ސްރީ ލަންކާގެ ކަނޑުގެ ސަރައްހައްދާ ކައިރިއަށް ފެތުނު އީރާނުގެ ހަނގުރާމަ މަތީ މަނަވަރު ފައްތާލީ އެމެރިކާގެ ސަބްމެރިންއަކުން ދިން ޓޯޕިޑޯ ހަމަލާއެއްގައި ކަމަށް އެ ގައުމުގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވެއްޖެއެވެ.
ހެގްސެތް ވަނީ އެ ހަމަލާގެ ވީޑިއޯއެއް ވެސް އާންމުކޮށްފައެވެ.
ބުދަ ދުވަހު ބޭއްވި ޕެންޓަގަންގެ ނޫސްވެރިންގެ ބައްދަލުވުމުގައި ހެގްސެތު ވިދާޅުވީ އީރާނުގެ ހަނގުރާމަ މަތީ މަނަވަރަށް ދިން ހަމަލާއަކީ ދެވަނަ ބޮޑު ހަނގުރާމައަށް ފަހު ދުޝްމަނަކަށް ދިން މިފަދަ ފުރަތަމަ ހަމަލާ ކަމަށެވެ.
ލަންކާގެ ކަނޑުގެ ސިފައިން ބުނީ އީރާނުގެ މަނަވަރު، 'އައިރިސް ޑެނާ'އިން 32 މީހުން ސަލާމަތްކޮށްފައިވާ ކަމަށާއި އިތުރު 148 މީހުން ގެއްލިފައިވާ ކަމަށެވެ. ނަމަވެސް ގެއްލުނު މީހުންގެ ތެރެއިން މިހާތަނަށް 87 މީހުންގެ ހަށިގަނޑު ފެނިފައިވާ ކަމަށް ވެސް ސިފައިން ބުނެފައިވެއެވެ.
ލަންކާގެ ދެކުނުގެ ގައްލޭގެ ގާތްގަނޑަކަށް 40 ނޯޓިކަލް މޭލު (75 ކިލޯމީޓަރު) ދުރުގައި އޮތް ފްރިގޭޓް އައިރިސް ޑެނާއިން އެހީއަށް އެދުނީ އިއްޔެ ހެނދުނު ހަޔަކާއި ހެނދުނު ހަތަކާ ދެމެދުގެ ވަގުތެއްގައެެވެ.
އެ ބޯޓުގައި ގާތްގަނޑަކަށް 180 ފަޅުވެރިން ތިބިއިރު، މީހުން ހޯދުމުގެ މަސައްކަތް ކުރިއަށްދާ ކަމަށް ލަންކާގެ އޮފިޝަލުން ބުނެއެވެ.
އައިރިސް ޑޭނާއަކީ މިދިޔަ މަހު އިންޑިއާގައި އޮތް، އެކި ގައުމުތަކުން ބައިވެރިވި މިލާން-2026 ނޭވަލް އެކްސަސައިޒްގައި ބައިވެރިވުމަށް ފަހު އެނބުރި ދިޔަ މަނަވަރެކެވެ.
މަނަވަރު އަޑިއަށް ގޮސްފައި ވަނީ އެމެރިކާއާއި އިސްރާއީލު ގުޅިގެން އީރާނަށް ދޭ ހަމަލާތަކަށް ފަސް ދުވަސްވެފައިވަނިކޮށެވެ.
ހަމަލާތަކަށް ރައްދުދީ އީރާނުން އަންނަނީ މެދުއިރުމަތީގެ ގައުމުތަކުގައި ހުރި އިސްރާއީލާއި އެމެރިކާއާއި ގުޅުންހުރި ތަންތަނަށް ހަމަލާ ދެމުންނެވެެ.