ކަނޑުއޮޅި ބަންދުކުރާނެ ކަމަށް އެމެރިކާއިން އިއުލާނުކުރުމުން ތެލުގެ އަގު އަނެއްކާވެސް އުފުލިއްޖެ

މިއަދުން ފެށިގެން އީރާނުގެ ބަނދަރުތަކުން ދަތުރުކުރުން ބަންދު ކުރާނެ ކަމަށް އެމެރިކާއިން އިއުލާން ކުރުމުން ތެލުގެ އަނެއްކާ ވެސް އުފުލިއްޖެއެވެ.

ބައިނަލްއަގްވާމީ ބެންޗްމާކް ކަމަށްވާ ބްރެންޓް ކްރޫޑް ފީފާއެއް ގާތްގަނޑަކަށް އަށް ޕަސެންޓް މައްޗަށް ގޮސް، ފީފާއެެއްގެ އަގު ވަނީ 102 ޑޮލަރަށް އުފުލިފައެވެ. އެމެރިކާގެ ބެންޗްމާކް ވެސްޓް ޓެކްސަސް އިންޓަމީޑިއަޓް (ޑަބްލިއުޓީއައި) ކްރޫޑް ފީފާއެއް ވަނީ ނުވަ ޕަސެންޓް މައްޗަށް ގޮސް، ފީފާއެއްގެ އަގު 105 ޑޮލަރަށް އުފުލިފައެވެ.

ޕާކިސްތާނުގައި އެމެރިކާ އާއި އީރާނާ ދެމެދު ސުލްހައިގެ މަޝްވަރާތައް ކުރިއަށް ގެންދިއުމުގެ ކުރިން ބްރެންޓް ފީފާއެއްގެ އަގު ގާތްގަނޑަކަށް އެއް ޕަސެންޓް ދަށަށް ގޮސްފައިވެއެވެ.

ފެބްރުއަރީ 28 ގައި އެމެރިކާއާއި އިސްރާއީލުން އީރާނާ ދެކޮޅަށް ހަމަލާތައް ފެށިފަހުން ތެލުގެ އަގު ވަނީ ވަރަށް ބޮޑަށް އުފުލިފައެވެ.

ހަނގުރާމަ ފެށުމުގެ ކުރިން ބްރެންޓް ކްރޫޑް ފީފާއެއްގެ އަގު ހުރީ ގާތްގަނޑަކަށް 70 ޑޮލަރުގައެވެ. ނަމަވެސް އޭގެ ފަހުން 119 ޑޮލަރަށްވުރެ ވެސް މައްޗަށް އުފުލިފައިވެއެވެ.

ހަމަލާތަކުގެ ރައްދުގައި އީރާނުން ވަނީ ދުނިޔޭގެ ތެލުގެ ފަސްބައިކުޅަ އެއްބައި އުފުލާ މުހިންމު ކަނޑުއޮޅީގެ ކޮންޓްރޯލު ނަގައި އުޅަނދުތައް ދަތުރުކުރުން ހުރަސްއަޅާފައެވެ.

އޭގެސަަަބަބުން ދުނިޔޭގެ ތެލުގެ ސަޕްލައިއަށް ބުރޫއަރައި ތެލުގެ އަގު އަންނަނީ އުފުލެމުންނެވެ.

އީރާނުގެ ބަނދަރުތަކަށް ކަނޑުއޮޅިން ދަތުރުުކުރާ އުޅަނދުތައް ހުއްޓުވައި، ކަނޑުއޮޅި ބަންދު ކުރުމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ސެންޓްރަލް ކޮމާންޑަށް އަމުރުކުރައްވާފައެވެ. އެ އަމުރަށް މިއަދުން ފެށިގެން އަމަލު ކުރާނެ ކަމަށް ސެންޓްރަލް ކޮމާންޑުން ވަނީ ބުނެފައެވެ.

ނަމަވެސް އެގޮތަށް އަމަލުކޮށްފިނަމަ، އެއީ އީރާނާއި އެމެރިކާއިން މިހާރު ވެފައިއޮތް ވަގުތީ ގޮތުން ހަނގުރާމަ މެދުކަނޑާލަން ވެފައިވާ އެއްބަސްވުމާ ހިލާފު ކަމެއް ކަމަށް އީރާނުން ބުނެއެވެ.