ސަރުކާރު ހިއްސާވާ ފަސް ކުންފުންޏަކަށް މެނޭޖިން ޑިރެކްޓަރުން އައްޔަންކުރުމަށް ޓަކައި ނަންތައް ދިރާސާކުރަމުން އަންނަ ކަމަށް، ޕްރައިވެޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ)ން މިއަދު ބުނެފިއެވެ.
ފާހަގަކުރެވޭ ގޮތުގައި، ސަރުކާރުގެ މައި ކަރަންޓު ކުންފުނި ސްޓެލްކޯގެ މެނޭޖިން ޑިރެކްޓަރު އަޙްމަދު ޝަމާހު މިދިޔަ ޖަނަވަރީ މަހުގެ 11ވަނަ ދުވަހު ވަނީ ވަކިކޮށްފައެވެ.
އޭގެ ފަހުން މިމަހުގެ ހަވަނަ ދުވަހު އެގްރޯނެޓްގެ މެނޭޖިން ޑިރެކްޓަރު ޙުސައިން ދީދީއާއި ފެނަކައިގެ މެނޭޖިން ޑިރެކްޓަރު މުޙައްމަދު ނަޖާހު ވަކިކުރިއެވެ.
ހަމަ އެ ދުވަހު އެމްޕީއެލްގެ ސީއީއޯ މުޙައްމަދު ރިޝްވާން އިސްތިއުފާދެއްވިއިރު، އޭގެ ހަ ދުވަސް ފަހުން ފެން ކުންފުނި އެމްޑަބްލިއުއެސްސީގެ މެނޭޖިން ޑިރެކްޓަރު ޢަބްދުލްމަތީން މުޙައްމަދާއި މަސް ކުންފުނި މިފްކޯގެ މެނޭޖިން ޑިރެކްޓަރު ފަރުހަތު ޝަހީރު ވަނީ އިސްތިއުފާ ދެއްވައިފައެވެ.
ޢަބްދުލްމަތީން އިސްތިއުފާދެއްވިތާ ދެ ދުވަސް ފަހުން އެމްޑަބްލިއުއެސްސީގެ މެނޭޖިން ޑިރެކްޓަރު ކަމަށް ސްޓެލްކޯގެ ކުރީގެ މެނޭޖިން ޑިރެކްޓަރު ޙުސައިން ފަހުމީ އައްޔަންކުރިއިރު، މެނޭޖިން ޑިރެކްޓަރުގެ މަގާމު ހުސްކޮށް ހުރި ކުންފުނިތައް ވަގުތީގޮތުން ހިންގުމުގެ ޒިންމާ ހަވާލުކޮށްފައިވަނީ، އެ ކުންފުނިތަކުގެ ޑެޕިއުޓީ މެނޭޖިން ޑިރެކްޓަރުންނަށެވެ.
އެހެންކަމުން، މިހާރު މެނޭޖިން ޑިރެކްޓަރުގެ މަގާމު ހުސްކޮށް އަދި ހުރި ކުންފުނިތަކަކީ ސްޓެލްކޯ، ފެނަކަ، އެގްރޯނަޓް، އެމްޕީއެލް، އަދި މިފްކޯއެވެ.
ޕީސީބީގެ ރައީސް މުޙައްމަދު އަނަސް 'ސަން'އަށް ވަރަށް ކުރުކޮށް ދެއްވި ޖަވާބެއްގައި މިއަދު ވިދާޅުވީ، ކުންފުނިތަކުގެ މެނޭޖިން ޑިރެކްޓަރުންނަށް އައްޔަންކުރުމަށްޓަކައި ނަންތަކެއް ލިބިފައިވާ ކަމަށާއި، އެ ނަންތައް ދިރާސާކުރަމުން އަންނަ ކަމަށެވެ.
ވަރަށް އަވަހަށް އެ ކުންފުނިތަކަށް މެނޭޖިން ޑިރެކްޓަރުން ހަމަޖެހިގެން ދާނެ ކަމަށް އަނަސް ވިދާޅުވި ނަމަވެސް، ސީދާ ތާރީޚެއް ނުދެއްވައެވެ.
ބައެއް ކުންފުނިތަކުގެ ވެރިން ވަކިކޮށްފައި ވަނީ، މިމަހު ކުރީކޮޅު ބޭއްވި ކައުންސިލުތަކުގެ އިންތިޚާބާއި، މައި ދެ އިންތިޚާބު އެއް ދުވަހެއްގައި ބޭއްވުމާ މެދު ނެގި ފެންނަ ނުފެންނަ ވޯޓުން ސަރުކާރު ބަލިވެފައި ވަނިކޮށެވެ.
އިންތިޚާބަށް ފަހު މިދިޔަ އަންގާރަ ދުވަހު މި ސަރުކާރުގެ 10 މިނިސްޓަރަކު ވަނީ މަގާމުން އިސްތިއުފާ ދެއްވައިފައެވެ. ހަމަ އެ ދުވަހު ސަރުކާރުން ވަނީ، ބައެއް ވުޒާރާތައް އެއްކޮށްލައި، ވުޒާރާތަކުގެ އަދަދު 20ން 15އަށް މަދުކޮށްފައެވެ.