ދިވެހިރާއްޖޭގެ އަތޮޅުތެރޭގެ ފުޓުބޯޅައަކީ ހަމައެކަނި ދަނޑުމަތީގެ ކުޅިވަރެއް ނޫންކަން ސާބިތުވަނީ، އެއީ ރަށްރަށުގެ އެކުވެރިކަމާއި އިޖުތިމާއީ ރޫހުގެ މައިބަދަ ކަމުގައިވާތީއެވެ. މި މުހިންމުކަން އިތުރަށް ވަރުގަދަކޮށް، ރަށްފުށުގެ ހުނަރުވެރިންނަށް ހަމަހަމަ ފުރުސަތުތަކެއް ހޯދައިދިނުމުގެ ގޮތުން އެފްއޭއެމް ރީޖަން ލީގު ވަނީ ފުޓުބޯޅައިގެ އާ އޮނިގަނޑުގެ ތެރެއިން މުހިންމު ދައުރެއް އަދާކުރަން ފަށާފައެވެ.
މި ލީގުގެ ސަބަބުން މާލެއަށް ބަރޯސާވެފައި އޮތް ފުޓުބޯޅަ މުޅި ރާއްޖެއަށް ފެތުރި، އަތޮޅުތަކުގެ ކުލަބުތަކަށް ރަށުގައި ތިބެގެން ގައުމީ ފެންވަރުގެ ވާދަވެރިކަމަށް ނުކުތުމުގެ ދޮރު ވަނީ ހުޅުވިފައެވެ.
ރީޖަން ލީގުގެ ތެރެއިން ފާހަގަވާ ކުޅުންތެރިންނަށް ސީދާ ފުރަތަމަ ޑިވިޜަނާ ހަމައަށް ވާސިލްވުމުގެ މަގު ތަނަވަސްވެފައިވާއިރު، މިއީ ދިވެހި ފުޓުބޯޅައިގެ ކުރިމަގު, އަތޮޅުތަކުގެ ދަނޑުތަކުން އާރާސްތުކުރަން ލިބުނު އެންމެ ބޮޑު ބާރެވެ.
މި އާ އޮނިގަނޑާއެކު، އަތޮޅުތެރޭގެ ފޯރި މިވަނީ މުޅި ރާއްޖޭގެ ލީގު ސިސްޓަމާ ގުޅިލާމެހި، ކޮންމެ ރަށެއްގެ ހުނަރުވެރިއަކަށްވެސް ގައުމީ ފެންވަރުގެ ތަރިއަކަށް ވުމުގެ އުންމީދު އާވެފައެވެ.
ދިވެހި ފުޓްބޯޅަ އޭގެ ހަގީގީ މަންޒިލަށް ރުޖޫއަވެއްޖެއެވެ. މާލޭގެ ގަލޮޅު ދަނޑަށް އެކަނި ބަރޯސާވެފައި އޮތް އޮތުން ނިމުމަކަށް ގެނެސް، އެފްއޭއެމުން އެކުލަވާލި އައު "ހޯމް އެންޑް އަވޭ" އޮނިގަނޑާއެކު މިއަދު މުޅި ރާއްޖޭގައި ފުޓްބޯޅައިގެ ފޯރި ވަނީ ގަދަވެފައެވެ.
ނޯތު، ސެންޓްރަލް އަދި ސައުތު؛ މި ތިން ސަރަހައްދަށް ބަހާލައިގެން ކުރިއަށްގެންދާ ރީޖަން ލީގުތަކަކީ ހަމައެކަނި ޓްރޮފީއަކަށް ކުރާ މަސައްކަތެއް ނޫނެވެ. މިއީ އޯގަސްޓް މަހު ފަށާ ދިވެހި ޕްރިމިއާ ލީގުގެ "ރަން ޖާގައެއް" ހޯދުމަށް އަތޮޅުތެރޭގެ ޓީމުތަކަށް ލިބިފައިވާ އެންމެ ފަހި ފުރުސަތެވެ.
މިއަދު ރާއްޖޭގެ ތިން ޒޯނުގައި ފަށާ ލީގުގައި ވާދަކުރަނީ ޗެމްޕިއަަނުންނެވެ. އެގޮތުން ތިން ޒޯނުގެ ފުރަތަމަ މެޗުތަކުގައި މިއަދު ހަވީރު ކުޅޭ މެޗުތަކާއި ތަފްސީލު ތިރީގައި އެވަނީއެވެ.
އުތުރުގެ ފުޓުބޯޅަ ފޯރި: ހަނިމާދޫ އާއި މަނަދޫގެ ކުރިމަތިލުމުން ފެށުން
އުތުރުގެ ރަށްތަކަށް އަންނަ ފުޓުބޯޅަ އީދު މިއަދު ހަވީރު 16:00 ގައި ރަސްމީކޮށް ފެށޭނީ ހ.ދ. ހަނިމާދޫ އާއި ނ. މަނަދޫ ބައްދަލުކުރާ ފޯރިގަދަ މެޗުންނެވެ.
މި ސަރަހައްދުގެ ވާދަވެރިކަން ބިނާވެފައިވަނީ އުތުރު ރީޖަންގެ ޒޯން 1 އަދި 2 ގެ ޗެމްޕިއަނުންނާއި ރަނަރަޕް ޓީމުތަކުގެ މެދުގައެވެ.
މި ލީގުގައި ހިމެނޭ އަނެއް ދެ ބާރަކީ ހ.އ. ދިއްދޫ އާއި ބ. އޭދަފުއްޓެވެ. މާދަމާ، މެއި 3 ވާ އާދީއްތަ ދުވަހު ދިއްދޫ އާއި އޭދަފުށި ބައްދަލުކުރާނެއެވެ. މި ސަރަހައްދުގެ މެޗުތައް މެއި މަހުގެ 21 އާ ހަމައަށް ކުރިއަށްދާއިރު، މިއީ އުތުރުގެ ހުނަރުވެރިން ފެނިގެންދާނެ ފޯރިގަދަ މެޗުތަކަކަށް ވެގެންދާނެއެވެ.
ނޯތު ރީޖަންގެ ޝެޑިއުލް--
މެދު ރާއްޖެތެރޭގެ ކުރިމަތިލުން: ހުރާ އާއި ކުޑަހުވަދޫގެ ތާރީޚީ ފެށުން
މެދު ރާއްޖެތެރޭގެ ރީޖަން ލީގުގެ ފޯރި މިއަދު ފެށިގެންދާނީ ކ. ހުރާ އާއި ދ. ކުޑަހުވަދޫ ބައްދަލުކުރާ ވާދަވެރި ކުރިމަތިލުމަކުންނެވެ. މި ސަރަހައްދުގެ ލީގުގައި ބައިވެރިވަނީ ސެންޓްރަލް ރީޖަންގެ ޒޯން 1 އަދި 2 ގެ ޗެމްޕިއަނުންނާއި ރަނަރަޕް ޓީމުތަކެވެ.
މާދަމާ ހަވީރު އ.ދ. މަހިބަދޫ އާއި ދ. މީދޫ ބައްދަލުކުރާއިރު، މި ހަތަރު ޓީމުގެ މެދުގައި ދެ ބުރުގެ ކުޅުން ކުރިއަށްދާނެއެވެ. މި ލީގުގެ ފޯރި ގަދަވެގެންދަނީ މި ޓީމުތަކަކީ މީގެ ކުރިންވެސް އަތޮޅު މުބާރާތްތަކުގައި ބޮޑެތި ކާމިޔާބީތައް ހޯދާފައިވާ، ސަޕޯޓަރުން ބޮޑު ޓީމުތަކަކަށް ވާތީއެވެ. މި ޒޯނުގެ އެންމެ ފަހު މެޗުތައް ކުޅުމަށް ތާވަލުކުރެވިފައިވަނީ މެއި މަހުގެ 21 ވަނަ ދުވަހަށެވެ.
މިއަދު ކުޅުމަށް ހަމަޖެހިފައިވާ މި މެޗު އެސްއެސްޓީވީ އާއި ސަން ޕްލޭއިން ވަގުތުން ގެނެސްދިނުމަށް ވަނީ ހަމަޖެހިފައެވެ.
ސެންޓްރަލް ރީޖަންގެ ޝެޑިއުލް
ދެކުނުގެ ފުޓުބޯޅަ އީދު: ގަމާއި ގައްދޫގެ ކުރިމަތިލުމުން ރޫހު އާކުރުން
ދެކުނުގެ އަތޮޅުތަކުގައި މިއަދު ފެށޭ ފުޓުބޯޅަ އީދުގެ ފުރަތަމަ މެޗުގައި ބައްދަލުކުރާނީ ލ. ގަން އާއި ގ.ދ. ގައްދޫ އެވެ.
މި ސަރަހައްދުގެ ވާދަވެރިކަން ބިނާވެފައިވަނީ ސައުތު ރީޖަންގެ ޒޯން 1 އަދި 2 ގެ އެންމެ ވަރުގަދަ ހަތަރު ޓީމުގެ މެދުގައެވެ.
ގަމާއި ގައްދޫގެ އިތުރުން މި ލީގުގައި ދެން ވާދަކުރާނީ ލ. ކުނަހަންދޫ އާއި ސ. ފޭދޫ އެވެ. މާދަމާ ހަވީރު ކުނަހަންދޫ އާއި ފޭދޫ ބައްދަލުކުރާ މެޗާއެކު ދެކުނުގެ ފޯރި އިތުރަށް ގަދަވެގެންދާނެއެވެ.
މި ލީގުގެ މެޗުތައް މެއި 20 ގެ ނިޔަލަށް ކުރިއަށްދާއިރު، މިއީ ދެކުނުގެ ފުޓުބޯޅަ އާއިލާއަށް ލިބޭ ވަރަށް ބޮޑު އުފަލެކެވެ.
މި ތިން ސަރަހައްދުގައި މިއަދު ފެށޭ ރީޖަން ލީގަކީ ދިވެހި ފުޓުބޯޅައިގެ ކުރިމަގު އުޖާލާކޮށްދޭނެ، އަދި އަތޮޅުތެރޭގެ ފުޓުބޯޅަ އައު އުސްމިންތަކަކަށް ގެންގޮސްދޭނެ ވަރުގަދަ ބިންގަލެކެވެ.
ކެޕްޝަން..
މާލެ ރީޖަން ލީގު: ކުރީގެ 2 ވަނަ ޑިވިޝަނުން ޕްރިމިއާ ލީގަށް
މި އައު އޮނިގަނޑުގެ ތެރެއިން އެންމެ ބޮޑު ބަދަލެއް އައީ ކުރީގެ ދެވަނަ ޑިވިޝަނަށެވެ. މިހާރު "މާލެ ރީޖަން ލީގު" ގެ ނަމުގައި ކުރިއަށްދާ މި މުބާރާތަކީ މާލޭގެ ކްލަބުތަކަށް ޕްރިމިއާ ލީގަށް ކޮލިފައިވުމަށް އޮތް މަގެވެ.
މާލެ ލީގުގެ ޗެމްޕިއަން ޓީމަށް، އަތޮޅުތެރޭގެ ތިން ރީޖަންގެ ޗެމްޕިއަނުންނާ އެކު ކޮލިފައިން ބުރުން ޖާގަ ލިބޭނެއެވެ. މިއީ މާލޭގެ ޓީމުތަކާއި އަތޮޅުތެރޭގެ ޓީމުތައް އެއް ފަންތިއެއްގައި ބަރުދަން ކުރުމަށް އެފްއޭއެމުން ގެނައި އިންސާފުވެރި ބަދަލެކެވެ.
ކޮލިފައިންގެ އޮނިގަނޑު: 6 ޓީމު، 4 ޖާގަ
މިއަހަރުގެ ދިވެހި ޕްރިމިއާ ލީގުގެ ފަހު 4 ޖާގަ ކަށަވަރުކުރުމަށް އަންނަ މަހު މާލޭގައި ބާއްވާ ކޮލިފައިން ބުރުގައި ވާދަކުރާނީ:
- ޓީސީ ސްޕޯޓްސް ކްލަބް (މިދިޔަ ސީޒަނުގެ 7 ވަނަ)
- ކްލަބް ގްރީން ސްޓްރީޓްސް (މިދިޔަ ސީޒަނުގެ 8 ވަނަ)
- ނޯތު ރީޖަން ލީގުގެ ޗެމްޕިއަން
- ސެންޓްރަލް ރީޖަން ލީގުގެ ޗެމްޕިއަން
- ސައުތު ރީޖަން ލީގުގެ ޗެމްޕިއަން
- މާލެ ރީޖަން ލީގުގެ ޗެމްޕިއަން
މި 6 ޓީމުގެ ތެރެއިން އެންމެ ކުރި ހޯދާ 4 ޓީމަކަށް އޯގަސްޓް މަހު ފަށާ 10 ޓީމުގެ ދިވެހި ޕްރިމިއާ ލީގުން ޖާގަ ލިބޭނެއެވެ.
މިއީ ރާއްޖޭގެ ފުޓްބޯޅަ މާލެއަށް ބަރޯސާވެފައި އޮތް އޮތުން ކުޑަކޮށް، ރަށްރަށުގެ ދަނޑުތަކުގައި ފުޓްބޯޅަ ކުޅެވި، އިގްތިސާދީ އަދި އިޖުތިމާއީ ގޮތުން ރަށްތަކަށް ފައިދާވާނެ ގޮތަށް އެފްއޭއެމުން ފަރުމާކުރި ހަރުދަނާ ނިޒާމެކެވެ.