މީގެ ގާތްގަނޑަކަށް 15 ވަރަކަށް އަހަރު ކުރިން، 14 މިލިއަން ރުފިޔާއަށް، ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެންބަރު އަދި މަޝްހޫރު ވިޔަފާރިވެރިޔާ އަބްދުﷲ ޖާބިރު ބައްލަވައިގެންނެވި، މ. އަތަމާޕްލާޒާގެ ކޭސް އެންމެ ފަހުން ޖާބިރު ޝަރުއީ މަރުހަލާއިން ކާމިޔާބު ކުރައްވައިފިއެވެ.
މަލީޝާ ހައްޖު ގްރޫޕުގެ ވެރިޔާ ހުޅުމާލެ، އާފީނިވިލާ އިސްމާއީލް އަބްދުއްލަތީފްގެ ނަމުގައި ރަޖިސްޓްރީކޮށްފައިވާ މ. އަތަމާޕްލާޒާ، ޖާބިރު ބައްލަވައިގަތީ 2010 ވަނަ އަހަރުއެވެ. އެކަމަކު، ސިވިލް ކޯޓުގައި އިސްމާއީލް އަބްދުއްލަތީފްގެ މައްޗަށް ސާބިތުވި ދަރަންޏެއްގެ ހުކުމް ތަންފީޒު ކުރުމުގެ މައްސަލައެއްގައި އެ ގެ ވިއްކާލަން އިއުލާންކުރިއެވެ.
އިސްމާއީލް އަބްދުއްލަތީފްގެ ދަރަނި ދެއްކެނީ އެ ގެ ވިއްކާލައިގެން ކަމަށް އޭނާއަށް ދައުވާ ކުރި ފަރާތާއެކު ކޯޓުގައި އެއްބަސްވުމުން ޖާބިރު އޭރު އެ މައްސަލައިގެ ތެރެއަށް ތަދައްހުލްވެ ވަޑައިގަތް ނަމަވެސް، އެ ގެއަކީ އޭނާގެ ގެއެއް ކަމަށް ދަލާލަތު ކުރާ ހެއްކެއް ނެތް ކަމަށް ބުނެ އެ މައްސަލައިން ޖާބިރު އޭރު ބޭރު ކުރިއެވެ.
އެކަމަކު، ޖާބިރު އަނެއްކާވެސް މައްސަލަ ހުށަހެޅީ، އޭނާގެ ހައްގު އެ ގެއަށް އޮތް ކަމަށާއި އެ ނޫން ފަރާތަކަށް އެ ހައްގު އިސް ނުކުރެވޭނެކަން ކަނޑައަޅައިދިނުމަށެވެ. މ. އަތަމާޕްލާޒާ ވިއްކުމުގައި އެގޭގެ ވެރި މީހާ އިސްމާއީލް އަބްދުލްލަތީފް މަކަރާއި ހީލަތް ހަދާފައިވާ މައްސަލަ ބަލައި ދިނުމަށް އެދި ޖާބިރު ފުލުހަށްވެސް އެ މައްސަލަ އޭރު ހުށަހެޅުއްވިއެވެ.
އަތަމާޕްލާޒާ މައްސަލައިގައި ސިވިލް ކޯޓުން އިއްޔެ ކުރި ހުކުމުގައިވަނީ، އަތަމާޕްލާޒާއަކީ ޖާބިރުގެ ތަނެއް ކަމަށް ކަނޑައަޅައިފައެވެ. އަދި ދެ މަސް ދުވަހުގެ ތެރޭގައި އެތަނުގެ ރަޖިސްޓްރީ ޖާބިރުގެ މައްޗަށް ބަދަލުކުރުމުގެ ޝަރުއީކަންކަން ފުރިހަމަ ކުރުމަށް އިސްމާއިލް އަބްދުއްލަތީފްގެ މައްޗަށް ހުކުމްކޮށްފައިވެއެވެ.