އެމެރިކާގެ ޓެކްސަސްގެ ޕޯޓް އާތާގައި ހުންނަ ވެލޭރޯ ތެޔޮ ސާފުކުރާ ކާރުޚާނާގައި ބާރުގަދަ ގޮވުމަކާއެކު ބޮޑު އަލިފާނުގެ ހާދިސާއެއް ރޭ ހިނގައިފިއެވެ.
މި ހާދިސާއާ ގުޅިގެން އެ ސަރަހައްދުގައި ދިރިއުޅޭ އާންމުން ރައްކާތެރި ތަންތަނުގައި ތިބުމަށާއި ގެއިން ބޭރަށް ނުނިކުތުމަށް ކަމާބެހޭ ފަރާތްތަކުން ވަނީ އަންގާފައެވެ.
އިއްޔެ އިރުއޮއްސުނު ވަގުތު ހިނގި މި ހާދިސާގައި އެއްވެސް މީހަކަށް އަނިޔާވިކަމުގެ ރިޕޯޓެއް މިހާތަނަށް ލިބިފައެއް ނުވެއެވެ. ވެލޭރޯ ކުންފުނިން ބުނެފައިވަނީ ކާރުޚާނާގައި މަސައްކަތްކުރާ ހުރިހާ މުވައްޒަފުންގެ ހާލުވެސް ރަނގަޅު ކަމަށެވެ.
ގޮވުމުގެ އަޑާއެކު މުޅި ސަރަހައްދަށް ބޯ ކަޅު ދުންގަނޑެއް ފެތުރިގެން ދިޔައިރު، މީހުން ދިރިއުޅޭ ހިސާބުތަކުގެ ގޭގޭގެ ކުޑަދޮރުތަކަށްވެސް ގުޑުން އެރިކަމަށް މަންޒަރު ދުށް މީހުންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.
ރައްކާތެރިކަމުގެ ފިޔަވަޅެއްގެ ގޮތުން ޕޯޓް އާތާގެ ހުޅަނގު ފަރާތުގައި ދިރިއުޅޭ އާންމުން ގެއިން ބޭރަށް ނުނިކުތުމަށް އަންގާފައިވާއިރު، އެ ސަރަހައްދުގެ މައި ދެ މަގެއް ބަންދުކުރުމާ ގުޅިގެން ސްކޫލް ނިންމާފައި ގެއަށް ދިޔަ ބައެއް ކުދިންނަށް ގެއަށް ނުދެވި މަގުމަތީގައި ތާށިވިކަމަށްވެސް ރިޕޯޓުތައް ބުނެއެވެ.
ޕޯޓް އާތާގެ ފުލުހުންނާއި އަލިފާން ނިއްވާ މީހުން ދަނީ ހާދިސާ ހިނގި ސަރަހައްދުގައި ހަރަކާތްތެރިވަމުންނެވެ. އަދި ވައިގެ ސާފުމިން ހުރި ނެތްގޮތް ބެލުމުގެ މަސައްކަތްވެސް ތިމާވެއްޓާބެހޭ އިދާރާތަކުން ދަނީ ކުރަމުންނެވެ.
ޖެފާސަން ކައުންޓީގެ ޝެރިފް ޒީނާ ސްޓީވަންސް ވިދާޅުވީ، މި ހާދިސާ ހިނގަން މެދުވެރިވީ ކާރުޚާނާގެ ހީޓަރު ޔުނިޓަކަށް ދިމާވި މައްސަލައެއްގެ ސަބަބުން ކަމަށް ބެލެވޭ ކަމަށެވެ. ނަމަވެސް ހާދިސާ ހިނގަން މެދުވެރިވި އަސްލު ސަބަބު ކަމާބެހޭ ފަރާތްތަކުން އަދި ކަށަވަރެއް ނުކުރެއެވެ.
ހިއުސްޓަންއާ 90 މޭލު ދުރުގައި އޮންނަ ވެލޭރޯ ކާރުޚާނާއަކީ އެމެރިކާގައި ހުރި ތެޔޮ ސާފުކުރާ އެންމެ ބޮޑު އެއް ކާރުޚާނާއެވެ. އެތަނުގައި 770 އެއްހާ މުވައްޒަފުން މަސައްކަތްކުރާ މި ތަނުގައި ދުވާލެއްގެ މައްޗަށް 435،000 ފީފާގެ ތެޔޮ ސާފުކުރެއެވެ. މި ކާރުޚާނާއިން އާންމުކޮށް އުފައްދަނީ ޕެޓްރޯލާއި، ޑީސަލްގެ އިތުރުން މަތިންދާބޯޓަށް އަޅާ ތެލެވެ.
މި ބޮޑު ހާދިސާ ހިނގާފައިމިވަނީ، އީރާނުގެ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ ސަޕްލައިއާމެދު ކަންބޮޑުވުން އުފެދި، ތެލުގެ އަގު އުފުލެމުންދާ ދަނޑިވަޅެއްގައެވެ.