ޗެމްޕިއަންސް ލީގުގައި ރޭ ޕީ.އެސް.ޖީ އަތުން 2-0 އިން ލިވަޕޫލް ބަލިވި މެޗަށްފަހު، އެ ޓީމުގެ ކޯޗު އާނޭ ސްލޮޓް ވަނީ ޓީމުގެ ކުޅުމާ މެދު ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ.
ސްލޮޓް ބުނި ގޮތުގައި މުޅި މެޗު ކޮންޓްރޯލް ކުރީ ޕީ.އެސް.ޖީން ކަމަށާއި، ލިވަޕޫލް މި މެޗުން ބަލިވީ އެންމެ ދެ ގޯލުގެ ތަފާތުން ކަމަށްވީ ނަމަވެސް، އެއީ ލިބުނު ވަރަށް ބޮޑު ނަސީބެކެވެ.
ލިވަޕޫލަށް ލިބުނު ބަލީގެ ސަބަބުން މި މުބާރާތުގައި އެ ޓީމަށް ކުރިއަށް ދިއުމަށް މިހާރު ވަނީ ވަރަށް ބޮޑު ހުރަސްތަކެއް ކުރިމަތިވެފައެވެ. ނަމަވެސް އެންފީލްޑްގައި ކުޅޭ ދެވަނަ ލެގުގައި ނަތީޖާ އަނބުރާލެވޭނެ ކަމުގެ އުންމީދު އޮތް ކަމަށް އޭނާ ފާހަގަކުރިއެވެ.
މި މެޗުގައި ލިވަޕޫލަށް ކުރިމަތިވި އެންމެ ބޮޑު ގޮންޖެހުމަކީ ޕީ.އެސް.ޖީގެ ވަރުގަދަ މިޑްފީލްޑް ފޫއަޅުވާލަން އުނދަގޫވުމެވެ. ސްލޮޓް ބުނި ގޮތުގައި އޭނާގެ ޓީމުން ބޭނުންކުރި ޕްރެސިން ޓެކްޓިކްސް ޕީ.އެސް.ޖީގެ ކުޅުންތެރިން ވަނީ ވަރަށް ފަސޭހައިން ހަލާކުކޮށްލާފައެވެ.
ވަކިން ހާއްސަކޮށް، މޭން ޓު މޭން މާކުކުރަން އުޅުމުގެ ތެރޭގައި ލިވަޕޫލްގެ ދިފާއީ ބާރު ކުޑަވެ، ޕީއެސްޖީން ނުރައްކާތެރި ހަމަލާތަކެއް އުފެއްދުމަށް ފުރުސަތު ލިބުނެވެ. މީގެ އިތުރުން ލިވަޕޫލަށް އެކަށީގެންވާ ވަރަށް ލަނޑު ޖަހާނެ ފުރުސަތުތަކެއްވެސް މި މެޗުގައި އުފެއްދިފައެއް ނުވެއެވެ.
ގިނަ ބައެއްގެ ސަމާލުކަން ހުއްޓުނީ މެޗު ނިމުނުއިރުވެސް ތަރި މުހައްމަދު ސަލާހް ކުޅެން ނުނެރުނު މައްސަލައަށެވެ. އެލެކްސެންޑާ އިސާކް ފަދަ ކުޅުންތެރިން ބަދަލުގައި ކުޅެން އެރި ނަމަވެސް، ސަލާހް މުޅި މެޗުގައި އިނީ ބެންޗުގައެވެ.
މިކަމާ ގުޅޭގޮތުން ސްލޮޓް ބުނީ، މެޗުގެ ފަހުކޮޅު ލިވަޕޫލް އޮތީ ހަމަލާދެވޭ ފަދަ ހާލަތެއްގައި ނޫން ކަމަށާއި، އެ ވަގުތު އެންމެ މުހިންމީ އިތުރު ގޯލެއް ނުކައި ސަލާމަތްވުން ކަމަށެވެ. އަދި ކުރިއަށް ހުރި މުހިންމު މެޗުތަކަށް ސަލާހްގެ ހަކަތަ ރައްކާކުރުމަކީ އެ ވަގުތުގެ ޓެކްޓިކަލް ނިންމުމެއް ކަމަށްވެސް އޭނާ ބުންޏެވެ.