ކުރިއަށް އޮތް އެކަޑަމީ އެވޯޑްސް ނުވަތަ އޮސްކާ ހަފުލާގައި އިނާމު ހުށަހަޅައިދޭނެ ފަރާތްތަކުގެ ތެރޭގައި ގްވީނެތް ޕަލްޓްރޯ އަދި ޕޯލް މެސްކަލް ފަދަ މަޝްހޫރު ތަރިންނާއެކު އިންޑިއާގެ މަގުބޫލު ބަތަލާ ޕްރިޔަންކާ ޗޯޕްޅާ ޖޯނަސް ވެސް ބައިވެރިވާނެކަން އިޢުލާންކޮށްފިއެވެ.
މި ހަފުލާގެ ޕްރޮޑަކްޝަން ޓީމުން ހާމަކޮށްފައިވާ ގޮތުގައި، ޕްރިޔަންކާއާ އެކު މި ލިސްޓުގައި ރޮބަޓް ޑައުނީ ޖޫނިއާ، އެން ހެތަވޭ، ޕޯލް މެސްކަލް، ވިލް އާނެޓް އަދި ގްވީނެތް ޕަލްޓްރޯ ފަދަ ހޮލީވުޑްގެ މަޝްހޫރު ފަންނާނުން ހިމެނޭނެއެވެ.
އިންޑިއާގެ އިތުރުން ހޮލީވުޑްގެ ފިލްމުތަކުން ވެސް ފެންނަ ޕްރިޔަންކާ ހިމެނެނީ މި އަހަރުގެ އޮސްކާ އެވޯޑު ހަފްލާއަށް ކަނޑައެޅި ޕްރެޒެންޓަރުންގެ ތިން ވަނަ ގްރޫޕްގައެވެ.
ޕްރިޔަންކާ އޮސްކާ އެވޯޑުގެ ޕްރެޒެންޓަރުންގެތެރޭ ހިމެނިފައިވާ ކަމުގެ އުފާވެރި ޚަބަރު ބަތަލާ ވަނީ އަމިއްލަ ސޯޝަލް މީޑިއާ މެދުވެރިކޮށް ސަޕޯޓަރުންނާ ވެސް ހިއްސާކޮށްފައެވެ. މި ޚަބަރު އިއުލާނު ކުރުމުން ބޮލީވުޑްގެ ބައެއް ފިލްމީ ތަރިން ވެސް ވަނީ ބަތަލާއަށް މަރުހަބާ ކިޔާފައެވެ. އޭގެތެރޭ އެކްޓަރު ރިތިކް ރޯޝަން އަދި މަޝްހޫރު ކޮމީޑިއަން ޒާކިރު ޚާން ވެސް ހިމެނެއެވެ.
ޕްރިޔަންކާ 2023 ވަނަ އަހަރުގެ އޮސްކާ އެވޯޑުގެ ޕްރީ-އިވެންޓެއްގައި--ފޮޓޯ/އެންޑީޓީވީ
މި އަހަރު ބާއްވާ 98 ވަނަ އެކަޑެމީ އެވޯޑްސް ހަފުލާ ބޭއްވުމަށް ހަމަޖެހިފައި ވަނީ މި އަންނަ އާދީއްތަ ދުވަހު، ލޮސް އެންޖެލިސްގެ ޑޯލްވީ ތިއޭޓަރުގައެވެ. މި ހަފްލާގައި ދުނިޔޭގެ އެކި ސިނަމާތަކުގައި މަސައްކަތްކުރާ މަޝްހޫރު އެތައް ފަންނާނުންނެއް ބައިވެރިވާނެއެވެ.
އިންޑިއާގެ ގިނަ ބަޔަކު ފަޚުރުވެރިވާ ފަދަ ކާމިޔާބީއެއް ބައިނަލް އަޤްވާމީ ޕްލެޓްފޯމްތަކުގައި ހޯދަމުން އަންނަ ޕްރިޔަންކާގެ އެންމެފަހުން ރިލީޒްކުރެވުނު ފިލްމަކީ މިދިޔަ މަހުގެ 25ގައި އެމެޒޯން ޕްރައިމްގައި ޕްރީމިއާކުރި "ދަ ބްލަފް"އެވެ.
ޕްރިޔަންކާ ދެން އެންމެ އަވަހަށް ބެލުންތެރިންނަށް ފެންނާނީ ބަތަލާ މިހާރު މަސައްކަތް ކުރަމުން އަންނަ އިންޑިއާ ފިލްމު "ވަރަނާސީ"އިންނެވެ. ޑައިރެކްޓަރު އެސްއެސް ރާޖާމޮލީގެ މި ފިލްމަކީ ޕްރިޔަންކާ އަހަރުތަކެއް ވަންދެން އިންޑިއާގެ ސިނަމާގައި މަސައްކަތްކުރުން މެދުކަނޑާލުމަށްފަހު އެ ސިނަމާއާ އަލުން ގުޅޭ ފުރަތަމަ ފިލްމެވެ.