ރަމަޟާން މަހަކީ ދުނިޔޭގެ މުސްލިމުން ރޯދަ ހިފުމުގައި ހޭދަކުރާ މާތް މައްސަރެކެވެ.
ރޯދައަށް ހުރުމަށް ހާރުކާ ވަގުތު ކާ ކެއުމަކީ މުޅި ދުވަހު ހަށިގަނޑަށް ހަކަތަ ލިބިދޭނެ މުހިއްމު ކެއުމަކަށް ހެދުމަށް ހާއްސަ ސަމާލުކަމެއް ދިނުމަކީ ވަރަށް މުހިއްމު ކަމެކެވެ.
ހަމަ އެއާއެކު ހާރުގަޑީގައި ކެއުމުގައި ހިމަނާލާ ކެއުންތަކަކީ މީހާ ވަރުބަލިވުމާއި، ފެން މަދުވުމާއި، މެޔަށް ދިލަ ނެގުން ފަދަ ކަންކަމުން ރައްކާތެރިކަން ލިބޭނެ ކެއުންތަކަކަށް ހެދުން ވެސް ވަރަށް މުހިއްމެވެ.
ތުރުކީގެ އިސްތަންބޫލަށް ނިސްބަތްވާ އެސޯސިއޭޓް ޕްރޮފެސަރު ޑރ. ބިއްނޫރު އޯކަން ވިދާޅުވެފައިވާ ގޮތުގައި، ހަށިގަނޑަށް ބޭނުންވާ ހަކަތަ އެއްވަރެއްގައި ހިފެހެއްޓުމަށާއި ފެންމަދުވިޔަ ނުދިނުމަށް ޓަކައި، ކެއުމުގައި ކޮމްޕްލެކްސް ކާބޯހައިޑްރޭޓްސް، ޕްރޮޓީން، ސިއްހަތަށް ފައިދާހުރި ފެޓްސް، ފައިބަރު އަދި ދިޔާ އެއްޗެހި ހިމެނޭ ފުރިހަމަ ކެއުމެއް ބޭނުންކުރުން މުހިންމެވެ.
އެގޮތުން ހާރަށް ކާ ކެއުމުގައި ހިމަނާލުން ރަނގަޅު ބާވަތްތަކުގެތެރޭ، ކޮމްޕްލެކްސް ކާބޯހައިޑްރޭޓްސް ކަމަށްވާ އޯޓްސް، ބްރައުން ރައިސް ނުވަތަ ރަތް ހަނޑޫ، އާޓާ ފުށުން ތައްޔާރުކޮށްފައިވާ ޕާން ނުވަތަ ރޮށި ހިމެނެއެވެ.
މި ތަކެތި ހަޖަމުވުމަށް ގިނަވަގުތު ނަގާތީ، ގިނަވަގުތު ބަނޑުހައިނުވެ ހުރުމަށާއި ހަށިގަނޑަށް ހަކަތަ ލިއްބައިދިނުމަށް އެހީތެރިވެދެއެވެ.
ހާރުކާ ވަގުތު ކެއުމުގައި ހިމަނާލާ ކެއުންތަކަކީ ހަށިގަނޑަށް ހަކަތަ ލިބިދޭ ކެއުންތަކަށް ހެދުން މުހިއްމު--ފޮޓޯ/ގޫގްލް
މީގެއިތުރުން ޕްރޮޓީން ގިނަ ކާނާތައް ކަމަށްވާ، ބިސް، ކަނޑުމަސް، ކުކުޅު، ކިރުގެ ބާވަތްތައް، މުގު އަދި ތޮޅީގެ ބާވަތްތަކަކީ ވެސް ހާރުގަޑީގައި ކެއުމުގައި ހިމަނާލެވިދާނެ މުހިއްމު ބާވަތްތައް ކަމަށް ޑރ. ބިއްނޫރު އޯކަން ވަނީ ލަފާ ދެއްވާފައެވެ.
ހާރުކާ ވަގުތަކީ މާ ބޮޑު ކެއުމަކަށް އިންސާފުނުކުރާ ގަޑިއެއް ކަމުން އެ ވަގުތު ވެސް ކެއުމުގައި މޭވާ އާއި ތަރުކާރީ، ސިއްހަތަށް ފައިދާހުރި ބަދަނުގެ ބާވަތްތައް އަދި ސޫޕް ނުވަތަ ސީރިއަލްގެ ބާވަތެއް ވެސް ހިމަނާލެވިދާނެއެވެ.
ހާރުގަޑީގައި ކެއުމުން ދުރުހެލިވާންޖެހޭ ތަކެތީގެތެރޭ، ތެޔޮ ގިނަ ކާނާ، ހަކުރުގެ މާއްދާ ގިނަ ކެއުންތައް، ލޮނުގެ މާއްދާ ގިނަ ކެއުންތައް އަދި ހަވާދުގެ އިތުރުން ކުޅިކޮށް ތައްޔާރުކޮށްފައި ހުންނަ ކެއުންތައް ހިމެނެއެވެ. ހަމައެއާއެކު ކެފެއިންގެ މާއްދާތައް އެކުލެވޭ ބުއިންތަކުން ދުރުހެލިވުމަށް ވެސް ޑރ. ބިއްނޫރު އޯކަން ވަނީ އިރުޝާދު ދެއްވާފައެވެ.
ހާރު ކެއުމަކީ ހަމައެކަނި ފަތިސްވުމުގެ ކުރިން ބަނޑުފުރާލުމެއް ނޫނެވެ. އެއީ އަޅުކަމާއި ތަގުވާވެރިކަމުގައި ހޭދަކުރާ ދުވަހަށް ހަށިގަނޑު ތައްޔާރުކޮށްދޭ ކެއުމެކެވެ.
ފައިދާހުރި، ހަމަހަމަ ކެއުމެއް އިޚްތިޔާރުކުރުމަކީ ރޯދައަށް ހުންނައިރު ހަކަތަ ދަމަހައްޓައި، ސިއްހަތު ސަލާމަތުން ބެހެއްޓުމަށް އޮތް އެންމެ ރަނގަޅު މަގެވެ. ސިއްހަތަށް ފައިދާހުރި ކާނާ ބޭނުންކުރުމަކީ ރޯދައިގެ އަޅުކަން އަދާކުރުމަށް ފަސޭހަވެ އެކަމަށް މަގުފަހިކޮށްދޭނެ ކަމެކެވެ.