ފިޔާ މިއީ ކާތަކެތީގެ ރަހަ މީރުކޮށްދީ، ކެއުންތަކަށް ޚާއްސަކަމެއް ގެނެސްދޭ މުހިންމު ބާވަތެކެވެ. ނަމަވެސް، މީގައި ހުންނަ ބައެއް މާއްދާތަކުގެ ސަބަބުން، އެ ކޮށާއިރު ލޮލުން ފެން އައުމަށް މެދުވެރިވެއެވެ.
ފިޔަލަކީ ސަލްފާ ގިނަ އަދަދަކަށް އޭގައި އެކުލެވޭ އެއްޗެއްކަން އެނގޭ ހެއްޔެވެ؟ ފިޔާ ކޮށާއިރު، އޭގައި ހުންނަ ސަލްފާގެ މާއްދާތަކާއި އެންޒައިމްތައް ވައިގެ ތެރެއަށް ބޭރުވެއެވެ. މި މާއްދާތައް އެކުވުމުން އުފެދޭ ގޭހުގެ ސަބަބުން ލޮލަށް އުނދަގޫވެ، އެކަމުގެ ދިފާޢުގައި ލޮލުން ފެން އުފައްދައެވެ.
ލޮލުން ފެން އައުމަކީ ލޮލަށް އުނދަގޫކުރާ މާއްދާތައް ދޮވެލުމަށް އެހީތެރިވެދޭ ކަމެއް ނަމަވެސް، އޭގެ ސަބަބުން ފެނުން ކުޑަކޮށް ފުސްވެއެވެ. ތޫނު ވަޅިއެއް ބޭނުންކޮށްގެން އެއްޗެހި ކޮށާއިރު މިއީ ނުރައްކާތެރިވެދާނެ ކަމެކެވެ. ނަމަވެސް މިފަދަ ކަންކަމުން ރައްކާތެރިކަން ހޯދުމަށް ކުރެވިދާނެ ބައެއް ކަންތައްތައް އެބަހުއްޓެވެ.
ފިޔާ ކޮށާއިރު ބޭނުންކުރުމަށް ޚާއްޞަ އައިނު (onion goggles) ބޭނުންކޮށްގެން މީހަކު ފިޔާ ކޮށަނީ--ފޮޓޯ/ގޫގްލް
އެގޮތުން ކުރެވިދާނެ ބައެއް ކަންކަމުގެތެރޭ ފިޔާ ކޮށާއިރު މަސައްކަތްކުރާ ސަރަޙައްދުގެ ކުޑަދޮރުތައް ހުޅުވާލުން ނުވަތަ ބަދިގޭގައި ހުންނަ ފަންކާ ނުވަތަ އުނދުނުގެ ހޫޑް ޖެއްސިދާނެއެވެ. މީގެ ސަބަބުން ފިޔާ ކޮށާއިރު ބޭރުވާ ގޭސްތައް ދުރަށް ޖައްސައިދީ، ލޮލަށް ކުރާ އުނދަގޫ ކުޑަކޮށްދޭނެއެވެ.
ފިޔަލުގައި ހުންނަ އުނދަގޫކުރާ މާއްދާތައް ހޫނުވައިގެ ތެރޭގައި މާ ފަސޭހައިން ދަތުރުކުރެއެވެ. އެހެންކަމުން، ފިޔާ ކޮށަން ފެށުމުގެ ކުރިން ކުޑަވަގުތުކޮޅަކަށް ފިޔާތައް އައިސްއަލަމާރިއަށް ނުވަތަ ފްރީޒަރަށްލާ ފިނިކޮށްލުމުން، އެ މާއްދާތައް ވައިގެ ތެރެއަށް ފެތުރޭ މިންވަރު މަދުކޮށްލަދޭނެއެވެ.
ފިޔާ ކޮށާއިރު ބޭނުންކުރުމަށް ޚާއްޞަ އައިނު (onion goggles) ވެސް ހުރެއެވެ. މިއީ ގިނަ ބަޔަކަށް ވަރަށް ފައިދާހުރި އެއްޗެކެވެ. ބަދިގެ ސާމާނު ވިއްކާ ބައެއް ފިހާރަތަކުން މިފަދަ އައިނު ލިބެން ހުންނާނެއެވެ.
ފިޔާ މަދުން ބޭނުންކުރާ މީހުންނަށް ފިޔާ ދިލައިން ސަލާމަތްވުމަށް ކުރެވިދާނެ އެހެން ކަމެއްވެސް އެބައޮތެވެ. އެއީ އާއްމުކޮށް ތިޔަ ގަންނަ ފިޔަލުގެ ބަދަލުގައި "ސްޕްރިންގް އަނިއަން" ބޭނުންކުރުމެވެ. ސްޕްރިންގް އަނިއަން އަކީ ހިއްކާފައި ހުންނަ އެއްޗަކަށް ނުވާތީ، އޭގެ ސަބަބުން ލޮލުން ފެން އައުން ކުޑަވާނެއެވެ. އަދި "ވިޑާލިއާ" ފަދަ ފޮނި ރަހަ ހުންނަ ފިޔަލުގެ ބާވަތްތަކުން ވެސް ކުރާ އުނދަގޫ ކުޑައެވެ.