މާލޭގެ ފަސް ވަނަ އަވަށް, ވިލިމާލޭގެ ދުވަސްވީ ފުނަވަލާއި ފެހި ގަސްކަރަ ނައްތާލައި، އެ ސަރަހައްދުގައި ހިންގަން ރާވާފައިވާ ބޯހިޔާވަހިކަމާއި ސިއްހީ މަޝްރޫއުތައް ހުއްޓާލުމަށް ގޮވާލައި އާންމު ސިޓީއެއް ނެރެފިއެވެ.
ތިމާވެށީގެ ހައްގުގައި މަސައްކަތް ކުރާ "ސޭވް މޯލްޑިވްސް" އިން މިއަދު އާންމުކުރި މި ސިޓީގައި، ތިމާވެއްޓަށް ލޯބިކުރާ ފަރާތްތަކުން ވަނީ ގްރޭޓާ މާލެ ސަރަހައްދުގައި އޮތް ހަމައެކަނި ޖަޒީރާވަންތަ އަވަށް ކަމަށްވާ ވިލިމާލޭގެ ގުދުރަތީ ވެށި ހިމާޔަތްކުރުމަށް ސަރުކާރަށާއި ކަމާބެހޭ ފަރާތްތަކަށް ގޮވާލާފައެވެ.
މި ސިޓީގައި އެންމެ ބޮޑު ކަންބޮޑުވުމެއްގެ ގޮތުގައި ފާހަގަކޮށްފައި ވަނީ، ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) އާ ހަވާލުކޮށްގެން ވިލިމާލޭގައި އިމާރާތްކުރާ 17 ބުރީގެ ތިން ޓަވަރުގެ މައްސަލައެވެ. ތިންސަތޭކަ ފުލެޓު ހިމެނޭ މި މަޝްރޫއު ހިންގުމަށް ހަމަޖެހިފައިވަނީ 100 އަށްވުރެ ގިނަ ދުވަސްވީ ފުނަގަސް ހިމެނޭ ސަރަހައްދެއްގައެވެ. މީގެ އިތުރުން، ޗައިނާ ސަރުކާރުގެ އެހީގައި ވިލިމާލޭގައި އެޅުމަށް ހަމަޖެހިފައިވާ 100 އެނދުގެ ހޮސްޕިޓަލް އެޅުމަށް 50 އަށްވުރެ ގިނަ ގަސް ހުރި ސަރަހައްދެއް ކަނޑައަޅާފައިވާތީ އެކަމާވެސް ވަނީ ކަންބޮޑުވުން ފާޅުކޮށްފައެވެ.
މި މަޝްރޫއުތަކުގެ ސަބަބުން ވިލިމާލޭގެ 30 ނަންބަރު ބުލޮކުގައި ހުރި، ގާނޫނީ ގޮތުން ހިމާޔަތްކޮށްފައިވާ ގަސްތައް ނެތިގެންދާނެކަން ފާހަގަކޮށް، ސިޓީގައި ގޮވާލާފައި ވަނީ މި ބިނާތައް ހުޅުމާލެ، ގުޅިފަޅު، ގިރާވަރު ނުވަތަ ފުށިދިއްގަރު ފަޅު ފަދަ ހިއްކާފައިވާ ބިންތަކަށް ބަދަލުކުރުމަށެވެ. މި ބިންތަކަކީ ބޯހިޔާވަހިކަން ކަށަވަރުކުރުމުގެ ނަމުގައި ދައުލަތުން ބޮޑު ހޭދައެއް ކޮށްގެން ހިއްކާފައިވާ ބިންތަކަކަށްވާއިރު، އެ ތަންތަނުގެ ބޭނުން ނުހިފައި ވިލިމާލޭގެ ފެހިކަން ނައްތާލުމަކީ ބަލައިގަނެވޭނެ ކަމެއް ނޫންކަމަށް ބުނެފައިވެއެވެ. އަދި މާލެ ސަރަހައްދު އިތުރަށް ތޮއްޖެއްސުމުގެ ބަދަލުގައި، އަތޮޅުތެރޭގެ ސަރަހައްދީ ހޮސްޕިޓަލްތަކުގެ ފެންވަރު މަތިކުރުމަށް ބޭނުންކުރުމަށް ވެސް ވަނީ އެދިފައެވެ.
މާލެ ސަރަހައްދަކީ މުޅި ރާއްޖޭގެ އާބާދީގެ 41 އިންސައްތަ މީހުން ދިރިއުޅޭ ތޮއްޖެހިފައިވާ ތަނަކަށްވާއިރު، ވިލިމާލެއަކީ އާންމުންނަށް ހިތްހަމަޖެހުން ހޯދުމަށް އޮތް ހަމައެކަނި ގުދުރަތީ ވެށިކަމަށް މި ސިޓީގައި ބުނެފައިވެއެވެ. އެހެންކަމުން، ބޯހިޔާވަހިކަމާއި ސިއްހީ ޚިދުމަތް ކުރިއެރުވުމުގެ ނަމުގައި އިޔާދަނުކުރެވޭނެ ފަދަ ތިމާވެށީގެ ގެއްލުންތަކެއް ދިނުމަކީ ރައްޔިތުންގެ އާންމު ސިއްހަތަށް ވެސް އޮތް ނުރައްކަލެއް ކަމަށް ވަނީ ސިފަކޮށްފައެވެ.