އެޕަލް ކުންފުނިން އަލަށް ނެރުމަށް ތައްޔާރުވަމުންދާ އެންމެ އަގުހެޔޮ ލެޕްޓޮޕް "މެކްބުކް ނިއޯ" ގެ މައުލޫމާތު، އެ ކުންފުނީގެ ޔޫރަޕްގެ ރެގިއުލޭޓަރީ ވެބްސައިޓުން އޮޅުމަކުން ލީކުވެއްޖެއެވެ.
މެކްރޫމާސް އިން ރިޕޯޓްކޮށްފައިވާ ގޮތުގައި މި މައުލޫމާތު ފެނިފައިވަނީ އެޕަލްގެ ވެބްސައިޓުގެ 2026 ވަނަ އަހަރުގެ އުފެއްދުންތަކުގެ ބައިގައި "އޭ3404" މޮޑެލް ނަންބަރާއެކުއެވެ. މި އުފެއްދުމުގެ ނަން ފެނިފައިވަނީ ވެބްސައިޓުގެ ޔޫ.އާރު.އެލް އިން ކަމަށްވާއިރު، އެޕަލް އިން މިހާރު ވަނީ އެ ލިންކު ވެބްސައިޓުން ނަގާފައެވެ.
ބައެއް ރިޕޯޓްތައް ބުނާގޮތުގައި އެޕަލް އިން މި އައު ލެޕްޓޮޕް މި ހަފްތާގައި ނިއުސްރޫމް މެދުވެރިކޮށް އިއުލާން ކުރާނެއެވެ. އަދި މިކަމާ ގުޅޭ މީޑިއާ ބްރީފިންގްތައް ނިއުޔޯކް، ލަންޑަން އަދި ޝަންހާއީގައި ބޭއްވުމަށް ވެސް އެ ކުންފުނިން ދަނީ ތައްޔާރުވަމުންނެވެ.
މެކްބުކް އެއާ އަށް ވުރެ ދަށް ފެންވަރެއްގައި އަދި އަގުހެޔޮކޮށް ފަރުމާކޮށްފައިވާ މި ލެޕްޓޮޕްގައި ބޭނުންކުރާނީ އެމް-ސީރީޒް ޗިޕްގެ ބަދަލުގައި އައިފޯނުގައި ބޭނުންކުރާ ފަދަ އޭ-ސީރީޒް (އޭ18 ޕްރޯ ނުވަތަ އޭ19 ޕްރޯ) ޗިޕެކެވެ. މިއީ މެކް ކޮމްޕިއުޓަރެއްގައި މިފަދަ ޗިޕެއް ބޭނުންކުރާ ފުރަތަމަ ފަހަރަށް ވެދާނެއެވެ.
މެކްބުކް ނިއޯ ބާޒާރަށް ނެރޭނެ ކަމަށް ބެލެވެނީ ނޫ، ފެހި، ރީނދޫ އަދި ފިޔާތޮށި ކުލައިގައި ----
މި ލެޕްޓޮޕްގައި ހިމެނޭނީ 12.9 އިންޗީގެ ސްކްރީނެކެވެ. ނަމަވެސް އަގު ހެޔޮކުރުމުގެ ގޮތުން "ޓްރޫ ޓޯން" އާއި "ޕީ3 ވައިޑް ކަލާ" ފަދަ ފީޗާތައް މި ލެޕްޓޮޕަކުން ނުފެންނާނެ ކަމަށާއި، ސްކްރީންގެ އަލިގަދަކަން ވެސް މެކްބުކް އެއާ އަށް ވުރެ ދަށްވާނެ ކަމަށް މައުލޫމާތު ލިބެއެވެ.
މީގެ އިތުރުން ވެސް އަގު ހެޔޮކުރުމަށްޓަކައި ބައެއް ފީޗާތައް އުނިކޮށްފައިވެއެވެ. އޭގެ ތެރޭގައި ކީބޯޑުގައި ބެކްލައިޓް ނުހުރުމާއި، އެސް.އެސް.އީ ސްޓޯރޭޖްގެ ސްޕީޑް ލަސްވުމުގެ އިތުރުން ފާސްޓް ޗާޖިންގް ސަޕޯޓް ނުކުރުން ހިމެނެއެވެ. އަދި ހައި-އިމްޕީޑެންސް ހެޑްފޯން ސަޕޯޓް ވެސް މީގައި ނުހުންނާނެ ކަމަށް ބެލެވެއެވެ.
ކަނެކްޓިވިޓީގެ ގޮތުން ބަލާއިރު، މި ލެޕްޓޮޕްގައި ދެ ޔޫ.އެސް.ބީ-ސީ ޕޯޓާއި، މެގްސޭފް ޗާޖިންގ ޕޯޓް ހިމެނޭނެއެވެ. އަދި އެޕަލްގެ އަމިއްލަ ޗިޕްގެ ބަދަލުގައި މީޑިއާޓެކް ޗިޕެއް ބޭނުންކޮށްގެން ވައިފައި 7 ސަޕޯޓް ކުރާނެ ކަމަށް ވެސް ރިޕޯޓްތައް ބުނެއެވެ.
މެކްބުކް ނިއޯ ބާޒާރަށް ނެރޭނެ ކަމަށް ބެލެވެނީ ނޫ، ފެހި، ރީނދޫ އަދި ފިޔާތޮށި ކުލައިގައެވެ. ސްޓޯރޭޖްގެ ގޮތުގައި 256ޖީބީ އަދި 512ޖީބީ ގެ މޮޑެލްތައް ހުންނާނެއެވެ. އަދި ކިޔަވާ ކުދިންނަށް ޚާއްސަކޮށް 128ޖީބީ ގެ މޮޑެލްއެއް ވެސް ތައާރަފްކުރާނެ ކަމަށް ބެލެވެއެވެ.
މި ލެޕްޓޮޕްގެ އަގު އުޅޭނެ ކަމަށް ލަފާކުރެވެނީ 599 ޑޮލަރާއި 799 ޑޮލަރާ ދެމެދުގައެވެ. މި އަގުގައި ނެރެފިނަމަ މިއީ އެޕަލްގެ މެކް ލައިންއަޕްގައި ހިމެނޭނެ އެންމެ އަގުހެޔޮ ލެޕްޓޮޕަށް ވެގެންދާނެއެވެ.