ދިވެހިންގެ ތެރޭގައި ވަރަށް އާންމު ޖުމްލައެއް އޮވެއެވެ. "މިރޭ ނިންމާލާނަމޭ" ނުވަތަ "މާދަމާ ހެނދުނު ހޭލައިގެން ތިކަން ނިންމާނަމޭ" އެވެ. ނަމަވެސް، އެ ބުނާ މާދަމާއެއް ދުވަހަކުވެސް ނާދެއެވެ. ޖޯލިފަތީގައި އޮވެ ފޭސްބުކް ސްކްރޯލް ކުރުމާއި، މުހިންމު މަސައްކަތެއް އޮއްވައި ރައްޓެހިންގެ ކޮފީ ދައުވަތަށް "ޔެސް" ބުނުމަކީ އަހަރެމެންގެ ތެރޭގައި އާންމު ކަމެކެވެ. މިއީ ހަމައެކަނި "ކަންނެތްކަން" ހެއްޔެވެ؟ ނޫނެކެވެ. މިއީ ސިކުނޑިން އަހަރެމެންނަށް ޖައްސާ "މަޅިއެކެވެ."
ކަންކަން ފަހަށް ބެހެއްޓުމުގެ އާދައަކީ އަޅުގަނޑުމެންގެ ދިރިއުޅުމުގެ އުފެއްދުންތެރިކަމަށް އޮތް އެންމެ ބޮޑު އެއް ހުރަހެވެ. ދިވެހިންގެ ހިތްފަސޭހަ ދިރިއުޅުމުގެ ވައްޓަފާޅީގެ ތެރެއިން މި އާދަ އަށަގަތުމަކީ ވަރަށް ފަސޭހަ ކަމެކެވެ. ނަމަވެސް ސުވާލަކީ، އަޅުގަނޑުމެންނަށް މިހެން މިވަނީ ކީއްވެގެން ހެއްޔެވެ؟ އަދި މި އާދައިން ސަލާމަތްވެވޭނީ ކިހިނެއް ހެއްޔެވެ؟
ސައިންސް ބުނަނީ ކީކޭ؟
ދިރާސާތަކުން ދައްކާގޮތުގައި ކަންކަން ފަހަށް ބެހެއްޓުމަކީ ވަގުތު މެނޭޖުކުރަން ނޭނގުމުގެ މައްސަލައެއް ނޫނެވެ. މިއީ އަމިއްލަ އިހުސާސްތައް ކޮންޓްރޯލް ނުކުރެވުމުގެ މައްސަލައެކެވެ. މަސައްކަތެއްގެ ސަބަބުން ކުރިމަތިވެދާނެ ހާސްކަމަކުން ނުވަތަ ވަރުބަލިކަމަކުން ސަލާމަތްވުމަށްޓަކައި، ސިކުނޑި ހޯދާ ވަގުތީ އުފަލެކެވެ.
ދާއިމީ ގޮތެއްގައި ކަންކަން ފަހަށް ބެހެއްޓުމުގެ އާދަ ހުންނަ މީހުންނަށް ނަފްސާނީ ގޮތުންނާއި ޖިސްމާނީ ގޮތުން ބޮޑެތި ގެއްލުންތަކާ ކުރިމަތިވާކަމުގައި ދިރާސާތަކުން ފާހަގަވެއެވެ.
މިގޮތުން، މި އާދައިގެ ސަބަބުން މީހާގެ ސްޓްރެސް ލެވެލް މަތިވެ، އަމިއްލަ ނަފްސަށް އޮންނަ އިތުބާރު ކުޑަވެ، އަދި ސިއްޙީ މައްސަލަތަކަށް ހުށަހެޅުމުގެ ފުރުސަތު ބޮޑުވާކަން ވަނީ ސާބިތުވެފައެވެ. އެހެންކަމުން މިއީ ހަމައެކަނި މަސައްކަތް ނުނިމުމުގެ މައްސަލައެއް ނޫނެވެ. މިއީ މީހާގެ ޢާންމު ދުޅަހެޔޮކަމާވެސް ގުޅިފައިވާ ނުރައްކާތެރި އާދައެކެވެ.
ދިވެހި "ކޮފީ ސަގާފަތް" އަދި މަސައްކަތް
ދިވެހިންގެ ގާތް ގުޅުންތަކާއި ކޮފީ މޭޒުތަކަކީ ނަފްސާނީ ގޮތުން މުހިންމު ކަމެކެވެ. އެކަމަކު، މަސައްކަތުން ރެކުމަށްޓަކައި "ކޮފީއަށް ދިއުން" ބަހަނާއަކަށް ހަދަނީ ކިތައް މީހުން ބާވައޭ ހިތަށްއަރައެެވެ. މިއީ އިޖުތިމާއީ ގުޅުން ބަދަހިކުރުމޭ ފަހަރެއްގައި ބުނެފާނެއެވެ.
އެހެންނަމަވެސް މިއީ ގިނަބަޔަކު އެއްބަސްވާނެ ކަމެއް ކަމުގައި ނުބެލެވެއެވެ. ހަމަގައިމުވެސް މިއީ މަސައްކަތަށް އޮތް ހުރަހެކެވެ. ކާމިޔާބު މީހަކަށް ވުމަށްޓަކައި "ނޫނެކޭ" ވެސް ބުނަން ދަސްކުރަންޖެހެއެވެ.
މިއަދުން ފެށިގެން ބަދަލު ގެންނަމާ!
ކަންކަން ފަހަށް ބެހެއްޓުމުގެ އާދައަކީ ކުށްލިއަކަށް ދޫކޮށްލަން ފަސޭހަ ކަމަކަށް ނުވެދާނެއެވެ. އެކަމަށްޓަކައި އެންމެ ފުރަތަމަ ގަބޫލުކުރަންވީ ހަގީގަތަކީ، ތިބާއަކީ ކަންނެތް މީހެއް ނޫން ކަމާއި، އެއީ ހަމައެކަނި އުނދަގޫ އިޙުސާސްތަކަކުން ސަލާމަތްވުމަށް ސިކުނޑި ކުރާ މަސައްކަތެއް ކަމެވެ.
"މާދަމާ" އަކީ ކަންނެތް މީހުންގެ ކަލަންޑަރުގައި އޮންނަ ދުވަހެކެވެ. ތިބާގެ އުފެއްދުންތެރިކަމުގެ ކޮންޓްރޯލް އަލުން އަތުލާށެވެ. މިއަދު އަޅާ ކުޑަ ފިޔަވަޅަކީ މާދަމާގެ ބޮޑު ކާމިޔާބީގެ ބިންގަލެވެ.