އީރާނާ ދެކޮޅަށް ހިންގާ އަސްކަރީ އޮޕަރޭޝަންތަކުގައި ބައިވެރިވާ އެމެރިކާގެ މަތިންދާބޯޓުތަކަށް ސްޕެއިންގެ ވައިގެ ސަރަހައްދު ބަންދުކޮށްފިއެވެ.
ސްޕެއިން އަކީ އީރާނާ ދެކޮޅަށް އެމެރިކާއާއި އިސްރާއީލުން ކުރިއަށް ގެންދާ އަސްކަރީ އޮޕަރޭޝަން ވަރަށް ބޮޑަށް ކުށްވެރިކުރާ ގައުމެެކެވެ.
ވައިގެ ސަރަހައްދު ބަންދުކޮށްފައިވާކަން ސްޕެއިންގެ ދިފާއީ ވަޒީރު މާގަރީޓާ ރޮބްލްސް ވަނީ ކަށަވަރުކޮށްދެއްވާފައެވެ.
މެޑްރިޑްގައި ނޫސްވެރިންނާ ވާހަކަ ދައްކަވަމުން ރޮބްލްސް ވިދާޅުވީ އީރާނުގެ ހަނގުރާމައާ ގުޅުން ހުރި އަމަލުތަކަށް އަސްކަރީ މަރުކަޒުތައް ބޭނުން ކުރުމުގެ ހުއްދައެއް ވެސް އަދި ވައިގެ ސަރަހައްދު ބޭނުން ކުރުމުގެ ހުއްދައެއް ވެސް ސްޕެއިންއިން ނުދޭ ކަމަށެވެ.
އިގްތިސާދާ ބެހޭ ވަޒީރު ކާލޯސް ކުއެރްޕޯ ވިދާޅުވި ގޮތުގައި އެ ނިންމުމަކީ ގާނޫނާ ޚިލާފަށް ފެށި ހަނގުރާމައެއްގައި ބައިވެރި ނުވުމަށް ސްޕެއިން ސަރުކާރުން މިހާރު ވެސް ނިންމާފައިވާ ނިންމުމުގެ ބައެއް ކަމަށެވެ.
އެމެރިކާއާއި އިސްރާއީލުން އީރާނަށް ދޭ ހަމަލާތަކަކީ ގާނޫނާ ޚިލާފު އަމަލުތަކެއް ކަމަށް ވިދާޅުވެ، ސްޕެއިންގެ ބޮޑުވަޒީރު ޕެޑްރޯ ސަންޗޭޒް އެމެރިކާއަށް ފާޑުވިދާޅުވެފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ސްޕެއިންއަށް ވިޔަފާރީގެ ދަތިކުރުމުގެ ފިޔަވަޅު އަޅާނެކަމަށް ވިދާޅުވެ އިންޒާރުދެއްވާފައެވެ.
އިރާނަށް ހަމަލާ ދޭން އަސްކަރީ މަރުކަޒުތައް ބޭނުން ނުކުރެވޭނެ ކަމަށް ސްޕެއިން ބުނުމުން އެ ގައުމުގެ ދެކުނުގައި ހުންނަ ރޯޓާ އާއި މޮރޮން އަސްކަރީ މަރުކަޒުތަކުން ތެޔޮ އަޅާ ޓޭންކަރުތައް ހިމެނޭ ގޮތަށް 15 މަތިންދާބޯޓު އެމެރިކާއިން ވަނީ ގެންގޮސްފައެވެ.
ސްޕެއިންގެ އަމަލުތަކުން ދައްކުވައިދެނީ އީރާނުގައި އެމެރިކާ އިސްވެ އޮވެ ކުރިއަށް ގެންދާ ކެމްޕޭނާ ގުޅިގެން ޔޫރަޕްގެ ނުތަނަވަސްކަން އިތުރުވަމުންދާ ކަމެއް ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.
ސްޕެއިންގެ ވައިގެ ސަރަހައްދު ބަންދުކުރުމުން ޔޫރަޕްގެ އެހެން ގައުމުތަކުން ވެސް މިފަދަ ހުރަސްތަކެއް އެޅުމަށް ހިތްވަރު ލިބިދާނެ ކަމަށާއި، މިއީ އެމެރިކާގެ އަސްކަރީ އޮޕަރޭޝަންތަކަށް އޮޓޮމެޓިކުން ތާއީދުކުރަން ނުޖެހޭކަން ދައްކައިދޭ އިޝާރާތެއް ކަމަށްވެސް އެ ފަރާތްތަކުން ބުނެއެވެ.