އިނގިރޭސި ޕްރިމިއާ ލީގުގެ ތަށި ހޯދުމުގެ ރޭހުގައި ބޮޑު ބަދަލެއް އައިސް، މުޅި ސީޒަނުގައި ތާވަލުގެ ކުރީގައި އޮތް އާސެނަލް ދެވަނައަށް ވައްޓާލުމަށްފަހު މެންޗެސްޓާ ސިޓީ ތާވަލުގެ އެއްވަނައަށް ޖެހިލައިފިއެވެ.
ރޭ ރަށުން ބޭރުގައި ބާންލީއާ ދެކޮޅަށް ކުޅުނު މެޗު 1-0 އިން ކާމިޔާބުކޮށް ސިޓީން ވަނީ ލީގުގެ ކުރި ހޯދާފައެވެ. މި މެޗުގައި ސިޓީގެ ހަމައެކަނި ލަނޑު، މެޗު ފެށިގެން އެންމެ ފަސްވަނަ މިނެޓުގައި ކާމިޔާބުކޮށްދިނީ އެޓީމުގެ އިތުބާރު ފޯވާޑް އާލިން ހާލަންޑެވެ.
މި މޮޅާއެކު ސިޓީއަށް ވެސް އަދި އާސެނަލަށް ވެސް 33 މެޗުން 70 ޕޮއިންޓް ލިބިފައިވާއިރު، ގޯލުގެ ތަފާތުންވެސް ދެޓީމު އޮތީ އެއްވަރެއްގައެވެ. ނަމަވެސް ސިޓީއަށް ކުރި ލިބެނީ ޖެހި ގޯލުގެ އަދަދު ގިނަވުމުންނެވެ. ސިޓީން މިހާތަނަށް 66 ގޯލު ޖަހާފައިވާއިރު އާސެނަލަށް ޖެހިފައިވަނީ 63 ގޯލެވެ.
ލީގުގައި ބާކީ ފަސް މެޗު އޮތްއިރު، އަމިއްލަ ބާރުގައި ތަށި ހޯދުމުގެ ފުރުސަތު މިހާރު އޮތީ ޕެޕް ގާޑިއޯލާގެ ސިޓީ އަށެވެ.
ކުރިއަށް އޮތް ފަސް މެޗުން މޮޅުވެގެން އެޓީމަށް ލީގު ޗެމްޕިއަންކަން ކަށަވަރު ކުރެވޭނެއެވެ. ސިޓީން މިހާރު ދައްކަމުންދަނީ ބިރުވެރި ފޯމެކެވެ. އެޓީމު އެންމެ ފަހުން ލީގު މެޗަކުން ބަލިވީ މިދިޔަ ޖަނަވަރީ މަހު މެންޗެސްޓާ ޔުނައިޓެޑް އަތުންނެވެ.
އޭގެ ފަހުން ބަލިނުވެ 11 މެޗު ފުރިހަމަކޮށް، ސިޓީން ވަނީ ސީޒަނުގެ އެންމެ މުހިންމު ދަނޑިވަޅުގައި އެޓީމުގެ އަސްލު ކުޅުން ދައްކާލާފައެވެ. ގާޑިއޯލާގެ އިރުޝާދުގެ ދަށުން ސިޓީން ވަނީ މީގެ ކުރިން ހަ ފަހަރު ލީގު ކާމިޔާބުކޮށްފައެވެ. މިފަހަރު އެޓީމުން އަމާޒު ހިފާފައިވަނީ ފާއިތުވި ނުވަ އަހަރު ތެރޭގައި ހޯދާ ހަތްވަނަ ލީގު ތައްޓަށެވެ.
އަނެއްކޮޅުން، މުޅި ސީޒަނުގައި ތާވަލުގެ އެއްވަނައިގައި ހިފަހައްޓަމުން އައި އާސެނަލަށް މިވަނީ ކުރީގެ ސީޒަންތަކެކޭ އެއްގޮތަށް، ނިންމާލަންވީ ވަގުތު މައްސަލަތަކާ ކުރިމަތިލާން ޖެހިފައެވެ. ސީޒަނުގެ ފަހު މެޗުތަކުގައި ނަތީޖާ ނެރުމުގައި އާސެނަލަށް ދިމާވި ދަތިތަކުގެ ސަބަބުން، އަމިއްލަ ބާރު މިހާރު ވަނީ ގެއްލިފައެވެ.
މިހާރު އާސެނަލަށް ލީގު ލިބެން އޮތީ ކުރިއަށް އޮތް މެޗުތަކުން މޮޅުވުމުގެ އިތުރުން، ސިޓީއަށް ކޮންމެވެސް މެޗަކުން ޕޮއިންޓް ގެއްލިގެންނެވެ. މިއީ އާސެނަލްގެ ސަޕޯޓަރުންނަށް ވަރަށް މާޔޫސީ ވަގުތެކެވެ.
ރޭގެ މެޗުން ބަލިވުމާއެކު ބާންލީއަށް ވަނީ ލީގުގައި ދެމިއޮތުމުގެ އުއްމީދު ގެއްލި، ރެލިގޭޓްވެފައެވެ.
ސްކޮޓް ޕާކާގެ އިރުޝާދުގެ ދަށުން ކުޅެމުން އައި ބާންލީއަށް މި ސީޒަނުގައި މިހާތަނަށް ހޯދުނީ އެންމެ ހަތަރު މޮޅެވެ. މި ނަތީޖާއާއެކު އަންނަ ސީޒަނުގައި އެޓީމު ފެންނާނީ ދެވަނަ ޑިވިޝަން ނުވަތަ އިނގިރޭސި ޗެމްޕިއަންޝިޕުންނެވެ.
ބާންލީގެ އިތުރުން، ތާވަލުގެ އެންމެ ފުލުގައި އޮތް ވުލްވްސް ވެސް ވަނީ މިހާރު ލީގުން ރެލިގޭޓްވެފައެވެ. ލީގުގެ ފޯރި މިހާރު ހުރީ އެންމެ މަތީގައެވެ. ތަށި ދާނީ މެންޗެސްޓާއަށްތޯ ނުވަތަ ލަންޑަނަށްތޯ ކަށަވަރުވާނީ ކުރިއަށް އޮތް ފަސް މެޗުގެ ނަތީޖާއަށް ފަހުގައެވެ.