ރޯދަމަހަކީ ރޫޙާނީގޮތުން އަމިއްލަ ނަފްސު އިޞްލާޙުކޮށް، އަޅުކަމާއި ކެތްތެރިކަން ދަސްކޮށްދޭ ބަރަކާތްތެރި މައްސަރެކެވެ. ނަމަވެސް، ގިނަ ބަޔަކަށް ރޯދަވީއްލާ ގަޑީގައާއި ހާރުގަޑީގައި ފޮނި އެއްޗެހި ކެއުމަށް ނުވަތަ ހަކުރު ގިނަ ތަކެއްޗަށް ބޮޑު ޝައުގުވެރިކަމެއް އުފެދެއެވެ.
ފޮނި ކެއުންތަކާ ދުރުވާން މަސައްކަތްކުރި ނަމަވެސް އެގޮތަށް އެކަން ކުރަން އުނދަގޫވާ ސަބަބުތައް އެނގެން ކޮންމެ މީހަކުވެސް ބޭނުންވެއެވެ. ފަކީހު ޔުނިވާސިޓީ ހޮސްޕިޓަލުގެ ނިއުޓްރިޝަން އެންޑް ޑައެޓިކްސް ސްޕެޝަލިސްޓް، ރޭޝްމާ ދޭވްޖާނީ މިކަމުގެ ސައިންޓިފިކް ސަބަބުތަކާއި، ސިއްހަތަށް ފައިދާހުރި ގޮތުގައި ރޯދަ ހިފުމަށްޓަކައި މިފަދަ ކަންކަން މެނޭޖްކުރާނެ ގޮތްތައް ވަނީ ތަފްސީލުކޮށްދެއްވާފައެވެ.
ގިނަ ވަގުތު ރޯދައަށް ހުރުމުން، ހަށިގަނޑުގައި ރައްކާކުރެވިފައިވާ ގްލައިކޯޖަން (ފުރަމޭގައި ހުންނަ ކާބޯހައިޑްރޭޓްސް) ހުސްވެއެވެ. ސިކުނޑިއަށް ބޭނުންވާ މައިގަނޑު ހަކަތައަކީ ގުލްކޯޒް ކަމަށް ވުމުން، ހަށިގަނޑުން އަވަސް ހަކަތައަށް އެދެން ފަށައެވެ. މީގެ ނަތީޖާއެއްގެ ގޮތުން ރޯދަވީއްލާ ގަޑީގައި ފޮނި އެއްޗެއްސާއި ހަކުރު ގިނަ ބުއިންތަކަށް ބުއިމަށް ބޭނުންވެއެވެ.
ރޯދަމަހު ކެއުމުގައި ހިމަނާ ފޮނި ކެއުންތަކާއި ބުއިންތަކަކީ ގުދުރަތީ ހަކުރުގެ މާއްދާ އޭގައި އެކުލެވޭ ބާވަތަކަށް ހެދުމަށް ސަމާލުކަން ދިނުން މުހިއްމު ކަމަށް ސިއްހީ މާހިރުން ލަފާދެއްވާ--ފޮޓޯ/ގޫގްލް
ރޯދައަށް ހުންނަ ވަގުތު ދިގުވިވަރަކަށް، ހަށިގަނޑަށް އަވަހަށް ހަކަތަ ލިބޭނެ ފޮނި އެއްޗެއްސާއި ޖޫސް ފަދަ ތަކެއްޗަށް އޮންނަ ބޭނުންތެރިކަން އިތުރުވެއެވެ. މިއީ އާދައިގެ ކަމެއްހެން ހީވި ނަމަވެސް، މާ ގިނައިން ހަކުރު ބޭނުން ކުރުމަކީ ލޭގައި ހަކުރު ހުންނަ މިންވަރު ކުއްލިއަކަށް މަތިވެ، އަނެއްކާވެސް ވަރުބަލިކަން އިހުސާސްވާނެ ކަމެކެވެ.
ރޯދަމަހު ހަކުރު ބޭނުންކުރުމުން ހަށިގަނޑަށް ކުރާ އަސަރުތަކުގެތެރޭގައި، ލޭގައި ހަކުރު ހުންނަ މިންވަރު ކުއްލިއަކަށް މަތިވެފައި ތިރިވުން، ކާހިތްވުން އިތުރުވެ، ސިއްހަތަށް ގެއްލުންހުރި ތަކެތި ގިނައިން ކެވުން، ބަރުދަން އިތުރުވުމާއި ހަޖަމުކުރުމުގެ މައްސަލަތައް ދިމާވުން، އިންސިއުލިންގެ މިންވަރަށް ބަދަލު އައިސް ހަށިގަނޑުގެ މެޓަބޮލިޒަމަށް އެކަމުގެ ނޭދެވޭ އަސަރުކުރުން ހިމެނެއެވެ.
އެހެންކަމުން، ރޭގަނޑުގެ ވަގުތުތަކުގައި ހަކަތަ އެއްވަރެއްގައި ހިފެހެއްޓުމަށްޓަކައި ހަމަހަމަ ކެއުމެއް އިޚްތިޔާރުކުރުމާއި ހަކުރު ކޮންޓްރޯލްކުރުން މުހިންމެވެ.
ރޯދަމަހު ފޮނި އެއްޗެހި ކާހިތްވާ މިންވަރު މަދުކުރުމަށް ކުރެވިދާނެ ކަންތައްތަކުގެތެރޭ، ގުދުރަތީ ގޮތުން ހަކުރުގެ މާއްދާ އެކުލެވިފައިވާ ކެއުންތަކާއި ބުއިންތަކުން ރޯދަވީއްލުމަށް އިސްކަން ދެވިދާނެއެވެ. އެގޮތުން ކަދުރު، ތާޒާ މޭވާ އަދި ޕްލެއިން ޔޯގަޓް ބޭނުންކޮށްގެން ތައްޔާރުކޮށްފައި ސްމޫތީ ފަދަ ބުއިންތައް ބޭނުންކުރުމަށް އިސްކަން ދެވިދާނެއެވެ.
މީގެއިތުރުން ރޯދަވީއްލުމަށްފަހު ހާރުކެއުމާ ހަމައަށް ހަމަހަމަ ކެއުމެއް ބޭނުންކުރުމަށް އިސްކަން ދެވިދާނެއެވެ. އޭގެތެރޭގައި ނިއުޓްރިއެންޓްސްގެ މާއްދާތައް ގިނަ ކެއުންތައް ހިމެނުމަކީ ހަށިގަނޑަށް ބޭނުންވާ ހަކަތަ ލިބިދިނުމަށް އެހީތެރިވެދޭނެ ކަމެކެވެ.