ބަރަކާތްތެރި ރަމަޟާން މަހާ ގުޅިގެން މުޖުތަމަޢަށް އޯގާތެރިކަން ފޯރުކޮށްދިނުމުގެ ގޮތުން، އުރީދޫ މޯލްޑިވްސްއިން, އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ތިބި ބަލިމީހުންނާއި، އެހީތެރިންގެ އިތުރުން އެ ހޮސްޕިޓަލުގެ މުވައްޒަފުންނަށް ރޯދަ ވީއްލުން ބަހައިފިއެވެ.
މިއީ ހޮސްޕިޓަލުގައި ފަރުވާ ހޯދަމުންދާ ފަރާތްތަކަށާއި އެ މީހުންގެ އާއިލާތަކަށް ހިތްހަމަޖެހުން ގެނެސްދިނުމުގެ މަޤުޞަދުގައި ކުރިއަށްގެންދިޔަ ހަރަކާތެކެވެ.
މި ހަރަކާތުގައި އުރީދޫގެ މުވައްޒަފުން ވަނީ އަމަލީގޮތުން ބައިވެރިވެ، ހޮސްޕިޓަލުގައި ތިބި ފަރާތްތަކާ ބައްދަލުކޮށް ރޯދަ ވީއްލުމުގެ ޕެކޭޖުތައް ހަވާލުކޮށްފައެވެ.
އުރީދޫން ބުނިގޮތުގައި، ބަލިމީހުންނާއި އެހީތެރިން ހޮސްޕިޓަލުގައި ހޭދަކުރަންޖެހޭ ވަގުތުގައި، މިފަދަ ހަދިޔާއަކުން ވެސް އެ ފަރާތްތަކަށް އުފާވެރިކަމާއި ހިތްހަމަޖެހުން ލިބިގެންދާނެ ކަމަށް އުންމީދު ކުރާ ކަމަށެވެ.
އަދި މިއީ ރަމަޟާން މަހާ ގުޅިފައިވާ އެކުވެރިކަމާއި، ހަމްދަރުދީއާއި، ދީލަތިކަމުގެ ރިވެތި ސިފަތައް ދައްކުވައިދޭ ކަމެއް ކަމަށް ވެސް އެ ކުންފުނިން ފާހަގަކުރިއެވެ.
މީގެ އިތުރުން، މުޖުތަމަޢަށް ހެޔޮ ބަދަލެއް ގެނެވޭނީ އެންމެން ގުޅިގެން މަސައްކަތްކޮށްގެން ކަމަށް އުރީދޫން ގަބޫލުކުރާކަން މި ހަރަކާތުން ސާބިތުކޮށްދީފައިވެއެވެ.
އައިޖީއެމްއެޗްގައި ކުރިއަށްގެންދިޔަ މި ހަރަކާތަކީ އުރީދޫ މޯލްޑިވްސްގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ގެ ދަށުން މުޖުތަމަޢުގެ ލާބައާއި މަންފާއަށްޓަކައި ކުރަމުންދާ ފުޅާ މަސައްކަތްތަކުގެ ތެރޭގައި ހިމެނޭ ކަމެކެވެ.
އުރީދޫން އަބަދުވެސް މަސައްކަތްކުރަމުން އަންނަނީ ހަމައެކަނި މުވާސަލާތީ އަދި އީޖާދީ ޚިދުމަތްތައް ފޯރުކޮށްދިނުމުގެ ބަދަލުގައި، މުޖުތަމަޢުގެ ދުޅަހެޔޮކަމާއި އެއްބައިވަންތަކަން ކުރިއެރުވުމަށް އެހީތެރިވެދިނުމަށެވެ. އެގޮތުން، މިފަދަ އޯގާތެރި އަމަލުތަކުގެ ސަބަބުން މުޖުތަމަޢުގެ ގުޅުން އިތުރަށް ބަދަހިވެގެންދާނެ ކަމަށް އެ ކުންފުނިން ގަބޫލުކުރެއެވެ. ކުރިއަށް އޮތް ތަނުގައި ވެސް މުޖުތަމަޢަށް ފައިދާހުރި މިފަދަ ގިނަ ހަރަކާތްތަކެއް ހިންގުމަށް އުރީދޫން ވަނީ އަމާޒުހިފާފައެވެ.