މޯލްޑިވްސް ޗެސް އެސޯސިއޭޝަނުން އިންތިޒާމުކޮށްގެން ބާއްވާ ގައުމީ ރާޒުވާ މުބާރާތުގެ އޯޕަން ޑިވިޝަނުގައި މިފަހަރު އަންހެން ކުޅުންތެރިންނަށް ވެސް ބައިވެރިވެވޭނެ ގޮތަށް ގަވާއިދު ބަދަލުކޮށްފިއެވެ.
މި ބަދަލާއެކު މުބާރާތުގެ އަންހެން ޑިވިޝަނުގައި ވާދަކުރާ ކުޅުންތެރިންނަށް ވެސް އޯޕަން ކެޓަގަރީގައި ވާދަކުރުމުގެ ފުރުސަތު ލިބެއެވެ.
މުބާރާތުގައި ބައިވެރިވުމުގެ ސުންގަޑިއަކަށް ކުރިން ހަމަޖެއްސީ މިދިޔަ މަހުގެ 25 ވަނަ ދުވަހުގެ ރޭގަނޑެވެ. ނަމަވެސް މިހާރު އެ މުއްދަތު ވަނީ އިތުރުކޮށްފައެވެ.
މި މުބާާރާތުގެ ވިމެންސް ކެޓެެގަރީ ފަށާ ތާރީޚަކީ 1 ފެބްރުއަރީ 2026 އެވެ. އަދި އޯޕަން ކެޓަގަރީ ފަށާނީ 10 ފެބްރުއަރީ 2026 ގައެވެ.
މި މުބާރާތް އެންމެ ފުރަތަމަ ބާއްވަން ތާވަލުކުރީ މިދިޔަ އަހަރުގައެވެ. ނަމަވެސް ދިމާވި ގޮންޖެހުންތަކާއެކު މިއަހަރަށް މުބާރާތް ލަސްކުރީއެވެ.
ގައުމީ މުބާރާތުގައި މިފަހަރު އެންމެ ބޮޑަށް ޓާގެޓުކުރާނީ ސެޕްޓެމްބަރު މަހު ބާއްވާ ވޯލްޑް ޗެސް އޮލިމްޕިއާޑަށް ރަނގަޅު ކުޅުންތެރިން ހޮވުން ކަމަށް ޗެސް އެސޯސިއޭޝަން އޮފް މޯލްޑިވްސްއިން މައުލޫމާތުދެއެވެ.