ތިޔަ ކަނީ ކޮންތަނަކުން ގެނެވުނު އެއްޗެއްކަން އެނގޭތަ؟

ރޯދަވީއްލާ ގަޑީގައި އަހަރެމެންގެ ސުފުރާތަކުން ފެންނަ ކަދުރާއި، ކުޅި ފޮނި ހެދިކާތަކާއި، ބަތާއި ރޮށި އަދި ސައިތަށްޓަކީ ސަހަރާތަކާއި ކަނޑުތައް ހުރަސްކޮށް، އެތައް ހާސް އަހަރެއްގެ ދިގު ދަތުރަކަށް ފަހު އަހަރެމެންނާ ހަމައަށް ފޯރާފައިވާ ތަކެތިކަން ދެނެހުރީމުހެއްޔެވެ؟ މި ހަގީގަތްތައް ދެނެގަތުމަށްޓަކައި، އަހަރެމެންގެ ތަށިމަތީގައިވާ ބައެއް ތަކެއްޗަށް ބަލައިލަމާ ހިނގާށެވެ.

ކަދުރު

ރޯދަވީއްލާއިރު އަހަރެމެން އެންމެ ފުރަތަމަ އިސްކަންދޭ ކަދުރަކީ ހައިރާންކުރުވަނިވި ތާރީޚެއް އޮތް މޭވާއެކެވެ. ތާރީޚީ ހެކިތަކުން އެނގޭ ގޮތުގައި، މީގެ ގާތްގަނޑަކަށް 6،000 އާއި 8،000 އަހަރާ ދެމެދުގެ މާޒީއެއްގައި، ޕާޝިއަން ގަލްފް އަދި މެސޮޕޮޓޭމިއާ ސަރަހައްދުގައި (މިހާރުގެ އިރާގާއި އެ ސަރަހައްދުގެ ގައުމުތަކުގައި) ކަދުރު ރުއް ހައްދަން ފަށާފައިވެއެވެ. އިހުގެ ސަހަރާގެ މުޖުތަމައުތަކުގައި، ކަދުރަކީ އިންސާނުން ދިރިތިބުމަށްޓަކައި ބޭނުންކުރި ވަރަށް މުހިންމު ވަސީލަތެކެވެ.

އެގޮތުން، އަރަބިކަރައާއި އުތުރު އެފްރިކާގެ ހޫނު ގަދަ ސަހަރާތައް ހުރަސްކުރި ދަތުރުވެރިންނަށް ކަދުރަކީ ހަށިގަނޑަށް ބޭނުންވާ ހަކަތަ ރައްކާ ކޮށްދޭ ޤުދުރަތީ ޚަޒާނާ އަކަށް ވިއެވެ. އެއީ ފަސޭހައިން ގެންގުޅެވޭ، ހަށިގަނޑަށް ބޭނުންވާ މާއްދާތަކުން ފުރިގެންވާ އަދި ގިނަ ދުވަހު ނުބައިނުވެ ހުންނަ އެއްޗެކެވެ. މި ސިފަތަކުގެ ސަބަބުން، އިހުގެ ވިޔަފާރިވެރިންނާއި ދަތުރުވެރިންނާއި ގާފިލާތަކަށް ކަދުރަކީ ކޮންމެހެން ބޭނުންތެރި ރޯއްޖަކަށް ވިއެވެ.

އެހެންކަމުން، މިއަދު އަހަރެމެންގެ ސުފުރާމަތީން ރަހަބަލަމުން މިދާ ކަދުރަކީ މީގެ އެތައް ހާސް އަހަރެއް ކުރީންސުރެ ދަތުރުވެރީންނާއި ބޮޑެތި ހަޟާރާތްތަކަށް ދިރުން ދިން މޭވާއެކެވެ.

ކަދުރު ރުކެއްގައި ކަދުރު އަޅާފައި -- ފޮޓޯ / ޕްލެނެޓްނެޗުރަލް.ކޮމް

މިރުސް

މިރުހާ ނުލައި ދިވެހީންގެ ކެއުމެއް ފުރިހަމަ ކުރުމަކީ ވަރަށް އުނދަގޫ ކަމެކެވެ. ނަމަވެސް އަހަރެމެންގެ ކެއުމުގެ އެއްބައިގެ ގޮތުގައި ބަލައިގަނެގެން މިތިބަ ކުޅި ރަހައަކީ، އެތައް ޒަމާނެއް ކުރިން އެހެން ބައްރަކުން ކަނޑުތައް ހުރަސްކޮށް، ދިގު ދަތުރަކަށްފަހު އައިސްފައިވާ ރަހައެކެވެ.

މިރުސް އުފެދުނީ މެދުތެރޭ އަދި ދެކުނު އެމެރިކާގައެވެ. އެތަނުގެ ވަޒަންވެރިން މީގެ އެތައް ހާސް އަހަރެއް ކުރިން މިރުސް ހައްދަން ފެށިއެވެ. ދުނިޔޭގެ އެކި ކަންކޮޅުތަކަށް މިރުސް ދަތުރުކުރަން ފެށީ 15 ވަނަ ގަރުނުގެ ފަހުކޮޅުގައެވެ.

ކްރިސްޓޮފަރ ކޮލަމްބަސް 1492 ވަނަ އަހަރު އިންޑިއާއަށް ދާނެ ކަނޑުގެ މަގެއް ހޯދަން ކުރި ދަތުރުގައި، ކެރީބިއަން ސަރަހައްދުން އޭނާއަށް މިރުސް ފެނުނެވެ. އެއީ ޔޫރަޕްގައި އޭރު ބޭނުންކުރާ "ކަޅުމިރުހާ" ވައްތަރު އެއްޗެއް ކަމަށް ބަލައި، އޭނާ އެ ޔޫރަޕަށް ގެންދިޔައީއެވެ.

އޭގެ ކުޑަދުވަސްކޮޅެއް ފަހުން، ޕޯޗުގީޒު ވިޔަފާރިވެރިން އެމީހުންގެ ކަނޑުދަތުރުގެ ވިއުގަ މެދުވެރިކޮށް، 16 ވަނަ ގަރުނުގެ ތެރޭގައި އިންޑިއާއާއި ދެކުނު އިރުމަތީ އޭޝިއާއާއި އިންޑިއާ ކަނޑުގެ ސަރަހައްދަށް މިރުސް ތައާރަފްކުރިއެވެ. އެހިސާބުން މުޅި އޭޝިއާގެ ކެއުންތަކަށް މިރުސް ފެތުރިގެން ދިޔައެވެ.

މިރުސް ގަހެއްގައި މިރުސް އަޅާފައި -- ފޮޓޯ / ހޯމްސްއެންޑްގާޑްންސް.ކޮމް

ސައި

ދިވެހިންގެ ކެއުންތަކާ ވަކިނުކުރެވޭ، ކިތަންމެ އާދައިގެ ބުއިމެއްގެ ގޮތުގައި ސައި ފެނުނު ކަމުގައިވިޔަސް، މިއީވެސް އެތައް ހާސް އަހަރެއްގެ ތާރީޚެއް ފޮރުވިފައިވާ ބުއިމެކެވެ.

ޗައިނާގެ ސަގާފީ ވާހަކަތަކުގައި ބުނާގޮތުން، ސައި ހޯދުނީ މީލާދުގެ 2700 އަހަރު ކުރިން، ޗައިނާގެ ރަސަލް (އެމްޕަރަރ) ޝެންނޮންގެ ޒަމާނުގައެވެ. ބުނެވޭ ގޮތުގައި އޭނާ ފެން ކައްކަން ހުއްޓާ، ކައިރީގައި ހުރި ގަހަކުން ފަތްތަކެއް އިއްތިފާގުން އެ ފެން އެއްޗަށް ވެއްޓުނީއެވެ. އެއިން ދުވި މީރު ވަހުގެ ސަބަބުން އެ ބޯލުމުން، އެއީ ވަރަށް ތާޒާކަން ލިބޭ ބުއިމެއްކަން އޭނާއަށް އެނގުނެވެ. ސައި އުފެދުނީ މިގޮތަށެވެ. އޭގެ ފަހުން ޒަމާންތައް ފާއިތުވަމުން ގޮސް ވިޔަފާރި މަގުތަކުން ސައި މުޅި އޭޝިއާ އަށް ފެތުރި، އެއަށްފަހު ޔޫރަޕަށާއި ދުނިޔޭގެ އެހެން ހިސާބުތަކަށް ދިޔައެވެ.

ސަޔަކީ ވަރަށް ގިނަ ބަޔަކަށް މަގުބޫލު ބުއިމެއް -- ފޮޓޯ / ޑްރީމްސްޓައިމް.ކޮމް

ވީމާ، އަހަރެމެންގެ ސުފުރާތަކުން މިފެންނަނީ އެތައް ހާސް އަހަރެއްގެ ތާރީޚެއް އޮތް، މެދުއިރުމަތީގެ އިހުގެ ސަހަރާތަކުން އައި ކަދުރާއި، އެމެރިކާ ބިތުން އައި މިރުހާއި، ޗައިނާގެ ފަރުބަދަތަކުން އައި ސައިގެ ރަހަތަކެވެ.