ރަމަޟާން މަސް ނޫނަސް ދިވެހީންގެތެރޭ ހަދާ ވަރަށް މީރު ފޮނި ހެދިކާގެ ބާވަތެއް ކަމަށްވާ 'ކެރަމަލް ފޮޅި' އަކީ އަނގަޔަށް މީރު ނަމަވެސް އެ ތައްޔާރު ކުރުމަށް ވަރަށް ވަގުތު ނަގާ އެއްޗެކެވެ.
ކެރަމަލް ފޮޅި އަކީ މަދު ބާވަތްތަކެއް ބޭނުންކޮށްގެން ތައްޔާރުކުރާ ހެދިކާއަކަށްވީ ނަމަވެސް އެއީ ވަރަށް ފަރުވާތެރިކަމާ އެކު ކުރަންޖެހޭ މަސައްކަތެކެވެ. އެކަމަށް އެންމެ ގިނަ ވަގުތު ހޭދަވަނީ ވެސް އެ ސަބަބާ ހެދިއެވެ. އެހެންވެ ކެރަމަލް ފޮޅި އެޅުމަކީ ވަރަށް ކެތްތެރި މީހަކަށް ނޫނީ ނުވާނެ މަސައްކަތެއްގެ ގޮތުގައި ވެސް ގިނަ ބަޔަކު އެކަން ސިފަކުރެއެވެ.
ރީތި ސައިޒަކަށް ވަށްކޮށް، ތުނިކޮށް ކެރަމަލް ފޮޅި އެޅޭނީ އެކަމުގެ ތަޖުރިބާ އާއި ހުނަރު ހުރި އެ މަސައްކަތް ކުރުމުގައި ހޭދަކުރާ ވަގުތު ދެނެގަނެ ރުންކުރުކަމެއް ނެތި އެކަން ކުރެވޭނެ މީހުންނަށް ކަމަށް ވެސް ގިނަ ބަޔަކު ގަބޫލުކުރެއެވެ. އެހެންވެ ކެރަމަލް ފޮޅި އެޅުމާ ހަވާލުވުމަކީ ކޮންމެ ކޮންމެ މީހަކު އެހާ ބޭނުންވާ ކަމަކަށްވެސް ގިނަފަހަރަށް އޮންނަނީ ނުވެފައެވެ.
ކެރަމަލް ފޮޅި: ތައްޔާރުކުރަން ބައެއް މީހުންނަށް އުނދަގޫވި ނަމަވެސް މިއީ އެއްބަޔަކު ފަސޭހަކަމާއެކު ތައްޔާރުކޮށްލާ ބާވަތެއް--ފޮޓޯ/ފޭސްބުކް
"ރަމަޟާން މަހު ކެރަމަލް ފޮޅި މީ ކޮންމެހެންވެސް ތައްޔާރުކުރަންޖެހޭ ހެދިކާގެ ބާވަތެއް، އެކަމަކު އެކަމުގައި ހޭދަވާ ވަގުތު ދިގުވެ ބައެއްފަހަރު ތައްޔާރުކުރަންޖެހޭ އަދަދު ގިނަވާތީ އެކަން ވަނީ ބުރަ ކަމަކަށް" އުމުރުން 40 އަހަރުގެ އަންހެނަކު ބުނެފައިވެއެވެ.
"މީ ވަރަށް ކެތްތެރިކަމާ އެކު އުނދުން ކައިރީ ކޮޅަށް ހުރެގެން ކުރެވޭނެ ކަމެއް. އެހެންވެ އާއިލާގެ މެމްބަރުން ގާތު ބުނެފަ އޮންނާނީ، ރަމަޟާން މަހު ކެރަމަލް ފޮޅި ތައްޔާރުކޮށްލެވޭނީ އެއް ދުވަހު އޭ" ސަމާސާ ރާގަކަށް ބަދިގޭގައި އަވަދިނެތި އުޅުނު ރަހްމަތްތެރިއަކު ބުންޏެވެ.
ކެރަމަލް ފޮޅިއަކީ ބިސް، ގެރިކިރު، ވެނީލާ އެސެންސް، އަދި ބަޓަރު ނުވަތަ ތެޔޮ ބޭނުންކޮށްގެން ވަރަށް ފަސޭހަކަމާ އެކު ތައްޔާރުކޮށްލެވޭ ބާވަތެކެވެ. ކެރަމަލް ފޮޅި ތައްޔާރުކުރާއިރު ބައެއް މީހުން ފުށް ވެސް ބޭނުންކުރެއެވެ.
އެއީ ފޮޅި އަޅާއިރު ތަވާގައި ފޮޅިތައް ތަތްލަވަފާނެތީ އެކަމަށް ހައްލެއް ހޯދުމުގެ ގޮތުންނެވެ. ފުށުގެ ބަދަލުގައި ބައެއް މީހުން ޕާން ފޯ ކުރުމަށްފަހު ކެރަމަލް ފޮޅި ބަޓަރުގެ ތެރެއަށް އަޅައިގެން ވެސް ތައްޔާރުކުރެއެވެ.
ކެރަމަލް ފޮޅި އަޅާއިރު ފޮޅިތައް ތަވާގައި ތަތްލެވުނަ ނުދިނުމަށްޓަކައި ކުރެވިދާނެ ކަންތައްތަކުގެތެރޭ ތައްޔާރުކުރި ބެޓަރު މަދުވެގެން 30 މިނެޓު ވަންދެން ސެޓުކުރުމަށް ބެހެއްޓިދާނެއެވެ. ފޮޅި އަޅަން ކޫރުން ނެތް އޮމާން ތަވައެއް ބޭނުންކުރުމުގެ އިތުރުން ކެރަމަލް ފޮޅި ފިހަން ރަބަރު ދޭފަތެއް ބޭނުންކުރެވިދާނެއެވެ.
މީގެއިތުރުން ފޮޅި އަޅާއިރު އުނދުން ވީހާވެސް މަޑު ގިނީގައި ބަހައްޓަން ސަމާލުކަންދޭންވާނެއެވެ. އެހެންނޫނީ އާއިލާގެ މެމްބަރުންނަށް ކާން ލިބޭނީ މާބޮޑަށް އަނދާފައި ހުންނަ ކެރަމަލް ފޮޅިއެވެ.