ސްމާޓްފޯން އަދި ޓެކްނޮލޮޖީގެ އުފެއްދުންތަކަށް މަޝްހޫރު ކުންފުނި ވަންޕްލަސްއިން އެ ކުންފުނީގެ ޓެބްލެޓް ލައިންއަޕް ފުޅާކުރުމުގެ ގޮތުން އާ މޮޑެލްއެއް ނެރެން އުޅޭކަމުގެ އިޝާރާތެއް ދީފިއެވެ.
މި ޓެބްލެޓްގެ ނަން އަދި ކުންފުނިން ރަސްމީކޮށް ހާމަކޮށްފައި ނުވި ނަމަވެސް، މިއީ "ވަންޕްލަސް ޕެޑް 3 ޕްރޯ" ނުވަތަ "ވަންޕްލަސް ޕެޑް 4" ކަމަށް ރިޕޯޓުތައް ބުނެއެވެ.
އެކްސްގައި ވަންޕްލަސްއިން އާންމުކުރި ޕޯސްޓެއްގައި ވަނީ މި ޓެބްލެޓްގެ ޑިޒައިން ފެންނަ ކުރެހުމެއް ހިއްސާކޮށްފައެވެ. މި ކުރެހުމުން ފެންނަ ގޮތުގައި ޓެބްލެޓްގެ ފަހަތު ކެމެރާ މޮޑިއުލް އިންނާނީ ވާތްފަރާތު މަތީ ކަނުގައެވެ. އަދި މެދުގައި ވަންޕްލަސްގެ ލޯގޯ އިންނައިރު، ޓެބްލެޓްގެ އެއް ފަރާތެއްގައި ދެ ބަޓަން ހިމެނޭކަން ފާހަގަކުރެވެއެވެ.
ޓެކްނޮލޮޖީގެ ޚަބަރުތައް ގެނެސްދޭ ފަރާތެއް ކަމަށްވާ ދެބާޔަން ރޯއި ހާމަކޮށްފައިވާ ގޮތުގައި، މި ޓީޒާއިން ފެންނަނީ ވަންޕްލަސް ޕެޑް 3 ޕްރޯއެވެ.
އޭނާ ބުނާ ގޮތުގައި މި ޓެބްލެޓްގައި 13.2 އިންޗީގެ 3.4ކޭ އެލްސީޑީ ސްކްރީނެއް (144ހާޓްޒް ރިފްރެޝް ރޭޓާއެކު) ހިމެނޭނެއެވެ. އަދި މީގައި ބޭނުންކުރާނީ ކުއަލްކޮމްގެ އެންމެ ފަހުގެ ސްނެޕްޑްރެގަން 8 އެލީޓް ޖެން 5 ޗިޕްސެޓެވެ.
މީގެ އިތުރުން 13،000 އެމްއޭއެޗް ނުވަތަ އެއަށްވުރެ ބޮޑު ބެޓެރީއެއް މީގައި ހިމެނޭއިރު، 80W ގެ ފާސްޓް ޗާޖިން ސަޕޯޓްކުރާނެ ކަމަށްވެސް ރިޕޯޓްތައް ބުނެއެވެ. އަދި ޓެބްލެޓްގެ ފަހަތުގައި އެލްއީޑީ ފްލޭޝް އަކާއެކު 13 މެގަޕިކްސެލްގެ ކެމެރާއެއް އިންނާނެ ކަމަށް ލީކުވެފައިވާ މައުލޫމާތުތަކުން ދައްކައެވެ. ނަމަވެސް މިއީ ކުންފުނިން އަދި ކަށަވަރުކޮށްދީފައިވާ މައުލޫމާތުތަކެއް ނޫނެވެ.
މިހާރު ވަންޕްލަސްގެ އެންމެ ފަހުގެ ފްލެގްޝިޕް ޓެބްލެޓަކީ އިންޑިއާގައި މިދިޔަ އަހަރުގެ ޖޫން މަހު ނެރުނު "ވަންޕްލަސް ޕެޑް 3" އެވެ. 12 ޖީބީގެ ރޭމް އަދި 256 ޖީބީގެ ސްޓޯރޭޖާއެކު 47،999 ރުޕީސް (ގާތްގަނޑަކަށް 172.50 ޑޮލަރު)އަށް ވިއްކަން ފެށި މި ޓެބްލެޓްގައި 13.2 އިންޗީގެ ސްކްރީނަކާއި ސްނެޕްޑްރެގަން 8 އެލީޓް ޗިޕްސެޓް އަދި 12،140 އެމްއޭއެޗްގެ ބެޓެރީއެއް ވަނީ ހިމަނާފައެވެ.
މީގެ އިތުރުން މިދިޔަ އަހަރުގެ ޑިސެމްބަރު މަހު އެކުންފުނިން ވަނީ "ވަންޕްލަސް ޕެޑް ގޯ 2" ވެސް ބާޒާރަށް ނެރެފައެވެ.