އެ ލަފުޒު އެފަދަ ގޮތަކަށް ކަންފަތަށް އަޑު އިވުމުން ކެތްކުރަން އުނދަގޫވިއެވެ. މޭގައި ދިލަތަދެއް ވެސް އުފެދިގެން ދިޔައެވެ.
އިސްޖަހައިލުމުގެ ކުރިން ކުޑަ ވަގުތު ކޮޅަކަށް އައިރާއާ ޒަހްރާންގެ ހަތަރު ކަޅި ބައްދަލުވެގެން ދިޔައެވެ. ކިތަންމެ ކުޑަ ސިކުންތުކޮޅަކަށް ނަޒަރު ސީދާވެލި ނަމަވެސް، އައިރާގެ ލޮލަށް ޖަމާވަމުން ދިޔަ ކަރުނަތަކާއި، އެ މޫނުމަތީން ފެނުނު ލަދުވެތިކަން ޒަހްރާންއަށް ރީއްޗަށް ފެނުނެވެ. ތުންފަތުގައި ދަތް އަޅާލި ގޮތާއި، އިޙްސާސްތައް އަމިއްލަ ބާރުގެ ދަށަށް ގެންނަން އައިރާ ކުރަމުން ދިޔަ މަސައްކަތްވެސް މެއެވެ. އަތުގައި އޮތް ކޮތަޅަށް ބާރުކޮށްލިއިރު، އޭނަގެ ނޭވާ ފުންވަމުން ދިޔަކަންވެސް ޒަހްރާނަށް ފަހުމްވިއެވެ. އީލާފްވެސް ޒަހްރާން ބަލަމުން ދިޔަ ދިމާލަށް ބަލައިލިއެވެ. އެއާއެކު އެތަނުގައި ހުރި އައިރާ އީލާފްއަށްވެސް ފެނިއްޖެއެވެ. އޭނަ ޒަހްރާނަށް ބަލައިލިއެވެ. އައިރާއަށް އެ ހުރިހާ އެއްޗެއް އަޑު އިވިއްޖެކަން ޚުދު އީލާފްއަށްވެސް އެނގުނެވެ. އިތުރަށް އެއްވެސް އެއްޗެއް ބުނެގެން ނުވާނެޔޭ ބުނާ ފަދައަކުން ޒަހްރާން ބުމަ އަރުވާލުމަށްފަހު، ލޮލުން އިޝާރާތްކޮށްލަމުން ހިމޭންވާން އީލާފްއަށް އެންގިއެވެ. ލިފްޓް އައުމާއެކު އެ ދެމީހުން ލިފްޓަށް އެރިއެވެ. އައިރާ ހުރި ގޮތަށް ހުރީ އެ ދެމީހުންނާ ކުރިމަތިލާން ބޭނުންނުވާތީއެވެ.
އަޑު އިވޭ ވާހަކަތަކުގެ މައްޗަށް ބުރަވެ ތިބެ، އޭނަގެ މައްޗަށް ޙުކުމްކޮށް ގޮތް ނިންމުމަމީ މިއަދާ ހަމައަށްވެސް ބަދަލުނުވިކަމެކެވެ. ދެރަވީ އީލާފްގެ ފަރާތުން އެފަދަ ގޮތަކަށް އެ ލަފުޒުތައް އަޑު އިވުނީމައެވެ. އޭނަގެ ހަޤީޤަތް އެނގުމުން ލިބުނު ހަމައެކަނި ރަޙްމަތްތެރިޔާވެސް ގެއްލިގެން ދިޔައީއެވެ. މީހުންނާ ގުޅުން ބަދަހިކުރަން އޭނަ ބިރުގަންނަ ސަބަބަކީވެސް އެއީއެވެ. އެކަނިވެރިކަމަށް ލޯބިކުރަނީވެސް ހަމަ އެހެންވެގެންނެވެ. އުފަލަކީ ވަގުތީ އެއްޗަކަށް ވާތީއެވެ. އޭނަގެ ޙަޔާތަށް ކޮންމެ މީހަކުވެސް އަންނަނީ ކުޑަވަގުތުކޮޅެއްގެ މެހެމާނެއްގެ ގޮތުގައެވެ. ދެލޮލުގެ ތެރެއަށް ޖަމާވެފައިހުރި ކަރުނަތައް ކޯތާފަތް މަތިން ރޮނގުދެމިގެން ދިޔައީ ބޭއިޚްތިޔާރުގައެވެ. އަތުގެ ނުފުށުން ކަރުނަތައް ފުހެލަމުން އައިރާ ގޮސް ޖެހިގެން ހުރި ލިފްޓަށް އެރިއެވެ.
އީލާފްއާއެކު ގޮސް އެޕާރޓްމެންޓަށް ވަނުމާއެކު ޒަހްރާން ބުމަ އަރުވައިލަމުން އީލާފްއަށް ބަލައިލީ އޭނައަށް ހުރިހާކަމެއް ކިޔައިދޭށޭ ބުނާފަދައަކުންނެވެ. އެ ވާހަކަތައް އީލާފްއަށް އެނގުނީ އައިރާގެ ފުށުން ނޫންކަން އޭނާއަށް ޔަޤީންވާތީއެވެ. އައިރާގެ މޫނުމަތީން ފެންނަ ހިތްހަކާކުވާ ފަދަ އަސަރުތައް އޭނައަށް އުނދަގޫކުރުވިއެވެ.
"އީލު ކީއްވެ އެހެން ބުނީ؟ ކާކުކައިރިން ތިހުރިހާ އެއްޗެއް އީލުއަށް އެނގުނީ؟" ޒަހްރާނަށް ސުވާލުކޮށްލެވުނެވެ. އީލާފް އިއްޔެގެ ހާދިސާ ޒަހްރާނަށް ކިޔައިދިނެވެ. ބޮލުގައި އަތް ހިންގާލަމުން ފުންނޭވާއެއް ޒަހްރާނަށް ދޫކޮށްލެވުނެވެ. ވިސްނަންވީ ކީކޭކަމެއް އޭނައަކަށް ނޭނގުނެވެ. އެ އިވުނު ވާހަކަތަކުން ހީވީ ސިކުނޑީގެ މަސައްކަތް ކުޑަ ހިނދުކޮޅަކަށް ހުއްޓުނުހެންނެވެ. މީހަކު ގާގަނޑަކުން އޭނަގެ ބޮލުގައި ޖެހިގެންވެސް ހީވިއެވެ.
"އެކަހަލަ މީހުންގެ ދަރިންވެސް އުޅޭނީ އެހެންނެއްނު. އެހެންވެ ވާހަކަ ދައްކަން ބޭނުންނުވީ." އީލާފް އޭނަގެ ސިކުނޑިއަށް ވިސްނުނު ގޮތް ޒަހްރާނާ ހިއްސާކުރިއެވެ.
ޒަހްރާންގެ ސިކުނޑި ކުޑަ ވަގުތުކޮޅަކަށް ކިލަނބުވެގެން ދިޔައީ އީލާފް އެބުނި އެއްޗަކުންނެވެ. އޭނައަށް އައިރާމެން އެޕާރޓްމެންޓަށް ފިރިހެނަކު ވަންނަނިކޮށް ފެނިފައިވެއެވެ. އެހަށް ހިތަށް އެރުމުން ޒަހްރާން ދެފަރާތަށް ބޯ ހޫރައިލިއެވެ. އެގޮތަށް ވިސްނަން ބޭނުންނުވާތީއެވެ. އޭނައަށް އައިރާ އަކީ އެކަހަލަ ކުއްޖެއްކަން ޤަބޫލުނުކުރެވެނީއެވެ. އައިރާގެ ވޭނީ ގިސްލުމުގެ އަޑު އޭނައަށް އިވިފައިވާތީއެވެ. މާޔޫސްކަމާއި ނާއުންމީދާ ގޮސްހުސްވެފައިވާ ފަދަ އަސަރުތައް އޭނައަށް އައިރާގެ މޫނުމަތީން ފެނިފައިވާތީއެވެ. ވީއިރު ހަޤީޤަތް އައިރާގެ ފުށުން އަޑު ނާހާ ގޮތް ނިންމަން ވެދާނެ ހެއްޔެވެ؟
"އެހާ އަވަހަށް މީހުން ޖަޖްކުރާކަށް ނުވާނެ." ޒަހްރާނަށް ބުނެވުނެވެ. އޭނަގެ ހިތާ ސިކުނޑިން އައިރާ ދިފާޢުކުރަނީއެވެ. އައިރާއާ މެދު އޭނަގެ ހިތުގައި ކިލަނބުކަމެއް އުފެދެން ފެށުމުން، އެކަން ވަގުތުން ހުއްޓާލުމަށް ޒަހްރާންގެ ޒަމީރު އޭނައަށް މަޖުބޫރުކުރުވަމުން ދިޔަފަދައެވެ.
"އެކަމުވެސް އީލު ދެން ވާހަކަ ދައްކާހިތް ކެނޑިއްޖެ." އީލާފް ބުނެލިއެވެ. އޭނަ ގޮސް ސޯފާގައި އިށީންތަން ބަލަން އިނދެފައި ޒަހްރާންއަށް ފުންނޭވާއެއް ދޫކޮށްލެވުނެވެ. އެކަމެއް ހިނގާދިޔައިރު އެތަނުގައި ހުރީ އީލާފްކަމުން، އައިރާގެ ދިފާޢުގައި ބުނާނެ އެއްޗެއްވެސް އޭނައަކަށް ނޭނގުނެވެ. ޒަހްރާނަށް ހިމޭންކަން އިޚްތިޔާރުކުރެވުނު ސަބަބަކީވެސް އެއީއެވެ.
"ކިހިނެއްވީ ކުޑަބެ؟ ކީއްވެ އެއްޗެއް ނުބުނީ؟ އައިމީން. އެކަނި އުޅޭނީވެސް އެކަހަލަ ކޮންމެވެސް ކަމެއް ވީމައެއްނު. މޭބީ ޝީއިޒް އޯލްސޯ ނޮޓް ނޯ އިނޮސެންޓް..." އީލާފްއަށް އަނެއްކާވެސް ބުނެވުނެވެ. "ގިނަ ފަހަރަށް އެކަހަލަ މީހުން....."
"އީލު. ސްޓޮޕް އިޓް... ތި ވާހަކަ ނުދައްކަބަ." ޒަހްރާނަށް ބުނެވުނެވެ. އޭނަ އީލާފްގެ ވާހަކަ ހުއްޓުފައިފިއެވެ. ހީވީ އޭނައަށް އުނދަގޫވީހެންނެވެ. އޭރު މުޅި މީހާގެ އެތެރެ ހަށީގައި ވަނީ ވަރުގަދަ ތޫފާނެއް އުފެދިފައެވެ. ހަށިގަނޑުގައިވި އުދާސްކަން ދުރުކޮށްލަން ބޭނުންވެފައިވާ ޙާލު އެންމެފަހުން ޒަހްރާން ދިޔައީ ކޮފީ މެޝިން ކައިރިއަށެވެ. ކޮފީއަކުން ފަހަރުގައި ވާންވެފައިވާ ސިކުނޑީގެ ނާރުތަކަށް ލުޔެއް ލިބިދާނެއެވެ.
"އައިރާ...." ކޮފީ މެޝިން ޖައްސާލަމުން ކެބިނެޓްގައި ލެނގިލަމުން އޭނައަށް ވައިއަޑުން އައިރާގެ ނަން ކިޔައިލެވުނެވެ. ހީވީ އޭނަ އައިރާގެ ގާތުން ހުރިހާ ކަމެއް އޮޅުން ފިލުވަން ބޭނުންވެފައިވާހެންނެވެ. އީލާފް އެ ދައްކާ ވާހަކަތަކުގައި ކޮންމެވެސް ވަރެއްގެ ތެދެއް ވާކަން އޭނައަށް ވެސް އެނގެއެވެ. އައިރާގެ މޫނުމަތީން ދެންމެ ފެނުނު އަސަރުތަކާއި ލަދުވެތިކަން އެކަމަށް ހެކި ދިންނަމަވެސް، އައިރާއަކީ އެކަހަލަ ގޮތެއް ނެތް އަންހެން ކުއްޖެއްކަން ޤަބޫލުކުރަން އޭނަ ބޭނުންނުވަނީއެވެ. އައިރާގެ މާޒީ އެނގެން ޒަހްރާން ބޭނުންވާން ފެށިއެވެ. އެ ދިރިއުޅުމުގައި ހިނގާފައިވަނީ ކޮން ކަންތައްތަކެއް ހެއްޔެވެ؟ އެކަނި އުޅެނީ ކީއްވެހެއްޔެވެ؟ ރިހާމްއަކީ ކާކުހެއްޔެވެ؟ އައިރާގެ އެޕާރޓްމެންޓަށް ވަތް ޒުވާނަކީ ކާކުހެއްޔެވެ؟ ހައްތަހާވެސް ސުވާލެވެ.
"ޑޫ އައި ހޭވް ދި ރައިޓް ޓު ޖަޖްހާ ބޭސްޑް އަޕޮން ވަޓް އައި ހާރޑް؟" ޒަހްރާނަށް ސުވާލުކޮށްލެވުނީ އަމިއްލަ ނަފްސާއެވެ. ކޮފީ ރެޑީވުމުން މެޝިނުގެ އަޑު އިވުނެވެ. ޖޯޑު ނަގަމުން ޒަހްރާން އެ ހިފައިގެން ގޮސް ސޯފާގައި އިށީނދެ އެތި ފޮދެއް ބޮއިލިއެވެ.
*****
ރޭގަނޑުގެ ކެއުމުގެ ވަގުތެވެ. "މޭޕަލްވިލާ" ގޭގެ ސުފުރާމަތި ފަޅުފިލުވާލާފައިވަނީ ތަފާތު ވައްތަރުގެ ކާއެއްޗެހިންނެވެ. މޭޒުދޮށުގައި ތިބީ މުރާދުގެ އިތުރުން އަޔާޝްއާއި، ބަސްމާއެވެ. މިރޭވެސް އީލާފް ނެތެވެ. އޭނަވީ ޒަހްރާންމެން ގޭގައެވެ.
"ރެން އައި ފަހުން އީލު އަބަދު އެކޮޅުގަ ދޯ އުޅެނީ.." މުރާދު ބުނެލިއެވެ. އީލާފްއާއި ޒަހްރާނާ އަބަދުވެސް ގާތްކަން އޭނައަށް އެނގެއެވެ.
"މިއަދުވެސް ހެދުނު ދިޔަގޮތަށް އަދި ނާދެ." ބަސްމާ ބުނެލިއެވެ.
"ޔަޤީންތަ އޭނަ އަދިވެސް ރެން ކައިރީގަކަން. ރިސޯޓަށް ނުފޮނުވީމަ ކުޑަކޮށް ހިތްހަމަނުޖެހިފަ ހުރީ..." މުރާދު އަނެއްކާވެސް ބަސްމާއަށް ބަލައިލިއެވެ.
"މުރާދުގެ ބަހާ ދެކޮޅު ހަދާފައި އެއްވެސް ކަމެއް ކުރާކަށް އީލުއަކަށް ނުކެރޭނެ. ރުޅިއައިސްވެސް މާ ގިނައިރަކު ހުންނާކަށްވެސް ނޭނގޭނެ." ބަސްމާ ހީނލިއެވެ. އޭނައަށް ވަރަށް ރަނގަޅަށް އީލާފްގެ ގޮތް އެނގެއެވެ.
"ޒަހްރާންގެ އެޕާރޓްމެންޓުގައި ކިތަންމެ އިރަކު ހުއްޓަސް މައްސަލައެއް ނެތޭ. ރައްކާތެރިކަން ކަށަވަރުވާނެތާ އޭރުން." މުރާދު ބުންޏެވެ. އޭނަ އީލާފްއާ މެދު ވަރަށް ވިސްނައެވެ. ޚާއްސަކޮށް އެ އުމުރުގައި ގޯސް މަގަކުން ގޮސްފާނެތީ އެކަމާ މެދު އޭނަ ކަންބޮޑުވެއެވެ. ރާއްޖޭގެ ޙާލަތު ހީނުކުރާހާ ނާޒުކެވެ. ކިތަންމެ ރަނގަަޅަކަށް ތަރުބިއްޔަތުކުރަން މަސައްކަތްކުރި ނަމަވެސް ހައްޤުގެ މަގުން ކަސިޔާރުވެގެންދާ ޒުވާނުން ބައިވަރެވެ. ބައެއްފަހަރު ދިމާވާ ރަޙްމަތްތެރިންގެ ސަބަބުންނެވެ. ނޫނީ އެކުގައި އުޅޭ ބައެއް މީހުންގެ ނުފޫޒުގެ ސަބަބުންނެވެ.
"އުމުރަށް ވުރެ ޅަކޮށް އުޅުނަސް، އީލުއަކީ މުރާދުގެ ބަހާ ދެކޮޅަށް ކަންތައް ކުރާނެ ކުއްޖެއް ނޫން." ބަސްމާ ޔަޤީންކަން ދިނެވެ.
"ބައްޕައަށްވެސް އެނގިލައްވައެއްނު، އަޅުގަނޑަށް ވުރެވެސް އީލު ގާތީ ރެން އާކަން. އެހެންވެ މާގިނައިން ރެން ކައިރިއަށް އެދަނީ. އެހެން ނޫނަސް އަޅުގަނޑުވެސް ގިނަ ވަގުތު މިއުޅެނީ އޮފީހުގަ. އެހެންވެ އީލުވެސް ފޫހިވާނެއެއްނު." އަޔާޝް ވެސް ބުނެލިއެވެ.
"ރެން ރަނގަޅުތަ އަޔާ؟" މުރާދު ސުވާލުކޮށްލިއެވެ. ލޯބިވާ ދަރިފުޅު ދެކިލަން ދާން އޭނަ ނުހަނު ބޭނުމެވެ.
"ލައްބަ. ރަނގަޅު..." އަޔާޝް ބުނެލިއެވެ.
"ބައްޕަ ހިތަށް މިއަރަނީ މާދަމާ ރެން ކައިރިއަށް ގޮސްލަން. މާ ބޮޑަށް ހިތްހަމަނުޖެހިދާނެތީ ދާން ނުކެރެނީ. އޭރުން އަނެއްކާ ފުރައިގެން ގޮސްވެސްފާނެ. ކުރީ ފަހަރުވެސް ބައްޕަ ގޮސް ގެއަށް އަންނަން ވާހަކަ ދެއްކީމަ ރުޅި އައިސްގެން ފުރައިގެން ދިޔައީ..." މާޒީގެ ހަނދާނެއް އައު ކުރަމުން، މުރާދު ފުންނޭވާއެއް ދޫކޮށްލިއެވެ. ޒަހްރާން އެހާ ދުރަށް ފޮނުވާކަށް އޭނަ ބޭނުމެއް ނޫނެވެ. މިހާރު ބޭނުންވަނީ ޒަހްރާން އޭނައާ ވީހާވެސް ގާތުގައި ބަހައްޓާށެވެ. ގެއަށް ނައެއްކަމަކު އެއް ފަސްގަނޑެއްގައި ޒަހްރާން ހުރުމުންވެސް މިވަގުތަށް ކޮންމެވެސް ވަރަކަށް ހިތްހަމަޖެހުން ހިތުގައިވެއެވެ.
"އަޅުގަނޑަށް ހިޔެއް ނުވޭ ރެން އެހާ ހިތްހަމަނުޖެހިފަ ހުރިހެނެއް. ކުރިން ފަހަރަށް ވުރެ މޫޑު ކުޑަކޮށް ރަނގަޅަށް ހުރީ..." އަޔާޝް ބުނެލިއެވެ. ދެބަފައިން ވާހަކަ ދައްކަމުން ދިޔައިރު އެވާހަކަތައް ކަނުލާ އަޑު އަހަން ބަސްމާ އިނެވެ. އޭނަ އެއްޗެއް ނުބުންޏެވެ. ޒަހްރާންގެ ވާހަކަ ދައްކާ ގިނަ ފަހަރުތަކުގައި ބަސްމާއަށް ޚިޔާރުކުރެވެނީ ހިމޭންކަމެވެ. ޒަހްރާން އެގެއިން ދިޔަ ސަބަބަކީ އޭނަ ކަމުގައިވާތީ އަދިވެސް ބަސްމާއަށް އަމިއްލަ ނަފްސު ކުށްވެރިކުރެވެނީއެވެ.
"ބަސްމާ... ކިހިނެއްވީ؟" ވިސްނުމަކަށް ގެއްލުނު ގޮތަށް ބަސްމާ ހިމޭންވިތަން ފެނުމުން، މުރާދު ބަސްމާގެ އަތުގައި މަޑުމަޑުން އަތް ޖައްސައިލިއެވެ. އޭނަ އެ އަތުގައި ހިފައްޓާލަމުން ބާރުކޮށްލިއެވެ.
"ރެންއާ ދޭތެރޭތަ ތި ވިސްނަނީ؟" މުރާދަށް އެކަން އެނގި ހުރެ ސުވާލުކޮށްލިއެވެ.
"ރެން ގެއިން ނުކުމެގެން ދިޔަ ސަބަބަކީ...." ބަސްމާއަށް ބުނެވުނީ އެވަރަށެވެ. މުރާދު އޭނަގެ ވާހަކަ ހުއްޓުވައިފިއެވެ.
"ބަސްމާ... އަހަރެން ބުނަމެއްނު އަމިއްލަ ނަފްސު ކުށްވެރިނުކުރަން." މުރާދު ބުންޏެވެ.
"އެކަމަކު...." ބަސްމާއަށް ބުނެވުނެވެ.
"ދެން އެކަމާ ނުވިސްނާ..." މުރާދު އަނެއްކާވެސް ބުނެލިއެވެ. "އަޔާ ބުންޏެއްނު ހިޔެއްނުވެޔޭ އެހާ އަވަހަށް މިފަހަރު ދާނެހެނެއް. ވެދާނެ އެއްނު އެއީ ހެޔޮ ފާލަކަށްވެސް..."
ބަސްމާ ހިނިތުންވެލަން މަސައްކަތްކުރިއެވެ. ބަސްމާ އަޔާޝްއަށްވެސް ނަޒަރެއް ދިނެވެ، އަޔާޝްވެސް ބޯ ޖަހައިލީ ހުރިހާކަމެއް ރަނގަޅުވާނެޔޭ ބުނުމުގެ ގޮތުންނެވެ.
ކައި ނިންމާލައިގެން އަޔާޝް އެރީ ޓެރެސްއަށެވެ. ފޯނަށް އައިސްފައިވާ މެސެޖު ފެނުމާއެކު ލުއި ހިނިތުންވުމެއް ތުންފަތަށް ވެރިވެގެން ދިޔައެވެ. އޭނަ ގޮސް އެތަނުގައި ހުރި އުނދޯލީގައި އިށީނދެލިއެވެ.
*****
"ކިހާއިރަކު މާދަން ފުރަނީ؟" ރިހާމް ވާހަކަ ދެއްކީ އޭނަގެ ކުރިމަތީގައިހުރި ގޮނޑީގައި އިން ދާނިޔާއާއެވެ. ދެމީހުން ތިބީ ރެސްޓޯރެންޓެއްގެ ތެރޭގައެވެ. ބޭރު ފެންނަ ގޮތަށް ހުރި ބިއްލޫރިގަނޑާ ދިމާލުގައެވެ.
"މާދަން އެއިޓްގަ ފްލައިޓް އިނީ..." ދާނިޔާ ބުނެލިއެވެ. "ރިހާމްއަށް ނެތްތަ ހަމަ ދެވޭކަށް. އަހަރެން ބޭނުންވަނީ މި ދަތުރު އަހަރެމެން ދެމީހުން އެކީ ދާން..."
"ދެން މިފަހަރު ބޭބް ގޮސްލާ... ޓިކެޓްވެސް ނަގައިފީމެއްނު." ރިހާމް ބުނެލިއެވެ.
"ރިހާމް ދަންޏާ ލަސްކޮށްލަފާނަމޭ. ކީއްވެތަ ނުދާން ތިއުޅެނީ؟ އަހަރެން މިދަނީ އަމިއްލަ ދަތުރަކު ނޫނެއްނު. ވެޑިންއަށް ބޭނުންވާ އެއްޗެހި ގަންނާށެއްނު މިދަނީ... ހިނގާބަ ދާން... ޕްލީޒް..." މޭޒުމަތީގައި އޮތް ރިހާމްގެ އަތުގައި ހިފައްޓާލަމުން ދާނިޔާ އާދޭހުގެ ރާގެއްގައި ބުނެލިއެވެ.
"މި ދުވަސްކޮޅު ޗުއްޓީއެއް ނެގޭކަށް ނެތޭ. ވަރަށް ބުރަ ދުވަސްކޮޅެއް. އަހަރެން ބުނީމެއްނު ބައްޕަ ނިއު ޕްރޮޖެކްޓްތަކެއްގެ މަސައްކަތް ފަށައިގެން އުޅޭ ވާހަކަ. އެހެންވެ ހަމަ ދެވެން ނެތީ. މާދަން އެބަޖެހޭ މިހާރު ހަދަމުންދާ ރިސޯޓްގެ މަސައްކަތް ކުރިއަށް ގޮސްފައިވާ ހިސާބު ބަލާލަން ދާންވެސް. މަސައްކަތް ކުރާ މީހުންގެ ފަރުވާކުޑަކަމުން ނިންމަން ބުނި ތާރީޚުވެސް ފަހަނަ އަޅާ ދަނީ މިހާރު...." ރިހާމް ބުނެލިއެވެ. ރިހާމްއަކީ އޭނަގެ ބައްޕަގެ ކުންފުނީގެ ގިނަ މަސައްކަތްތަކެއް ބަލަމުން ދާ ޒުވާނެކެވެ. ރަޝީދުގެ ކޮންސްޓްރަކްޝަން ކުންފުނި އާރބަން ކޮންސްޓްރަކްޝަންގެ ގިނަ ކަންތައްތައްވެސް ރަޝީދުގެ ދަށުން ބަލަހައްޓަމުން ދަނީ ރިހާމްއެވެ.
"އަޅޭ ދެން..." ދާނިޔާ ބުނެލިއެވެ.
"އިނީމަ ހުންނާނީ ހަމަ ދެމީހުން އެކީ ތަންތަނަށް ދެވޭކަށްނު." ރިހާމް ބުނެލިއެވެ. އޭނަ ހިނިތުންވެލިއެވެ. ދާނިޔާ ހިފައްޓާފައި އޮތް އަތްމަތީގައި އޭނަގެ އަނެއް އަތް ޖައްސައިލަމުން ރިހާމް ހިނިތުންވެލިއެވެ.
"އިނގޭތަ؟ އައެމް ސޯ ހެޕީ އަސްލު... ފައިނަލީ އަހަރެންގެ ޑްރީމް ފުލްފިލްވަނީ. ހާދަ ދުވަހެއްވަންދެން އަހަރެން ކުރި އިންތިޒާރެކޭ މީ..." ދާނިޔާ ބުނެލިއެވެ. ރިހާމް އޭނަގެ ހިނިތުންވުން ފުޅާކޮށްލިއެވެ. ދާނިޔާއާއެކު ލޯބީގެ ވަގުތުތައް ހޭދަކުރަމުން ދިޔަ ރިހާމް އައިރާގެ މަތިން ހަނދާން ހުރިހެނެއް ހިޔެއްނުވެއެވެ. އަނބިމީހާއަށް އޮޅުވާލައިގެން އެ ކުރަން އުޅޭ ކަމާ މެދުވެސް އޭނަ ވިސްނަން ބޭނުން ނުވާފަދައެވެ.
*****
އޭގެ ފަހުން ދެ ދުވަސްވީއިރު ވެސް އައިރާއާ ޒަހްރާނާ ދިމައެއް ނުވެއެވެ. އެކަމުން އެންމެ އުނދަގޫވީ ޒަހްރާނަށެވެ. އޭނަ އެޕާރޓްމެންޓުން ނުކުންނަ ކޮންމެ ފަހަރަކުއާއި، އައިސް ވަންނަ ކޮންމެ ފަހަރަކު އައިރާ އުޅޭ އެޕާރޓްމެންޓުގެ ދޮރަށް ބަލައިލައެވެ. އުންމީދުކުރެވެނީ އެންމެ ފަހަރަކުވެސް އައިރާއާ ބައްދަލުވާނެކަމަށެވެ. ވާހަކަ ދައްކާލެވޭނެ ކަމަށެވެ. އައިރާގެ ޙާލު އެނގުމަށް ޒަހްރާން ބޭޤަރާރުވަމުން ދިޔައީ ކީއްވެކަމެއް ޚުދު އޭނައަކަށް ވެސް ނޭނގެއެވެ. އެހިތަށް އެ ވަމުންދާ ގޮތްތަކާ މީހާއަށް އަންނަމުން ދާ ބަދަލުތަކުގެ އަސްލަކީ ކޮބައިކަމެއް ވެސް ނޭނގެއެވެ. ކިތަންމެ ވަރަކަށް އައިރާގެ ޚިޔާލުތައް ސިކުނޑިން ނެރެ އެއްލައިލަން އުޅުނަސް އެކަމެއް ވެސް ނުވެއެވެ. ސިކުނޑި އެހެން ދިމާލަކަށް އަނބުރާލެވޭތޯ އޭނަ އެތަކެއް އަންހެން ކުދިންނަކާވެސް ވާހަކަ ދައްކައިފިއެވެ. އެހެންނަމަވެސް އެ ހުރިހާކަމަކާއެކުވެސް އައިރާގެ ޚިޔާލުތަކެއް އޭނަގެ ސިކުނޑިއަކުން ނެރެ އެއްލައެއް ނުލެވުނެވެ.
ރޭގަނޑެކެވެ. އޭރު ގަޑިން ނުވައެއް ޖަހަނީއެވެ. ބޭރުގައި އުޅެފައި އައިސް ލިފްޓް ލޮބީއަށް ޒަހްރާން ވަތްއިރު، ލިފްޓް ލެއްޕެނީއެވެ. އޭނަ އަވަސް އަވަހަށް ގޮސް ބަޓަނަށް ފިތައިލިއެވެ. ލިފްޓު ހުޅުވުމާއެކު ޒަހްރާން އެތެރެއަށް ވަނެވެ. އެވަގުތު އެތެރޭގައި ހުރީ އައިރާއެވެ. އޭނައަށް ވެސް ޒަހްރާނަށް ބަލައިލެވުނެވެ. އެހެންނަމަވެސް، ދެވަނަ ސިކުންތުގައި އެ ނަޒަރު ވަކިކޮށްލަމުން އިސްޖަހާލައިފިއެވެ. އައިރާ ބޭނުންވީ ލިފްޓުން ނުކުންނާށެވެ. އެހެންނަމަވެސް، އެ ފުރުސަތު ނުލިބުނީ އިތުރު ދެމީހަކު އައިސް ލިފްޓަށް އެރުމުންނެވެ. ލިފްޓް ތިންވަނަ ފަންގިފިލާއަށް މަޑުކޮށްލުމުން އެ ދެމީހުން ފައިބައިފިއެވެ. ޒަހްރާނަށް އިރުއިރުކޮޅުން އައިރާއަށް ބަލައިލެވެއެވެ. އޭނަގެ ހިތަށް ކެތްނުކުރެވުނީ ވަކިވަރެއް ވަންދެނެވެ. އެންމެފަހުން އޭނައަށް ވާހަކަ ދެކެވުނެވެ.
"އައި... އައިރާ... އޯކޭތަ؟" ޒަހްރާން އެހެން ބުނެލީ އައިރާއަށް ބަލައިލަމުންނެވެ. އެހެންނަމަވެސް އިސްޖަހާލައިގެން ހުރި އައިރާ އެއްޗެއް ނުބުންޏެވެ. އަޑު ނީވުނީއޭ ހިތާ ޒަހްރާން ދެވަނަ ފަހަރަށްވެސް ސުވާލު ތަކުރާރުކޮށްލިއެވެ. މިފަހަރުވެސް އައިރާ ޚިޔާރުކުރީ ހިމޭންކަމެވެ. ކުޑަ މިނުން އޭނަ ޒަހްރާނަށް ބަލާވެސް ނުލިއެވެ. ހީވީ ޒަހްރާނާ ކުރިމަތިލާންވުމުން އުނދަގޫވެފައި ހުރިހެންނެވެ.
"އައިރާ.... ހުރިހާކަމެއް އޯކޭތަ؟" ޒަހްރާން އަނެއްކާވެސް ސުވާލުކޮށްލިއެވެ. ތަންކޮޅެއް ބާރަށެވެ. އައިރާއަށް ޒަހްރާންގެ އަޑު ނީވެނީ އެއް ނޫނެވެ. އެހެންނަމަވެސް ޖަވާބު ދޭން އޭނަގެ ނަފްސު އުޒުރުވެރިވަނީއެވެ. އެއްޗެއް ބުނަން ދޫ ހަރަކާތްނުކުރަނީއެވެ. ލަދުވެތިކަން އިޙްސާސްކުރެވެނީއެވެ. ލިފްޓް އައިސް ހަތްފަނަ ފަންގިފިލާއަށް ހުއްޓުމާއެކު، ލަސްނުކޮށް އައިރާ ފައިބައިފިއެވެ. ޒަހްރާންވެސް މެއެވެ. އެހެންނަމަވެސް އޭނައަށް އައިރާއަށް ބަލަހައްޓައިގެން ހުރެވުނީއެވެ. އައިރާ ގޮސް ދޮރު ކައިރީގައި ހުއްޓުނެވެ.
"އީލާފް...." ޒަހްރާން ވާހަކަ ދައްކަން އުޅުނީ އައިރާ މަޑުޖެހިލުމުންނެވެ. އެހެންނަމަވެސް އޭނައަށް އެއްޗެއް ބުނެވުމުގެ ކުރިން އައިރާ ވާހަކަ ދައްކައިފިއެވެ.
(ނުނިމޭ)