ދުނިޔޭގެ އެންމެ ބޮޑު އެއް ކުންފުނީގެ ބާނީ، އުމުރުން 90 އަހަރުގައި މެލޭޝިއާގެ ކާރުޚާނާއަކަށް ކުރެއްވި ޒިޔާރަތުގައި މުޅި ތަނުގެ ސަގާފަތް ބަދަލުކޮށްލެއްވީ އެންމެ ހަރަކާތަކުންނެވެ.
މެލޭޝިއާގައި ހުންނަ ޕެނަސޮނިކްގެ ކާރުޚާނާގެ ތެރޭގައި އޮތީ ހަމަހިމޭންކަމެވެ. އެތަނުގައި މަސައްކަތްކުރާ 700 އެއްހާ މުވައްޒަފުން ތިބީ ނޭވާ ހިފަހައްޓާލައިގެންނެވެ. އެންމެންގެ ލޯތައް ހުއްޓިފައި ހުރީ މައި ދޮރާ ދިމާލަށެވެ. އެމީހުންގެ އިންތިޒާރުގެ ނިމުން ކައިރިވެއްޖެއެވެ. އެތަނަށް ވަޑައިގަންނަވަނީ އާދައިގެ މީހެއް ނޫނެވެ. އެއީ ޖަޕާނުގެ "މެނޭޖްމަންޓްގެ ބާނީ" ގެ ގޮތުގައި މަޝްހޫރުވެފައިވާ، މަޓްސުޝިތާ އިލެކްޓްރިކް (މިހާރުގެ ޕެނަސޮނިކް) ގެ ބާނީ، ކޮނޮސުކޭ މަޓްސުޝިތާއެވެ.
މި ދަތުރަކީ އާދައިގެ ދަތުރެއް ނޫނެވެ. މިއީ އުމުރުން 90 އަހަރުން މައްޗަށް ގޮސްފައިވާ، ގައިބާރު ދެރަވެފައިވާ މުސްކުޅި ބޭފުޅެއްގެ ވަދާޢީ ދަތުރެވެ.
މަޓްސުޝިތާގެ ސިއްޙީ ހާލަތު ހުރިގޮތުން، ދިގު ދަތުރުތައް ކުރެއްވުމަކީ ޑޮކްޓަރުންނާއި އެހީތެރިން އެހާ ތާއީދުކުރެއްވި ކަމެއް ނޫނެވެ. "މަޓްސުޝިތާ ސަން! ތިޔަ ދަތުރު ތިބާގެ ސިއްޙަތަށް ވަރަށް ބުރަވާނެ. ގޭގައި އަރާމުކުރައްވަން މަޑުކުރައްވާ. ކާރުޚާނާތަކުގެ ފޮޓޯތައް އަޅުގަނޑުމެން ގެނެސްދީފާނަން،" އެހީތެރިން އާދޭހާއެކު ދެންނެވިއެވެ.
ނަމަވެސް މަޓްސުޝިތާގެ ޖަވާބު ވަރަށް ސާދާއެވެ. "ނޫނެކެވެ. އަހަރެން ދާން ބޭނުމީ ކާރުޚާނާތައް ދެކޭކަށް ނޫނެވެ. އަހަރެން ދާން ބޭނުމީ އެތަނުގައި މަސައްކަތްކުރާ މުވައްޒަފުންނަށް، ފަހު ފަހަރަށް އަހަރެން ދުށުމުގެ ފުރުސަތު ދިނުމަށެވެ."
އެއީ ލީޑަރެއްގެ ވިސްނުމެވެ. އޭނާއަށް އެނގިވަޑައިގަންނަވާ ގޮތުގައި، މުވައްޒަފުންނަށް އެ މީހުންގެ ބާނީ ފެނުމަކީ ލިބޭނެ އެންމެ ބޮޑު ހިތްވަރެވެ. އެހެންކަމުން، އެންމެ ފަހުން ދަތުރުގެ އިންތިޒާމުތައް ހަމަޖެހިގެން ދިޔައެވެ.
ޖަޕާނުގެ މަސައްކަތުގެ މާހައުލުގައި "5އެސް" (5S) އަކީ ވަރަށް މުހިންމު ފަލްސަފާއެކެވެ. އޭގެ މާނައަކީ ތަން ސާފުކޮށް، ތަރުތީބުކޮށް، އަދި އެ މިންގަނޑު ހިފެހެއްޓުމެވެ. މަޓްސުޝިތާ ވަޑައިގަންނަވާތީ މެލޭޝިއާގެ ކާރުޚާނާ އޮތީ ނުހަނު ބޮޑަށް ޒީނަތްތެރިކޮށްފައެވެ. މުވައްޒަފުން ތިބީ ސާފު ޔުނީފޯމުގައެވެ. ބޯކޮށައި، ތުނބުޅި ބާލައި، ބޫޓުތައް ޕޮލިޝްކޮށްގެންނެވެ. ކާރުޚާނާގެ ބޮޑެތި މެޝިންތަކުގެ ދެމެދުން އަޅާފައިވާ ރަތް ދޫލައިގެ މަތީގައި ހިރަފުހުގެ ޒައްރެއްހާ މިންވަރުވެސް ނެތެވެ.
މަޓްސުޝިތާ ވަޑައިގެން ރަތް ދޫލައިގެ މަތިން ހިންގަވަން ފެއްޓެވިއެވެ. ދެފަރާތުގައި ތިބި މުވައްޒަފުންނަށް ބޯޖަހާލައްވަމުން، ހިނިތުންވެވަޑައިގަންނަވަމުންނެވެ. އޭނާގެ ފަހަތްޕުޅުން އެހީތެރިންނާއި ކާރުޚާނާގެ އިސްވެރިން ހިނގަމުން ދިޔައެވެ.
ކުއްލިއަކަށް މަޓްސުޝިތާ ހުއްޓިވަޑައިގެންނެވިއެވެ. އެންމެންގެ ހިތްތައް ތެޅިގަތެވެ. ކިހިނެއްވީ ހެއްޔެވެ؟
ޢުމުރުން ދުވަސްވެފައިވާ ބާނީ ރަތް ދޫލަ މަތިން ފައިބައިވަޑައިގެން، ބޮޑު މެޝިނަކާ ދިމާލަށް ހިންގަވަން ފެއްޓެވިއެވެ. އެހީތެރިން ހާސްވެގެން "މަޓްސުޝިތާ ސަން! މަޓްސުޝިތާ ސަން!" އޭ ގޮވަމުން، އޭނާ އަނބުރާ ދޫލަ މައްޗަށް ގެންނަން އުޅުނެވެ. ނަމަވެސް އޭނާ މަޑުނުކުރައްވައި ގޮސް މެޝިނާ ދާދި ގާތަށް ހުއްޓިވަޑައިގެންނެވިއެވެ.
ހަތްސަތޭކަ މީހުންގެ ކުރިމަތީގައި، އެ ބަލިކަށި ހަށިކޮޅު ގުދުކުރައްވައި، މެޝިންގެ ދަށުން އެއްޗެއް ނެންގެވިއެވެ. އެއީ ކުޑަކުޑަ ކަރުދާސް ކްލިޕެކެވެ. ޢާންމުކޮށް މިކިޔާ ޕޭޕަރ ކްލިޕެކެވެ. ސާފުކުރި މީހުންނަށް ނުފެނި، މެޝިނުގެ ހިޔަނި އެޅިފައިވާ ތަނަށް ވެއްޓިފައި އޮތް ހަމަ އެންމެ ކްލިޕެކެވެ.
އެއްވެސް އެއްޗެއް ވިދާޅުނުވެ، މަޓްސުޝިތާ އެ ކްލިޕް ޖީބަށް ލެއްވިއެވެ. އަދި އަނބުރާ ރަތް ދޫލަ މައްޗަށް ވަޑައިގެން، ހިނިތުންވުމާއެކު ދަތުރު ކުރިއަށް ގެންދެވިއެވެ. މުޅި ހޯލުތެރެއަށް ވެރިވެފައި އޮތީ ހައިރާންކަމުގެ ހަމަހިމޭންކަމެވެ.
މި ހާދިސާ ހިނގިތާ 10 އަހަރު ފަހުން، އެ މަންޒަރު ދުށް މެނޭޖަރަކު ނޫސްވެރިޔަކަށް މި ވާހަކަ ކިޔައިދެމުން ދިޔައިރު އޭނާގެ ލޯ ވަނީ ފެންކަޅިވެފައެވެ.
"އެ ދުވަހަށްފަހު، އަޅުގަނޑުމެންގެ ކާރުޚާނާއަކީ މުޅި މެލޭޝިއާގައިވެސް އަދި ޕެނަސޮނިކްގެ ދުނިޔޭގެ ވިއުގަގައިވެސް އެންމެ ސާފުތާހިރު އެއް ތަނަށް ވެގެންދިޔަ،" މެނޭޖަރު ކިޔައިދިނެވެ.
ނޫސްވެރިޔާ ސުވާލުކުރިއެވެ. "ކީއްވެ ހެއްޔެވެ؟ ތިޔަބޭފުޅުން ސާފުކުރާ މުވައްޒަފުން އިތުރުކުރީ ހެއްޔެވެ؟ ނުވަތަ އާ މެޝިންތަކެއް ގެނައީ ހެއްޔެވެ؟"
"ނޫނެކެވެ،" މެނޭޖަރު ޖަވާބު ދިނެވެ. "އެ ދުވަހަށްފަހު، ކާރުޚާނާގެ ތެރެއިން ރަނގަޅަށް ސާފުނުވެ އޮންނަ ތަނެއް ނުވަތަ ކަމެއް ފެނިއްޖެނަމަ، އަޅުގަނޑުމެން އެކަކު އަނެކަކަށް ބުނަނީ އެންމެ ބަހެކެވެ. އެއީ 'މަޓްސުޝިތާ ސަން' އެވެ."
އެންމެ ނަމަކުން މުޅި ކުންފުނީގެ ސަގާފަތް ބަދަލުވިއެވެ. އެ ނަމުގެ މާނައަކީ "ސަމާލުކަން ދިނުން" އެކަންޏެއް ނޫނެވެ. އޭގެ މާނައަކީ "އަހަރެމެންނަށް މުހިންމު"، "އަހަރެމެން ފަރުވާތެރިވޭ"، އަދި "ކުޑަކުޑަ ކަމެއްވެސް ދޫކޮށްނުލާނަން" މިއެވެ.
މަޓްސުޝިތާ އެ ދުވަހު ނެންގެވީ ހަމައެކަނި ކަރުދާސް ކްލިޕެއް ނޫނެވެ. އޭނާ ނެންގެވީ މުޅި ކުންފުނީގެ މިންގަނޑެވެ. ލީޑަޝިޕަކީ ބޮޑެތި ތަޤްރީރުތައް ދިނުމެއް ނޫނެވެ. އެއީ އަމަލުން މިސާލު ދެއްކެވުމެވެ. އެންމެ ކަރުދާސް ކްލިޕަކުންވެސް، ދުނިޔެ ބަލައިގަންނަ ފަދަ ބޮޑު ފިލާވަޅެއް ދަސްކޮށްދެވިދާނެކަން މަޓްސުޝިތާ ވަނީ ސާބިތުކޮށްދެއްވާފައެވެ.