނާގެ ފިރިމީހާ ވަނީ ބާރުގެ ބޭނުންކޮށްގެން ތިން ކުދިން ވެސް ސެލީނާ އަތުން އަތުލުމަށްފަހު ކުދިން ސެލީނާއާ ބައްދަލުކުރުން ވެސް ގާނޫނީގޮތުން މަނާކޮށްފައި ކަމަށް ބަތަލާ ވަނީ ބުނެފައެވެ.
ފިލްމު "ޖާނަޝީން"އިން 2003 ވަނަ އަހަރު ފިލްމީ ދާއިރާއަށް ތައާރަފްވި ބަތަލާ އެންމެފަހުން ބެލުންތެރިންނަށް ފެނިފައި ވަނީ 2011 ވަނަ އަހަރު ރިލީޒްކުރި ދެ ފިލްމަކުންނެވެ.
އޭގެފަހުން 2012 ވަނަ އަހަރު "ވިލް ޔޫ މެރީ މީ" ކިޔާ ފިލްމެއްގެ ހާއްސަ ފެނިލުމަކުން ބަތަލާ ފެނިފައިވެއެވެ. އަދި 2020 ވަނަ އަހަރު ރިލީޒްކުރި ކުރު ފިލްމެއްގައި ވެސް ސެލީނާ ވަނީ މަސައްކަތްކޮށްފައެވެ. ކައިވެންޏަށްފަހު ސެލީނާ އެއްވެސް ވަރަކަށް ފިލްމީ މަސައްކަތެއްގައި ހަރަކާތްތެރިވެފައެއް ނުވެއެވެ.