ބޮލީވުޑްގެ މަޝްހޫރު އެކްޓަރު އަކްޝޭ ކުމާރު، ޑައިރެކްޓަރު އަނީސް ބަޒްމީއާ އެކު ގާތްގަނޑަކަށް 15 އަހަރަށް ފަހު އުފައްދާ އާ ފިލްމުގެ މަސައްކަތްތަކުގެ ދެވަނަ ތާވަލު ފަށައިފިއެވެ.
މި ފިލްމުގެ މަންޒަރުތައް ނެގުމަށް އަކްޝޭއާއި ފިލްމުގެ ބަތަލާ ވިދްޔާ ބާލަން މިހާރު ވަނީ ގުދުރަތީ ރީތި މަންޒަރުތަކުން ފުރިގެންވާ ކެރެލާއަށް ގޮސްފައެވެ. ކެރެލާއަށް ދިއުމަށް ދަތުރު ފެށުމުގެ ކުރިން މަތިންދާ ބޯޓަށް އަރާ މަންޒަރާ އެކު ސޯޝަލް މީޑިއާގައި އަކްޝޭ ކޮށްފައިވާ ޕޯސްޓެއްގައި ބުނީ، "އަހަރެމެންގެ ޖޯޑުގެ ނަސީބު މި ފަހަރު ވެސް އަތުގައި ހިފާނެ ކަމަށް އުންމީދު ކުރަން" މިގޮތަށެވެ.
މި ފިލްމަކީ ޑައިރެކްޓަރު އަނީސް ބަޒްމީއާ އެކު އަކްޝޭ މަސައްކަތްކުރާ ހަތަރުވަނަ ފިލްމެވެ. ހަމައެއާއެކު މިއީ ވިދްޔާއާ އެކު ވެސް އަކްޝޭ ފެންނާނެ ހަތަރުވަނަ ފިލްމެވެ. އަކްޝޭއާއި އަނީސް އެކުގައި މަސައްކަތްކުރި ފިލްމުތަކުގެ ތެރޭ 2007 ވަނަ އަހަރުގެ ފިލްމު "ވެލްކަމް"، 2008 ވަނަ އަހަރުގެ ފިލްމު "ސިންގް އިޒް ކިންގް" އަދި 2011 ވަނަ އަހަރުގެ ފިލްމު "ވެލްކަމް" ހިމެނެއެވެ.
އަކްޝޭ އާއި ވިދްޔާ އެއާޕޯޓުގައި ނަގާފައިވާ ފޮޓޯތަކެއް ސޯޝަލް މީޑިއާގައި ޕޯސްޓުކޮށްފައި--ފޮޓޯ/އެންޑީޓީވީ
ބޮލީވުޑް ހަންގާމާއިން ރިޕޯޓްކޮށްފައިވާ ގޮތުގައި، މި ފިލްމަކީ ތެލެގޫ ފިލްމު "ސަންކްރާންތީކީ ވަސްތުނަމް"ގެ މައިގަނޑު ވާހަކައަށް ބިނާކޮށް އުފައްދާ ހިންދީ ފިލްމެކެވެ. ފިލްމުގެ މަސްދަރަކުން މައުލޫމާތު ދީފައިވާ ގޮތުގައި، ތެލުގޫ ފިލްމުގެ ވާހަކަ ބިނާކޮށްފައިވާ ހާދިސާ އަކްޝޭއާއި އަނީސްއަށް ވަރަށް ބޮޑަށް ވަނީ ކަމުގޮސްފައެވެ.
ނަމަވެސް، އޮރިޖިނަލް ފިލްމުގައި ތެލެގޫ ސަގާފަތުގެ ބައިތައް ގިނަކަމުން، ހިންދީ ބެލުންތެރިންނާ ގުޅޭނެ ގޮތަށް އަނީސް ބަޒްމީ ދަނީ ފިލްމުގެ ވާހަކައަށް ބަދަލުތަކެއް ގެންނަމުންނެވެ.
ކެރެލާގައި ކުރިއަށްދާ މި ތާވަލުގައި ފިލްމުގެ ވާހަކައިގެ މުހިންމު ބޭރު މަންޒަރުތަކެއް ނެގުމަށް ވަނީ ހަމަޖެހިފައެވެ. އަކްޝޭއާއި އަނީސްގެ ކުރީގެ މަސައްކަތްތަކަކީ ބެލުންތެރިން ބަލައިގަނެފައިވާ މަސައްކަތްތަކެއް ކަމަށްވުމުން، މި ފިލްމަށް ވެސް މިހާރު ވަނީ ބޮޑު ސަމާލުކަމެއް ލިބިފައެވެ.
އަކްޝޭ އެންމެ ފަހުން ބެލުންތެރިންނަށް ފެނިފައިވަނީ މި މަހުގެ 16 ވަނަ ދުވަހު ރިލީޒްކުރި ޑައިރެކްޓަރު ޕްރިޔަދަރްޝަންގެ ފިލްމު "ބޫތު ބަންގްލާ"އިންނެވެ. މި ފިލްމަށް ބެލުންތެރިންގެ ބޮޑު ތަރުހީބެއް ލިބެމުން އަންނައިރު ބޮކްސް އޮފީހުގައި މިހާތަނަށް 137.97 ކްރޯޑު ރުޕީސްގެ އާމްދަނީއެއް ފިލްމަށް ވަނީ ލިބިފައެވެ.