ބުރު ސްޕޯޓްސް ކްލަބުގެ މައްޗަށް 0-2 ގެ ނަތީޖާއަކުން ކުރިހޯދައި، ޓީސީ ސްޕޯޓްސް ކްލަބުން މިއަހަރުގެ އެފްއޭ ކަޕް ފައިނަލުގެ ފަހު ޖާގަ ކަށަވަރުކޮށްފިއެވެ.
މިއީ 2017 ވަނަ އަހަރުގެ ފަހުން ޓީސީން މި މުބާރާތުގެ ފައިނަލަށް ދަތުރުކުރި ފުރަތަމަ ފަހަރެވެ.
ގަލޮޅު ދަނޑުގައި ކުޅުނު ފޯރިގަދަ ސެމީ ފައިނަލް މެޗުގައި ޓީސީގެ ފަރާތުން ފެނުނީ ވަރަށް ރޭވުންތެރި ކުޅުމެކެވެ. މެޗުގެ ފުރަތަމަ ހާފުގައި ދެ ޓީމަށްވެސް ލަނޑެއް ޖެހިފައި ނުވާއިރު، މެޗުގެ އޮއިވަރު ބަދަލުވެގެން ދިޔައީ ދެވަނަ ހާފުގައެވެ.
މިއަހަރުގެ އެފްއޭ ކަޕުގެ ސެމީ ފައިނަލުގައި ބުރު ސްޕޯޓްސް އާއި ދެކޮޅަށް ކުޅުނު މެޗުގެ ތެރެއިން-- ސަން ފޮޓޯ: ޝާތިއު ޢަބްދުﷲ
މެޗުގެ ފުރަތަމަ ލަނޑު ފެނިގެންދިޔައީ 64 ވަނަ މިނެޓުގައެވެ. މި ލަނޑު ޓީސީއަށް ކާމިޔާބުކޮށްދިނީ އެޓީމުގެ ބިދޭސީ ފޯވާޑް ބޯޑޫ ޕްރިންސްއެވެ. އިބްރާހީމް ޖިމޯ ތަނަވަސްކޮށްދިން ރީތި ފުރުސަތަކުން ޕްރިންސް ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ.
ބުރު ސްޕޯޓްސް އިން މެޗުގެ ނަތީޖާ އެއްވަރުކުރުމަށް ކުރި މަސައްކަތުގެ ތެރެއިން 78 ވަނަ މިނެޓުގައި އެޓީމަށް ވަނީ ރަން ފުރުސަތެއް ލިބިފައެވެ. އޭރިޔާ ތެރެއިން ކުރި ފައުލަކަށް ރެފްރީ ދިން ޕެނަލްޓީ، ބުރުގެ ހަޑްސަން ޑިއަސް ޑި ޖީސުސް ފޮނުވާލި ނަމަވެސް، ޓީސީގެ ކީޕަރު ޑެނިއެލް އިމަނުއެލް ވަނީ ވަރަށް ހުށިޔާރުކަމާއެކު އެ ބޯޅަ މަތަކޮށްފައެވެ.
މިއަހަރުގެ އެފްއޭ ކަޕުގެ ސެމީ ފައިނަލުގައި ބުރު ސްޕޯޓްސް އާއި ދެކޮޅަށް ކުޅުނު މެޗުގެ ތެރެއިން-- ސަން ފޮޓޯ: ޝާތިއު ޢަބްދުﷲ
ޓީސީން ފައިނަލުގެ ޖާގަ ޔަގީންކުރި ދެވަނަ ލަނޑު ޖެހީ މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ 8 ވަނަ މިނެޓުގައެވެ. އޭރިޔާ ބޭރުން ލިބުނު ބޯޅައެއް ކަނަށް އަމާޒުކޮށްލައިގެން މި ލަނޑުވެސް ކާމިޔާބުކުރީ ޕްރިންސްއެވެ.
ޓީސީ އެންމެ ފަހުން އެފްއޭ ކަޕް ފައިނަލެއްގައި ކުޅުނީ 2017 ގައެވެ. އެ ފަހަރު ނިއު ރޭޑިއަންޓާ ވާދަކޮށް، ފުރިހަމަ ވަގުތު 2-2 އިން އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީގައި 4-2 އިން ޓީސީ ބަލިވީއެވެ.
މިއަހަރުގެ އެފްއޭ ކަޕުގެ ސެމީ ފައިނަލުގައި ބުރު ސްޕޯޓްސް އާއި ދެކޮޅަށް ކުޅުނު މެޗުގެ ތެރެއިން-- ސަން ފޮޓޯ: ޝާތިއު ޢަބްދުﷲ
މި ފަހަރުގެ ފައިނަލުގައިވެސް ޓީސީ ނުކުންނަން ޖެހޭނީ އެންމެ ފަހުގެ ޗެމްޕިއަން ނިއު ރޭޑިއަންޓާ ދެކޮޅަށެވެ. ނިއު ފައިނަލަށް ދަތުރުކުރީ ފުރަތަމަ ސެމީގައި މޮޅުވެގެންނެވެ.
މުބާރާތުގެ ފައިނަލް މެޗު އޮންނާނީ އޭޕްރީލް 18 ވާ ހޮނިހިރު ދުވަހުގެ ރޭ 21:00 ގައެވެ.