މާގިނައިން ސައި ބުއިމަކީ އިންސާނާގެ ނަފުސާނީ ދުޅަހެޔޮކަމަށް ބުރޫއަރައި، ހާސްކަމާއި ނުތަނަވަސްކަން އިތުރުވެ، ނިދުމަށް ހުރަސްއެޅޭ ކަމެއްކަން ސިއްހީ މާހިރުން ވަނީ ހާމަކުރައްވާފައެވެ. އަދި ދުވާލެއްގެ މައްޗަށް ހަށިގަނޑަށް އެތެރެވާ ކެފެއިންގެ މިންވަރަށް ސަމާލުވުމަށް އެ ބޭފުޅުން އިލްތިމާސްކުރައްވައެވެ.
ސައިބުއިމަކީ ދުވާލުގެ ތާވަލު ތަރުތީބުކޮށްދޭ، ވަރަށް ގިނަ ބަޔަކަށް އެކަމުން ހިތްހަމަޖެހުން ގެނެސްދޭ އާދައެކެވެ. ނަމަވެސް، ޑޮކްޓަރުން ވިދާޅުވާ ގޮތުގައި މި އާދަ ވަކި މިންވަރަކަށްވުރެ އިތުރުވެއްޖެނަމަ، އިންސާނާގެ މޫޑަށާއި ނަފުސާނީ ދުޅަހެޔޮކަމަށް އޭގެ ނޭދެވޭ އަސަރު މަޑުމަޑުން ފޯރަން ފަށައެވެ.
ކެފެއިންއަށް ހަށިގަނޑު މާބޮޑަށް ނުކުޅެދުންތެރިވުމާއި، ހާސްކަމާއި، ނިދީގެ މައްސަލަތައް އިތުރުވަމުންދާތީ، މާގިނައިން ސައި ބުއިމަކީ ގިނަ ބަޔަކަށް ހީކުރެވޭ ވަރަށް ވުރެ ނުރައްކާތެރި ކަމެއްކަން މާހިރުން ބަޔާންކޮށްދެއެވެ.
ސައި ބުއިމުން ސިކުނޑިއަށް ކުރާ އަސަރާ ބެހޭގޮތުން ހައިދަރުއާބާދުގެ ރެނޯވާ ސެންޗަރީ ހޮސްޕިޓަލްގެ އިންޓަނަލް މެޑިސިން ޑިޕާޓްމަންޓްގެ ޑައިރެކްޓަރު ޑރ. ކޭ ކްރިޝްނާ ޕްރަބާކަރް ވިދާޅުވީ، ސައިގެ ސަބަބުން ސިކުނޑި ހޭލައްވާލަނީ ކެމިކަލް ރިއެކްޝަނެއްގެ ތެރެއިން ކަމަށެވެ.
ބައެއް މީހުންނަށް ސައި ބުއިމަށްފަހު ނުތަނަވަސްކަން އިހުސާސްވަނީ ކީއްވެގެންކަން ޑރ. ކޭ ކްރިޝްނާ އޮޅުންފިލުވައިދެއްވިއެވެ.
"ސައިގައި އެކުލެވޭ ކެފެއިންގެ ސަބަބުން، ހަށިގަނޑު ހަމަޖައްސައިދީ ނިދި އަންނަން އެހީތެރިވާ 'އެޑިނޯސިން ރިސެޕްޓާސް' ތައް ބްލޮކްކޮށްލާ. މީގެ ސަބަބުން ހިތުގެ ވިންދު އަވަސްވެ، މާބޮޑަށް ހޭލުންތެރިކަން އިތުރުވޭ. މެދުމިންވަރަކަށް ކެފެއިން ބޭނުންކުރުމުން ކަންކަމަށް ސަމާލުކަންދެވޭ މިންވަރު ރަނގަޅުވި ނަމަވެސް، މާގިނައިން ބޭނުންކުރުމުން ހާސްކަމާއި، ނުތަނަވަސްކަމާއި، ނިދީގެ މައްސަލަތައް ކުރިމަތިވެ، ނަފްސާނީ ބަލިތައް ތަހައްމަލުކުރާ މީހުންގެ ހާލަތު އިތުރަށް ގޯސްވޭ." އޭނާ ވިދާޅުވިއެވެ.
މާގިނައިން ސައިބުއިމަށް އާދަވެފައިވާނަމަ އެކަން މަޑުމަޑުން ދޫކޮށްލުމަށް އެކި ކަހަލަ 'ހާބަލް ޓީ' ބޯން ފެށިދާނެ ކަމަށް ސިއްހީ މާހިރުން އިުރޝާދު ދެއްވާ--ފޮޓޯ/އިންޑިއަންއެކްސްޕްރެސް
އެޕޯލޯ ހޮސްޕިޓަލްގެ ކޮންސަލްޓަންޓް އިންޓަނަލް މެޑިސިން ޑރ. ކްރުޕަން ކުމާރު ވިދާޅުވީ، ކޮންމެ މީހެއްގެ ހަށިގަނޑު ކެފެއިންއަށް އިޖާބަދޭ ގޮތް ތަފާތުވާނެ ކަމަށެވެ.
ބައެއް މީހުންނަށް އެންމެ ސައިތަށްޓަކުން ވެސް އުނދަގޫވަނީ އެ މީހުންގެ ހަށިގަނޑުގެ މެޓަބޮލިޒަމް ދަށްވުމުންނެވެ. އަދި ތައިރޮއިޑް މައްސަލަތައް ހުންނަ މީހުންނާއި ކުރިންވެސް ހާސްކަމުގެ ބަލި ހުންނަ މީހުންނަށް މީގެ އަސަރު ވަރަށް ބޮޑަށް ކުރާ ކަމަށް ޑރ. ކްރުޕަން ކުމާރު ވިދާޅުވެފައިވެއެވެ.
ސައި ބުއިން ރައްކާތެރި މިންވަރާ ބެހޭގޮތުން ޑރ. ކްރިޝްނާ ވިދާޅުވީ، ފުރާވަރުގެ މީހަކަށް ދުވާލަކު 400 މިލިގްރާމްގެ ކެފެއިން (ގާތްގަނޑަކަށް 4 އާއި 6 ތަށި ކަޅުސައި)އަކީ ރައްކާތެރި މިންވަރެއް ކަމަށެވެ.
ނަމަވެސް މާބަނޑު މީހުންނާއި، ފުރާވަރުގެ ކުދިންނާއި، ހިތުގެ ބަލި ނުވަތަ ހާސްކަމުގެ ބަލި ހުންނަ މީހުން ދުވާލަކު 200 މިލިގްރާމަށް ވުރެ މަދުން ކެފެއިން ބޭނުން ކުރުމަށް ޑރ. ލަފާދެއްވައެވެ. ޑރ. ކްރުޕަން އިތުރަށް ވިދާޅުވި ގޮތުގައި، އާންމުކޮށް މީހަކަށް ދުވާލަކު 2 ނުވަތަ 3 ތަށި ސައި ބުއިމަކީ އެންމެ އެކަށީގެންވާ މިންވަރެވެ.
މާގިނައިން ސައި ބުއިމަށް ދެވިހިފުމަކީ ވެސް ކުރިމަތިވާ ކަމެކެވެ. ސައި ބުއިން ކުއްލިއަކަށް ހުއްޓާލުމުން ބޮލުގައި ރިއްސުން، ރުޅިގަދަވުން، ވަރުބަލިވުން އަދި މޫޑު ގޯސްވުން ފަދަ ކަންކަން ކުރިމަތިވެދާނެއެވެ. އެހެންކަމުން، ސައި ބުއިން މަދުކުރަން ބޭނުންވާ ނަމަ، މަޑުމަޑުން އެކަން ކުރަމުން ގެންދިއުމަކީ ބުއްދިވެރި ގޮތެކެވެ.
ހަށިގަނޑަށް ބޭނުންވާ ވަރަށް ވުރެ ގިނައިން ސައި ބޮވޭކަމުގެ ބައެއް ނިޝާންތަކުގެ ތެރޭގައި ހިތް އަވަސްވުން، އަތްތުރުތުރުލުން، ބަނޑުގައި އެސިޑް ގިނަވުން އަދި ނިދަން އުނދަގޫވުން ހިމެނެއެވެ. މިފަދަ އަލާމާތްތައް ފެންނަނަމަ އެއީ ސައި ބުއިން މަދުކުރަންޖެހޭ ކަމުގެ އިންޒާރެކެވެ.
ޚުލާސާކޮށް ދަންނަވާނަމަ، ސަޔަކީ އޭގެ ޒާތުގައި ގޯސް އެއްޗެއް ނޫނެވެ. ނަމަވެސް އޭގެ ސަބަބުން ފައިދާއެއް ނުވަތަ ގެއްލުމެއް ލިބުން ބިނާވެފައިވަނީ ބޮވޭ މިންވަރާއި، ބޯ ވަގުތާއި، އަދި އެ މީހެއްގެ ހަށިގަނޑުގެ ހާލަތުގެ މައްޗަށެވެ. ސިއްހަތު ސަލާމަތުން ބެހެއްޓުމަށްޓަކައި، ކެއުމާ ސައި ބުއިމާ ދުރުކުރުމާއި، މާމުއި ނުވަތަ އެކި ކަހަލަ 'ހާބަލް ޓީ' ބޭނުންކުރުމަށް ސަމާލުކަން ދިނުން މުހިންމެވެ.