ސްޕެއިންގެ ދެވަނަ ޑިވިޝަންގައި ރެއާލް ޒަރަގޯޒާ އާއި ހުއެސްކާ ބައްދަލުކުރި ފޯރިގަދަ މެޗުގައި، ހުއެސްކާގެ ކުޅުންތެރިއަކަށް ހަމަލާދިނުމާ ގުޅިގެން ޒަރަގޯޒާގެ ކީޕަރު އެސްޓެބަން އެންޑްރާޑާ، ބޮޑު އަދަބަކާ ކުރިމަތިލާން ޖެހިއްޖެއެވެ.
މެޗުގެ ފަހު ވަގުތުކޮޅުގެ ތެރޭގައި ހިނގި މި ހާދިސާ ފެށުނީ، ހުއެސްކާގެ ކުޅުންތެރިޔަކު ކޮއްޕާލުމުން އެންޑްރާޑާއަށް ދެވަނަ ރީނދޫ ކާޑަކާއެކު ރަތް ކާޑު ދެއްކި ހިސާބުންނެވެ. ނަމަވެސް، ދަނޑުން ފޭބުމުގެ ބަދަލުގައި އޭނާ ވަނީ ދުވެފައި ގޮސް ހުއެސްކާގެ ކެޕްޓަން ޖޯޖް ޕުލީޑޯގެ މޫނުމަތީގައި ގޮށްމުށުން ޖަހާފައެވެ.
މި ހަމަލާއާއެކު ދެ ޓީމުގެ ކުޅުންތެރިންގެ މެދުގައި ބޮޑު މާރާމާރީއެއް ހިނގައި، ހުއެސްކާގެ ކީޕަރު ޑެނީ ޖިމެނޭޒް އަދި ޒަރަގޯޒާގެ ޑެނީ ޓަސެންޑޭއަށް ވެސް ވަނީ ރަތް ކާޑު ދައްކާފައެވެ.
މެކްސިކޯގެ މޮންޓެރޭ އިން ލޯނު އުސޫލުން ޒަރަގޯޒާއަށް ކުޅެމުންދާ އުމުރުން 35 އަހަރުގެ އެންޑްރާޑާ ވަނީ ފަހުން މިކަމަށް މާފަށް އެދިފައެވެ. އާޖެންޓީނާގެ ގައުމީ ޓީމަށް ވެސް ކުޅެފައިވާ ކީޕަރު ބުނީ އެ ވަގުތު އޭނާގެ "ފޯކަސް ގެއްލުނީ" ކަމަށާއި، ލީގުން ދޭ ކޮންމެ އަދަބަކާ ކުރިމަތިލާން ތައްޔާރަށް ހުރި ކަމަށެވެ.
"މިއީ ކްލަބަށާއި ސަޕޯޓަރުންނަށް، އަދި އަހަރެން ފަދަ ޕްރޮފެޝަނަލް ކުޅުންތެރިއަކަށް އެކަށީގެންވާ ސިފައެއް ނޫން. ޖޯޖް ޕުލީޑޯގެ ކިބައިން ވެސް ނުހަނު އިޚްލާޞްތެރިކަމާއެކު މާފަށް އެދެން،" އެންޑްރާޑާ ބުންޏެވެ.
ރެއާލް ޒަރަގޯޒާ އިން ނެރުނު ބަޔާނެއްގައި ބުނެފައިވަނީ އެންޑްރާޑާގެ އަމަލުތައް ހަރުކަށި އިބާރާތުން ކުށްވެރިކުރާ ކަމަށާއި، ކްލަބުގެ ފަރާތުން އޭނާއަށް ޑިސިޕްލިނަރީ ފިޔަވަޅު އަޅާނެ ކަމަށެވެ.
މިއީ ކުޅިވަރުގެ ރޫހާ ޚިލާފު، އަދި ކުޑަކުދިން ނަމޫނާ ނަގާ ކުޅުންތެރިންގެ ފަރާތުން ފެނިގެންވާނެ ފަދަ މަންޒަރުތަކެއް ނޫން ކަމަށް ވެސް އެ ކްލަބުން ބުންޏެވެ.
ހުއެސްކާގެ ކޯޗު ހޯސޭ ލުއިސް ބުނީ ފެނިގެންދިޔައީ ވަރަށް ހުތުރު މަންޒަރުތަކެއް ކަމަށެވެ.
މި މެޗު 1-0 އިން ކާމިޔާބުކުރީ ހުއެސްކާ އެވެ. ނަމަވެސް ސީޒަން ނިމެން ފަސް މެޗަށް ވެފައިވާއިރު، ދެ ޓީމުވެސް އަދި އޮތީ ރެލިގޭޝަން ޒޯނުގައެވެ.