ސެމްސަންގް ގެލެކްސީ ވޮޗްގެ ބައެއް މޮޑެލްތަކުން ލޭގެ ޕްރެޝަރު ބެލޭނެ އިންތިޒާމު އެ ކުންފުނިން ހަމަޖައްސައިފިއެވެ.
"ސެމްސަންގް ހެލްތު މޮނިޓާ" އެޕް މެދުވެރިކޮށް ދޫކުރި މި އަޕްޑޭޓާއެކު، މިހާރު އަތުކުރީގައި އޮންނަ ގަޑިން ލޭގެ ޕްރެޝަރުގެ މިންވަރު ބަލާލެވޭނެއެވެ.
މި ޚިދުމަތް ލިބޭނީ ގެލެކްސީ ވޮޗް 8، ގެލެކްސީ ވޮޗް 8 ކްލެސިކް، ގެލެކްސީ ވޮޗް 7، ގެލެކްސީ ވޮޗް 6 އަދި 5 ސީރީޒްގެ ގަޑިތަކަށެވެ.
މި ގަޑިތަކުން ސިސްޓޮލިކް އަދި ޑަޔަސްޓޮލިކް ރީޑިންގްސްގެ އިތުރުން ހިތުގެ ވިންދު ހުންނަގޮތް ވެސް ބަލާލެވޭނެއެވެ. ނަމަވެސް، މި ރީޑިންގްސްތައް ސައްހަކޮށް ބެހެއްޓުމަށްޓަކައި ކޮންމެ 28 ދުވަހަކުން އެއްފަހަރު އާދައިގެ ޕްރެޝަރު ބަލާ މެޝިނެއް ބޭނުންކޮށްގެން ގަޑި ކެލިބްރޭޓް ކުރަން ޖެހޭނެއެވެ.
ސެމްސަންގުން ބުނާ ގޮތުގައި މިއީ ސިއްހީ ފަރުވާއަކަށް ނުވަތަ ބައްޔެއް ދެނެގަތުމަށް ބޭނުންކުރާ ސިއްހީ ވަސީލަތެއް ނޫން ކަމަށާއި، މިއީ ހަމައެކަނި ލޭގެ ޕްރެޝަރު ހުންނަ ގޮތުގެ ޓްރެންޑްތައް ބަލާލުމަށް ދޫކުރި ފީޗާއެކެވެ.
ވޮޗް 9 ބާޒާރަށް ނެރޭނީ މި އަހަރުގެ ޖުލައި މަހު ---
މީގެ އިތުރުން، ސެމްސަންގުން އުފައްދާ "ގެލެކްސީ ވޮޗް 9" އާ ބެހޭ ބައެއް މަޢުލޫމާތުތައް ވެސް މިހާރު ވަނީ ލީކުވެފައެވެ. ސެމްސަންގްގެ ސާވަރތަކުން ފެނިފައިވާ "SM-L345U" މޮޑެލް ނަންބަރު ހިމެނޭ ފާމްވެއާ ފައިލަކީ މި އާ ގަޑީގެ ފައިލެއް ކަމަށް ތަޖުރިބާކާރުން ބުނެއެވެ.
އާންމުކޮށް ކޮންމެ އަހަރަކު ވެސް އާ ގަޑިތަކެއް ނެރޭ އުސޫލުން، ގެލެކްސީ ވޮޗް 9 ބާޒާރަށް ނެރޭނީ 2026 ވަނަ އަހަރުގެ ޖުލައި މަހު ސެމްސަންގްގެ އާ ފޯނުތަކާ އެކުގައެވެ.
ބައެއް ރިޕޯޓްތައް ބުނާ ގޮތުގައި މި ގަޑީގައި ކުއަލްކޮމްގެ "ސްނެޕްޑްރެގަން ވެއާ އެލީޓް" ޗިޕްސެޓް ބޭނުންކުރާނެއެވެ.
މީގެ ކުރިން 2025 ވަނަ އަހަރުގެ ޖުލައި މަހު ސެމްސަންގުން ވަނީ ގެލެކްސީ ވޮޗް 8 ސީރީޒް ބާޒާރަށް ނެރެފައެވެ.
ސެމްސަންގުން މިފަހަކަށް އައިސް އަންނަނީ އެކުންފުނީގެ ސްމާޓްވޮޗްތަކަކީ ހަމައެކަނި ވަގުތު ބަލާލުމަށް ބޭނުންކުރާ އެއްޗެއްގެ ބަދަލުގައި، އިންސާނާގެ ހަށިގަނޑުގެ މުހިންމު ސިއްހީ މައުލޫމާތުތައް ބަލައިދޭ ވަސީލަތަކަށް ހެދުމަށް ބޮޑެތި އިންވެސްޓްމަންޓްތަކެއް ކުރަމުންނެވެ.
ލޭގެ ޕްރެޝަރު ބެލުމުގެ ފީޗާ ދެކުނު ކޮރެޔާ އާއި ޔޫރަޕްގެ ގައުމުތަކުގައި 2020 ވަނަ އަހަރުން ފެށިގެން ބޭނުންކުރަމުން އައި ނަމަވެސް، އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) ގެ ހުއްދަ ހޯދުމުގައި ހުރި ގަވާއިދުތަކުގެ ސަބަބުން އެމެރިކާގެ މާކެޓަށް މި ޚިދުމަތް ތައާރަފްކުރުން ވަނީ ވަރަށް ބޮޑަށް ލަސްވެފައެވެ.
މި އަހަރުގެ ކުރީކޮޅު ސެމްސަންގުން ވަނީ ނިދުމުގައި ދިމާވާ "ސްލީޕް އެޕްނިއާ" (ނިދީގައި ނޭވާލާން އުނދަގޫވުން) ދެނެގަތުމުގެ ހުއްދަ ވެސް އެމެރިކާގައި ފުރަތަމަ ފަހަރަށް ހޯދާފައެވެ.
ސެމްސަންގްގެ މި އާ އަޕްޑޭޓަކީ އެޕަލް ވޮޗް ފަދަ ވާދަވެރި އުފެއްދުންތަކާ ހެލްތު ޓެކްނޮލޮޖީގެ ދާއިރާއިން ކުރިހޯދުމަށް އެޅި މުހިންމު ފިޔަވަޅެއްގެ ގޮތުގައި ޓެކްނޮލޮޖީ މާހިރުން ސިފަކުރެއެވެ.