ދުނިޔޭގެ އެކި ކަންކޮޅުތަކުގައި ލޭމަތިވުމުގެ މައްސަލަ (ހައި ބްލަޑް ޕްރެޝަރު) ހުންނަ އެތައް މިލިއަން މުސްލިމުންނެއް ދިރިއުޅޭއިރު އޭގެތެރެއިން ގިނަ ބަޔަކު ބޭނުންވަނީ ބަލި ކޮންޓްރޯލް ކުރަމުން ރަމަޟާން މަހުގެ ރޯދަ ހިފުމަށެވެ.
ނުރައްކާތެރި ބައްޔެއް ނެތް ނަމަ، ލޭމަތިވާ މީހުން ރޯދަ ހިފުމަކީ ރައްކާތެރި ކަމެއްގެ އިތުރުން، އެކަމަކީ އޭގެ ސަބަބުން ލޭގެ ޕްރެޝަރަށް ވެސް ހެޔޮ ބަދަލުތަކެއް އަންނަކަން ފާހަގަކުރެވިފައިވާ ކަމެއް ކަމަށް ސައުދީ އަރަބިއްޔާގެ މަޝްހޫރު ޖޯންސް ހޮޕްކިންސް އަރާމްކޯ ހެލްތުކެއާގެ ސިއްހީ މާހިރުންނާ ހަވާލާދީ އެ ހެލްތުކެއާ ވެބްސައިޓްގައިވާ ލިޔުމެއްގައި ވަނީ ބަޔާންކޮށްފައެވެ.
'ޖާނަލް އޮފް ދަ އެމެރިކަން ހާޓް އެސޯސިއޭޝަން' ގައި ޝާއިޢުކޮށްފައިވާ ދިރާސާއަކުން ދައްކާގޮތުގައި، ރަމަޟާން މަހު ރޯދަ ހިފުމަކީ ލޭމަތިވާ މީހުންނަށާއި، ލޭމަތިވުމުގެ މައްސަލަ ނެތް މީހުންނަށް ވެސް ފައިދާ ހުރި ކަމެކެވެ.
އެގޮތުން 24 ގަޑިއިރު ލޭގެ ޕްރެޝަރު ބަލަމުން ކުރިއަށްގެންދިޔަ ތަފާތު ދިރާސާތަކުން ދައްކާގޮތުގައި، ޑޮކްޓަރުގެ އިރުޝާދާ އެއްގޮތަށް ބޭސް ބޭނުންކުރާ ނަމަ، ރޯދަ މަހު ލޭގެ ޕްރެޝަރު އެއްވަރެއްގައި ހިފެހެއްޓެއެވެ.
ރަމަޟާން މަހު ވެސް ބެލެންސްޑް ޑައިޓެއްގެ މަތީ ހުރުމަށް މަސައްކަތް ކުރުމަކީ ތަފާތު އެކި ބަލިތައް ތަހައްމަލުކުރާ ފަރާތްތަކުން ސަމާލުކަން ދިނުން މުހިއްމު ކަމެއް-- ފޮޓޯ/ ގޫގްލް
ބައެއް ދިރާސާތަކުން ދައްކާ ގޮތުގައި ރޯދަ މަހުގެ ތެރޭގައި ލޭގެ ޕްރެޝަރުގެ މިންވަރު (ސިސްޓޮލިކް އަދި ޑަޔަސްޓޮލިކް) ކޮންމެވެސް ވަރަކަށް ދަށްވެ، ރަނގަޅުވެއެވެ.
ނަމަވެސް، ލޭމަތިވާ މީހުން ރައްކާތެރިކަމާއެކު ރޯދަ ހިފުމަށްޓަކައި އެންމެ މުހިންމީ ބޭސް ބޭނުންކުރާ ވަގުތުތަކަށް ސަމާލުވުމާއި ދިރިއުޅުމުގެ އާދަކާދަތައް ބެހެއްޓުމެވެ. އެހެންކަމުން ރޯދަ މަސް ފެށުމުގެ ކުރިން ޑޮކްޓަރަކާ މަޝްވަރާކޮށް، ތިމާގެ ހާލަތަށް ބަލައި ބޭސް ބޭނުންކުރާނެ ގޮތުގެ ޕްލޭނެއް އެކުލަވާލުމަކީ ވަރަށް މުހިންމު ކަމެެއް ކަމަށް ޖޯންސް ހޮޕްކިންސް އަރާމްކޯ ހެލްތުކެއާގެ ސިއްހީ މާހިރުންނާ ހަވާލާދީ އެ ހެލްތުކެއާ ވެބް ސައިޓްގައިވާ ލިޔުމުގައި ބަޔާންކޮށްފައިވެއެވެ.
ލޭގެ ޕްރެޝަރު މަތިވާ މީހުން ރޯދަ މަހު ކެއިން ބުއިމުގައި ވެސް ސަމާލުކަންދޭންޖެހޭ ކަންކަން ހުންނައިރު އޭގެތެރޭގައި ލޮނު މަދުން ބޭނުންކޮށްގެން ކާތަކެތި ތައްޔާރުކުރުން ހިމެނެއެވެ. ލޮނު ގިނަވުމަކީ ލޭގެ ޕްރެޝަރު މަތިވެ، ރޯދައަށް ހުންނަ އިރު މާ ބޮޑަށް ފެންބޮވައިގަންނަ ކަމެކެވެ.
ބްލަޑް ޕްރެޝަރު މަތިވާ މީހެއްނަމަ ރަމަޟާން މަހު ރޯދައަށް ހުރުމަށް ނިންމުމުގެ ކުރިން ޑޮކްޓަރެއްގެ ލަފާ އެކަމުގައި ހޯދުން މުހިއްމު-- ފޮޓޯ/ ޕިންޓްރެސްޓް
ހަމައެއާއެކު ޕޮޓޭސިއަމް ގިނަ ކާތަކެތި ކެއުމުގައި ހިމެނުން، މަސް ކެއުން، ތެޔޮ އެއްޗިއްސާއި ފޮނި އެއްޗެހި ކެއުން މަދުކުރުން، ހަށިގަނޑު ޑީހައިޑްރޭޓްކޮށް ބެހެއްޓުމަށް ގިނައިން ފެން ބުއިން އޭގެތެރޭގައި ހިމެނެއެވެ.
ރަމަޟާން މަހު ވެސް ކޮންމެވެސް މިންވަރަކަށް ކަސްރަތު ކުރުމަކީ ވެސް ލޭގެ ޕްރެޝަރު ކޮންޓްރޯލް ކުރުމަށް އެހީތެރިވެދޭނެ ކަމެކެވެ. މިގޮތުން ރޯދަ ވީއްލުމަށްފަހު އެކެއް ނުވަތަ ދެ ގަޑިއިރު ފަހުން މާ ބުރަ ނޫން ކަސްރަތު ކުރުމަށް ސަމާލުކަން ދެވިދާނެއެވެ.