ދެކުނު އިންޑިއާގެ ގިނަ ފިލްމުތަކުން ބޮޑު މަގުބޫލުކަމެއް ހޯދުމަށްފަހު މިފަހަކަށް އައިސް ބޮލީވުޑްގެ ފިލްމުތަކުން ވެސް ފެންނަ ބަތަލާ ޕޫޖާ ހޭގްޑޭ ފިލްމު އެކްޓަރަކާ ލޯބީގެ ގޮތުން ގުޅިގެން އުޅޭ ކަމަށް މީޑިއާތަކުން ބުނެފިއެވެ.
މީޑިއާ ރިޕޯޓުތަކުން ބުނެފައިވާ ގޮތުގައި ޕޫޖާ ލޯބީގެ ގޮތުން ގުޅިގެން އުޅެނީ ހިންދީ ސިނަމާގެ ކުރީގެ މަޝްހޫރު އެކްޓަރު ވިނޯދު މެހެރާގެ ދަރިފުޅު ރޯހަން މެހެރާއާއެވެ. ރޯހަން އަކީ ކުރީގެ އައިކޮނިކް އެކްޓަރު ވިނޯދު މެހެރާގެ ތިން ވަނަ ކައިވެންޏަށް ލިބިފައިވާ ކުއްޖެކެވެ.
ޕޫޖާ އާއި ރޯހަންގެ ގުޅުން ރަސްމީކޮށް ހާމަކޮށްފައި ނެތް ނަމަވެސް ދެ ތަރިން އެކީގައި ވަރަށް ގިނަ ހަފްލާތަކުން އެކީގައި ފެނިފައިވާ ކަމަށް ރިޕޯޓުތަކުން ބުނެއެވެ.
ފިލްމީ ދާއިރާއަށް އެކްޓަރެއްގެ ގޮތުގައި ތައާރަފްވުމުގެ ކުރިން ރޯހަން ވަނީ ޑައިރެކްޓަރު ސަންޖޭ ލީލާ ބަންސާލީއާ އެކު އެސިސްޓެންޓް ޑައިރެކްޓަރެއްގެ ގޮތުގައި މަސައްކަތްކޮށްފައެވެ.
ދެކުނު އިންޑިއާގެ ބަތަލާ ޕޫޖާ--ފޮޓޯ/އެންޑީޓީވީ
ރޯހަން ފިލްމީ ދާއިރާއަށް ތައާރަފްވީ 2018 ވަނަ އަހަރު ރިލީޒްކުރި ފިލްމު "ބާޒާރު"އިންނެވެ. އޭގެފަހުން އޭނާ ވަނީ ބައެއް ވެބް ސީރީސްތަކުގައި ވެސް މަސައްކަތްކޮށްފައެވެ.
ފިލްމީ ބައެއް ރިޕޯޓުތަކުން ބުނެފައިވާ ގޮތުގައި ރޯހަން ވަނީ ބަތަލާ ތާރާ ސުތާރިއާ އެކުވެސް އަހަރުތަކެއް ވަންދެން ލޯބީގެ ގުޅުމެއް ބާއްވާފައެވެ.
މި އަންނަ މަހު ސިނަމާތަކަށް ގެންނަ ފިލްމު "ހެ ޖަވާނީ ތޯ އިޝްގް ހޯނާ ހޭ"ގެ ބަތަލާ ޕޫޖާ އާއި ރޯހަންގެ ލޯބީގެ ގުޅުމެއް އޮތް ކަމަށް މީޑިއާތަކުން ބުނަމުން އަންނައިރު ޕޫޖާ އަކީ ދެކުނު އިންޑިއާގެ އެންމެ ބޮޑު އާމްދަނީއެއް ލިބޭ އެއް ބަތަލާއެވެ.