މިދިޔަ ހަފްތާތެރޭގައި ފިލްމުތަކަށް ލަވަކިޔުން ހުއްޓާލިކަން އިއުލާނުކުރި އިންޑިއާގެ މަގުބޫލު ލަވަކިޔުންތެރިޔާ އަރިޖިތު ސިންގް ސިޔާސީ ދާއިރާއަށް ނުކުންނަން ތައްޔާރުވަމުން އަންނަ ކަމަށް އިންޑިއާގެ ނޫސްތަކުން ބުނެފިއެވެ.
މިދިޔަ އަންގާރަ ދުވަހު ފިލްމުތަކަށް ލަވަކިޔުން ހުއްޓާލިކަން އިއުލާނުކުރި ނަމަވެސް އެއީ ކީއްވެގެން ނިންމި ނިންމުމެއް ކަމަށް އަރިޖިތު ބުނެފައެއް ނުވެއެވެ.
އޭގެ ބަދަލުގައި އަރިޖިތު ބުނީ ފިލްމުތަކަށް ލަވަކިޔުން ހުއްޓާލި ނަމަވެސް އަމިއްލައަށް މިއުޒިކް އުފެއްދުމުގެ މަސައްކަތް ކުރާނެ ކަމަށާއި މިހާރު ބޮޑަށް އިސްކަންދެނީ މިނިވަންކަމާ އެކު އިންޑިއަން ކްލެސިކަލް މިއުޒިކް އުފެއްދުމުގަ މަސައްކަތް ކުރާނެ ކަމަށެވެ.
އެތައް މިލިއަން ބަޔަކު މާޔޫސް ކުރުމަށްފަހު އަރިޖިތު ނިންމި ނިންމުމުގެ ފަހަތުގައި ފޮރުވިފައިވާ ހަގީގީ ސިއްރަކީ ސިޔާސީ ދާއިރާއިން ކުރިއަށް ދިއުން ކަމަށް އިންޑިއާގެ ނޫސްތަކުން ބުނެފައިވާއިރު މިކަން އަރިޖިތުގެ ފަރާތުން މިހާތަނަށް ކަށަވަރުކޮށްދީފައެއް ނުވެއެވެ.
އަރިޖިތު އަނބިމީހާ ކޮއެލް ސިންގްއާ އެކު އައިފާ އެވޯޑު ޝޯއެއްގައި--ފޮޓޯ/ބޮލީވުޑްހަންގާމާ
އިންޑިއާގެ ނޫހެއް ކަމަށްވާ އެންޑީޓީވީގެ ރިޕޯޓެއްގައި ބުނެފައިވާ ގޮތުން އަރިޖިތު އަންނަނީ އަމިއްލަ ސިޔާސީ ޕާޓީއެއް އުފެއްދުމާ މެދު ވަރަށް ފުންކޮށް ވިސްނަމުންނެވެ. ލަވަކިޔުމުގެ ދާއިރާއިން ދުރަށް ޖެހިލުމަށް ނިންމި ނިންމުމަކީ ސިޔާސީ މައިދާނަށް ނުކުތުމުގެ މަސައްކަތުގެ ތެރެއިން އަރިޖިތު އެޅި ފުރަތަމަ ފިޔަވަޅު ކަމަށް އެންޑިޓީވީގެ ރިޕޯޓުގައި ވަނީ ބުނެފައެވެ.
އަރިޖިތު ސިޔާސީ ދާއިރާއަށް ނުކުންނަން ނިންމި ނިންމުމަކީ ވަރަށް ސިއްރިއްޔާތުގައި ކުރަމުން އަންނަ ކަމެއް ކަމަށާއި އެކަމާ ގުޅުންހުރި މަޝްވަރާތައް ލަވަކިޔުންތެރިޔާ ސިޔާސީ ދާއިރާގައި މަސައްކަތްކުރާ ބައެއް ފަރާތްތަކާ ގުޅިގެން ކުރިއަށްދާ ކަމަށް ވެސްޓް ބެންގޯލްގެ ފިލްމު އިންޑަސްޓްރީގައި މަސައްކަތްކުރާ މީހަކު އެންޑީޓީވީގައި ވަނީ ބުނެފައެވެ.
މުމްބާއީގެ 'ޕޮޝް' ދިރިއުޅުން ދޫކޮށްލުމަށްފަހު އަމިއްލަ އުފަން ރަށް މުރުޝިދުއާބާދުގެ ޖިއާގަންޖްގައި ވަރަށް އާދައިގެ ދިރިއުޅުމެއް އުޅެމުން އަންނަ މިއުޒީޝަން މި އަހަރުގެ ވެސްޓް ބެންގޯލްގެ މަޖިލިސް އިންތިޚާބުގައި ވާދަނުކުރާނެ ކަމަށް ވެސް މި ރިޕޯޓުގައި ވަނީ ބުނެފައެވެ.
އޭގެ ބަދަލުގައި އަރިޖިތު ނިންމާފައި ވަނީ ކުދި ލޯކަލް އިންތިޚާބުތަކުން ލިބޭ ކާމިޔާބީތަކަށް ފަހު ޤައުމީ ފެންވަރުގެ އިންތިޚާބުތަކުގައި ވާދަކުރުމަށް ކަމަށް ވެސް އެންޑީޓީވީގެ ރިޕޯޓުގައި ބުނެފައިވެއެވެ.
އަރިޖިތު ލަވަކިޔުން ހުއްޓާލިކަން އިއުލާނު ކުރުމާ ގުޅިގެން ގިނަ ބަޔަކަށް ސިހުން ލިބިފައިވާއިރު ބައެއް ރިޕޯޓުތަކުން ބުނެފައިވާ ގޮތުގައި އޭނާ ލަވަކިޔުމުގެ ދާއިރާއަށް އަލްވަދާޢުކީ ފިލްމު ޑައިރެކްޝަނަށް ނުކުތުމަށެވެ. ނަމަވެސް މިއިން އެއްވެސް ކަމަކާ ގުޅޭގޮތުން މިހާތަނަށް އަރިޖިތުގެ ފަރާތުން ވަކި އެއްޗެއް ބުނެފައެއް ނުވެއެވެ.
ވަރަށް ކުޑަ ދުވަސްކޮޅެއްގެތެރޭ އާއްމުންގެ މަގުބޫލުކަން ހޯދި ލަވަކިޔުންތެރިޔާ އަކީ މިވަގުތު ބޮލީވުޑްގެ އެންމެ ޑިމާންޑު އޮތް ލަވަކިޔުންތެރިޔާއެވެ.
އަރިޖިތުގެ ލަވައަކާ ނުލައި ފިލްމެއް ފުރިހަމަނުވާއިރު ފިލްމުތަކަށް ލަވަކިޔުން ހުއްޓާލަން އަރިޖިތު ނިންމުމާ ގުޅިގެން އިންޑަސްޓްރީގެ ވެސް ގިނަ ބަޔަކަށް ވަނީ ސިހުން ލިބިފައެވެ.