އިނގިރޭސި ޕްރިމިއާ ލީގުގައި ރޭ ނިއުކާސަލް ޔުނައިޓެޑް އަތުން މެންޗެސްޓަރ ޔުނައިޓެޑް ބަލިވީ ނުކުޅެވިގެން ކަމަށް ގަބޫލުކުރާ ކަމަށާއި ދެއްކޭނެ ބަހަނާއެއް ނެތްކަމަށް ޔުނައިޓެޑުގެ ކޯޗު މައިކަލް ކެރިކް ބުނެފިއެވެ.
ނިއުކާސަލް ޔުނައިޓެޑްގެ ސެއިންޓް ޖޭމްސް ޕާކުގައި ފަންސާސް ދެ ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުން ޔުނައިޓެޑު ބަލިވީ 2-1 ގެ ނަތީޖާއަކުންނެވެ.
މެޗަށްފަހު ވާހަކަދައްކަމުން ކެރިކް ބުނީ މެޗު އޮތީ ޔުނައިޓެޑުގެ އަތްމަތީގައި ކަމަށާއި ނަމަވެސް މޮޅަށް ކުޅެ ނަތީޖާ ނެރުނީ ނިއުކާސަލް ކަމަށެވެ. އަދި ކުޅުންތެރިންގެ ފަރާތުން އުންމީދުކުރި ކުޅުމެއް މި މެޗުގައި ނުފެންނަކަމަށްވެސް ބުންޏެވެ.
"އަހަރެމެންނަށް ރަނގަޅަށް ނުކުޅެވުނު، އަހަރެމެންނަށް ބަހަނާއެއް ނުދެއްކޭނެ." ކެރިކް ބުންޏެވެ.
މެޗުގެ ފުރަތަމަ ހާފުގެ އިތުރު ވަގުތުގެ ފުރަތަމަ މިނިޓުގައި ނިއުކާސަލްގެ ޖެކޮބް ރަމްސޭއަށް ދެވަނަ ރީނދޫ ކާޑަކާއިއެކު ރަތް ކާޑު ދައްކާ ދަނޑުން ފޮނުވާލުމާއި ގުޅިގެން އެ ކްލަބުން ދެވަނަ ހާފް ކުޅެފައިވަނީ އެއް ކުޅުންތެރިއަކު މަދުކޮށެވެ.
އެއް ކުޅުންތެރިއަކު މަދުން ކުޅެން ޖެހުނުތާ މާގިނައިރުތަކެއް ނުވަނީސް ލިބުނު ޕެނަލްޓީއަކުން ނިއުކާސަލުން ލީޑުނެގި ލަނޑު ޖަހައިދިނީ އެންތޮނީ ގޯޑަންއެވެ.
މި ލަނޑުޖެހިތާ މާގިނައިރުތަކެއް ނުވަނީސް ސެމީރޯ ވަނީ ލަނޑެއް ޖަހާ މެޗުގެ ނަތީޖާ ޔުނައިޓެޑަށް އެއްވަރުކޮށްފައެވެ.
މެޗުން ނިއުކާސަލް ޔުނައިޓެޑް ތިން ޕޮއިންޓް ކަށަވަރުކޮށްދިން ލަނޑު ޖެހީ ބަދަލު ކުޅުންތެރިއެއްގެ ގޮތުގައި ކުޅެން އެރި ވިލިއަމް އޮސޫލާއެވެ. މިއީ މެޗުގެ 90 ވަނަ މިނިޓުގައި އޭނާ ކާމިޔާބުކޮށްދިން ލަނޑެކެވެ.
މި މޮޅާއެކު ނިއުކާސަލް ވަނީ ތާވަލުގެ 12 ވަނަ މަގާމަށް ޖެހިލާފައެވެ. އެއީ ކުޅުނު 29 މެޗުން ލިބިފައިވާ 39 ޕޮއިންޓާއެކު އެވެ. ޔުނައިޓެޑު ތިންވަނައިގައި އޮތީ 51 ޕޮއިންޓާއެކުއެވެ.