ގޫގުލް ޕްލޭ ސްޓޯރު މެދުވެރިކޮށް ކުރާ މުއާމަލާތްތަކުން ގޫގުލްއިން ނަގަމުން އައި 30 އިންސައްތައިގެ ކޮމިޝަން ފީ ނެގުން ހުއްޓާލައި، އެންޑްރޮއިޑް ފޯނުތަކުގައި ތިންވަނަ ފަރާތްތަކުގެ އެޕް ސްޓޯރުތައް ބޭނުންކުރުމުގެ ފުރުސަތު ފުޅާކުރުމަށް އެ ކުންފުނިން ނިންމައިފިއެވެ.
މި ބަދަލަކީ މަޝްހޫރު ގޭމް ޑިވެލޮޕަރު "އެޕިކް ގޭމްސް" އާއެކު ވެވުނު ސުލްހައިގެ އެއްބަސްވުމެއްގެ ދަށުން ގެނައި ބަދަލެކެވެ. މީގެ ކުރިން ގޫގުލްއިން ކޮންމެ އިން-އެޕް ޕާޗޭސްއަކުން 30 އިންސައްތަ ނެގި ނަމަވެސް، އާ އުސޫލުގެ ދަށުން މި ފީ 20 އިންސައްތަ ނުވަތަ 15 އިންސައްތައަށް ކުޑަވާނެއެވެ. އަދި ސަބްސްކްރިޕްޝަންތަކުން ނަގާ ފީ 10 އިންސައްތައަށް ވަނީ ދަށްކޮށްފައެވެ.
މީގެ އިތުރުން، ޑިވެލޮޕަރުންނަށް ގޫގުލްގެ ބިލިންގް ސިސްޓަމްގެ ބަދަލުގައި އަމިއްލަ ބިލިންގް ސިސްޓަމްތައް ބޭނުންކުރުމުގެ އިޚްތިޔާރުވެސް މިހާރު ވަނީ ދީފައެވެ. މިގޮތަށް އަމިއްލަ ސިސްޓަމް ބޭނުންކުރާނަމަ ގޫގުލްއަށް ދައްކަންޖެހޭނީ އެންމެ 5 އިންސައްތައިގެ ފީއެކެވެ.
މި ބަދަލާ ގުޅިގެން އެޕިކް ގޭމްސްގެ ސީއީއޯ ޓިމް ސުވީނީ ވިދާޅުވީ، ދުނިޔޭގެ ހުރިހާ ހިސާބެއްގައިވެސް ގޫގުލް ޕްލޭ ސްޓޯރު މެދުވެރިކޮށް "ފޯޓްނައިޓް" ގޭމް އަލުން ލިބެން ހުންނާނެ ކަމަށެވެ.
ގޫގުލް އެކޭ އެއްގޮތަށް އެޕަލްގެ އެޕްސްޓޯރުން ވެސް މިދިޔައަހަރު ވަނީ ލުއިތަކެއް ދީފައި ---
ގޫގުލްއިން ވަނީ "ރެޖިސްޓާޑް އެޕް ސްޓޯރް"ގެ ނަމުގައި އާ ޕްރޮގްރާމެއްވެސް ތައާރަފުކޮށްފައެވެ. މި ޕްރޮގްރާމްގެ ދަށުން ފެންވަރު ހިފެހެއްޓޭ އެހެން އެޕް ސްޓޯރުތަކަށް އެންޑްރޮއިޑް ފޯނުތަކުގައި ފަސޭހަކަމާއެކު މަސައްކަތްކުރުމުގެ ފުރުސަތު ލިބިގެންދާނެއެވެ.
މި އާ ބަދަލުތައް އެމެރިކާ، އިނގިރޭސިވިލާތް އަދި ޔޫރަޕްގެ ގައުމުތަކަށް 2026 ޖޫން 30 ގެ ކުރިން ތައާރަފުކުރާނެއެވެ. އަދި 2027 ސެޕްޓެމްބަރު މަހާ ހަމައަށް މުޅި ދުނިޔެއަށް މި ބަދަލުތައް އާންމުވާނެ ކަމަށް ގޫގުލްއިން މައުލޫމާތުދެއެވެ.
މިއީ އެޕަލް އާއި ގޫގުލް ފަދަ ބޮޑެތި ކުންފުނިތަކުން އެޕް ސްޓޯރުތަކުގައި ގެންގުޅޭ މޮނޮޕޮލީ ނުވަތަ ބާރުވެރިކަން ކުޑަކުރުމަށް ކުރެވޭ މަސައްކަތްތަކަށް ލިބުނު ބޮޑު ކުރިއެރުމެއްގެ ގޮތުގައި ފާހަގަކުރެވެއެވެ.
ގޫގުލްއެކޭ އެއްގޮތަށް، އެޕަލް ކުންފުނިންވެސް ވަނީ މިދިޔަ 2025 ވަނަ އަހަރު އެޕް ސްޓޯރުގެ ފީތަކަށް ބޮޑެތި ލުއިތަކެއް ދީފައެވެ. އެޕިކް ގޭމްސްއާ އެކު ކުރެވުނު ގާނޫނީ މަޝްވަރާތަކަށްފަހު، އެޕަލްއިން ވަނީ އެޕްތަކުގެ ތެރެއިން އަމިއްލަ ވެބްސައިޓްތަކަށް ލިންކުކޮށްގެން ފައިސާ ދެއްކޭނެ ގޮތް ހަމަޖައްސައިދީފައެވެ.
މީގެ ސަބަބުން މިދިޔަ އަހަރުގެ މެއި މަހު މަޝްހޫރު 'ފޯޓްނައިޓް' ގޭމް އަލުން އެޕަލްގެ އެޕް ސްޓޯރަށް އައިސްފައިވާއިރު، މި ބަދަލުތަކަކީ ޓެކްނޮލޮޖީގެ ދާއިރާގައި އެޕް އުފައްދާ ފަރާތްތަކުގެ ބާރުވެރިކަން އިތުރުވެ، ބޮޑެތި ކުންފުނިތަކުގެ ނުފޫޒު ކުޑަވަމުންދާކަމުގެ ހެއްކެކެވެ.