ކެނދިކުޅުދޫ ކޮޅަށް ޖެހި 13 ލަނޑާއެކު މާޒިޔާއަށް ރެކޯޑު މޮޅެއް

ކެނދިކުޅުދޫއާއި މާޒިޔާ ބައްދަލުކުރި މެޗުގެ ތެރެއިން-- ފޮޓޯ: ސިޑިބަރި

މެންގްރޫވް އައިލެންޑް ޗެމްޕިއަންޝިޕް 2026 ގައި ކެނދިކުޅުދޫ ސްޕޯޓްސް ކްލަބްގެ މައްޗަށް 13-0 ގެ ތަފާތުބޮޑު ނަތީޖާއަކުން ކުރިހޯދައި މާޒިޔާ ޖޫނިއާސް އިން މުބާރާތުގެ ސެމީ ފައިނަލުން ޖާގަ ކަށަވަރުކޮށްފިއެވެ. މިއީ މުބާރާތުގެ ތާރީޚުގައިވެސް އެންމެ ތަފާތުބޮޑު ނަތީޖާއެވެ. މާޒިޔާގެ އައިދު މުހައްމަދު ޖަވާޒް ހެޓްރިކް ހަދައި މެޗުގެ މޮޅު ކުޅުންތެރިޔާގެ މަގާމު ހޯދިއިރު، އެޓީމުގެ އިތުރު ހަތަރު ކުޅުންތެރިންވަނީ ކޮންމެ ކުޅުންތެރިއަކު ދެ ލަނޑު ކާމިޔާބުކޮށްފައެވެ. ގްރޫޕް އޭ އިން މާޒިޔާ ސެމީއަށް ދިޔައިރު ކެނދިކުޅުދޫ ވަނީ މުބާރާތުން ކަޓާފައެވެ. މީގެ އިތުރުން ގްރޫޕް ބީ އިން ނައިފަރު ޗެލްސީ އަދި އެފްސީ މާފަރު ވަނީ ސެމީއަށް ދަތުރުކޮށްފައެވެ.

  • މާޒިޔާ ޖޫނިއާސް އިން 13-0 ގެ ނަތީޖާއަކުން ކެނދިކުޅުދޫ ބަލިކުރުން.
  • މިއީ މި މުބާރާތުގެ ތާރީޚުގައި ފެނިގެންދިޔަ އެންމެ ތަފާތުބޮޑު ނަތީޖާ ކަމަށްވުން.
  • އައިދު މުހައްމަދު ޖަވާޒް ހެޓްރިކް ހަދައި މެޗުގެ މޮޅު ކުޅުންތެރިޔާގެ މަގާމު ހޯދުން.
  • ގްރޫޕް ބީ އިން ނައިފަރު ޗެލްސީ އަދި އެފްސީ މާފަރު ސެމީއަށް ދަތުރުކުރުން.

މެންގްރޫވް އައިލެންޑް ޗެމްޕިއަންޝިޕް 2026 ގައި މާޒިޔާ ޖޫނިއާސް އިން ބޮޑު މޮޅަކާއެކު މުބާރާތުގެ ސެމީ ފައިނަލުން ޖާގަ ހޯދައިފިއެވެ.

މިއަދު ހަވީރު ކުޅުނު މެޗުގައި މުބާރާތް ބާއްވާ ކެނދިކުޅުދޫ ސްޕޯޓްސް ކްލަބް އަތުން މާޒިޔާ މޮޅުވީ 13-0 ގެ ބޮޑު ނަތީޖާއަކުންނެވެ.

މިއީ މި މުބާރާތުގެ ތާރީޚުގައި މިހާތަނަށް ފެނިގެންދިޔަ އެންމެ ތަފާތު ބޮޑު ނަތީޖާގެ ގޮތުގައި ވަނީ ރެކޯޑް ކުރެވިފައެވެ.

މި މެޗުގައި މާޒިޔާގެ އައިދު މުހައްމަދު ޖަވާޒް ހެޓްރިކެއް ފުރިހަމަކޮށް މެޗުގެ މޮޅު ކުޅުންތެރިޔާގެ މަގާމު ހޯދިއިރު، އެޓީމުގެ އަނޫފް، ނާޝިއު، އައިހަމް އަދި ނައްސާހް ކުރެ ކޮންމެ ކުޅުންތެރިއަކު ވަނީ ދެ ގޯލު ޖަހާފައެވެ.

މީގެ އިތުރުން އައިދަން އަހުމަދު މޫސާ ވެސް ވަނީ އެޓީމަށް ލަނޑެއް ކާމިޔާބުކޮށްދީފައެވެ.

މި ނަތީޖާއާއެކު މާޒިޔާ އިން ގްރޫޕް ސްޓޭޖުގެ ތިން މެޗުން ފަސް ޕޮއިންޓް ހަމަކޮށްފައިވާއިރު، ގްރޫޕް އޭގެ ދެވަނަ ޖާގައަށް އޮތީ ބޮޑު ވާދަވެރިކަމެއް އުފެދިފައެވެ.

މިވަގުތު ހަތަރު ޕޮއިންޓާއެކު އޮތް ޖިބިއްލީ ސްޕޯޓްސް ކްލަބާއި އަލިފުށި ރެކްރިއޭޝަން ކްލަބް މިރޭ ބައްދަލުކުރާ މެޗަކީ ސެމީގެ ފަހު ޖާގަ ކަށަވަރުވާނެ މެޗެވެ.

އަލިފުއްޓަށް ސެމީގެ އުންމީދު އޮތީ މިރޭގެ މެޗުން މޮޅުވެގެންނެވެ. ގްރޫޕް އޭއިން މުބާރާތާ ވަކިވާން ޖެހުނީ ކުޅުނު ހުރިހާ މެޗަކުން ބަލިވި ކެނދިކުޅުދޫ ޓީމަށެވެ.

ގްރޫޕް ބީގެ ކުޅުން ނިމިފައިވާއިރު، އެ ގްރޫޕުން ސެމީގެ ޖާގަތައް ކަށަވަރުކުރީ އެއްވަނަ ހޯދި ނައިފަރު ޗެލްސީ އާއި ދެވަނަ ހޯދި އެފްސީ މާފަރެވެ.

މިރޭގެ މެޗަށް ފަހު ސެމީ ފައިނަލުގައި ވާދަކުރާނެ ހުރިހާ ޓީމުތަކެއް ކަށަވަރުވާނެ އެވެ. މުބާރާތުގެ ސެމީ ފައިނަލް މެޗުތައް އޭޕްރީލް 27 ގައި ކުޅުމަށް ހަމަޖެހިފައިވާއިރު، ފޯރިގަދަ ފައިނަލް މެޗު އޮންނާނީ އޭޕްރީލް 30 ވަނަ ދުވަހު އެވެ.

ގުޅޭ ޓެގު
comment ކޮމެންޓް
ގުޅޭ ޚަބަރު
ގުޅޭ ޓެގު