އައިފޯން 17 ޕްރޯއަށް އަމާޒުވި ފާޑުކިޔުންތައް ބޮޑު ކާމިޔާބީއަކަށް ބަދަލުވެއްޖެ ކަމަށް ރިޕޯޓްތައް ބުނެފިއެވެ.
އައިފޯން 17 ޕްރޯގެ ރެންޑާތަކާއި ފަރުމާ ފުރަތަމަ ލީކުވުމާއެކު ޓެކްނޮލޮޖީގެ ދާއިރާގައި މަސައްކަތްކުރާ ގިނަ ބައެއްގެ މެދުގައި ބޮޑު ނުރުހުމެއް އުފެދުނެވެ. ގިނަ ބަޔަކު ބުނަމުންދިޔައީ މި ފޯނުގެ ފަރުމާ ހުތުރު ކަމަށާއި، މިއީ ގޫގުލް ޕިކްސެލް ފޯނުތަކުގެ ފަރުމާ އެޕަލްއިން ކޮޕީކުރުން ކަމަށެވެ.
އަދި މި އައު ފަރުމާގެ ސަބަބުން އެޕަލްގެ ބްރޭންޑަށް އޮތް އިތުބާރު ގެއްލި، ފޯނު ފެއިލްވެދާނެ ކަމަށްވެސް ބައެއް މާހިރުން އޭރު ލަފާކުރިއެވެ.
މި ސީރީޒްގެ ތެރެއިން އެންމެ އާދައިގެ މޮޑެލް ކަމަށްވާ އައިފޯން 17 އަކީވެސް މިހާތަނަށް އެޕަލްއިން ނެރުނު އެންމެ މޮޅު ބޭސް މޮޑެލް-- ފޮޓޯ: ފޯންއެރީނާ
ނަމަވެސް، ފޯނު ބާޒާރަށް ނެރުނުތާ ކުޑަދުވަސްކޮޅެއްގެ ތެރޭގައި އައިފޯން 17 ޕްރޯ ވަނީ މުޅި ދުނިޔޭގައި ރެކޯޑް އަދަދަކަށް ވިކި، އެޕަލްއަށް ބޮޑު ކުރިއެރުމެއް ހޯދައިދީފައެވެ. ވަކިން ހާއްސަކޮށް، އެޕަލްއަށް މާކެޓް ހޯދަން އުނދަގޫވެފައި އޮތް ޗައިނާ ފަދަ ގައުމުތަކުގައިވެސް މި ފޯނަށް އޮތް ތަރުހީބު ވަނީ ވަރަށް ބޮޑަށް އިތުރުވެފައެވެ.
މި ބަދަލަކީ މާހިރުން "އެޕަލް އިފެކްޓް" ގެ ގޮތުގައި ސިފަކުރާ ކަމެކެވެ.
"އެޕަލް އިފެކްޓް" އަކީ އެޕަލްއިން ކޮންމެ ބަދަލެއް ގެނައި ނަމަވެސް، ފުރަތަމަ ފާޑުކިޔުންތައް އަމާޒުވެފައި ފަހުން އެކަމަކީ އާންމު ކަމަކަށް ބަދަލުވުމެވެ. މީގެ ކުރިން ހެޑްފޯން ޖެކް އުނިކުރުމާއި ފޯނު ފޮށިން ޗާޖަރު އުނިކުރުމުންވެސް މަލާމާތް ކުރި ނަމަވެސް، ފަހުން އެހެން ކުންފުނިތަކުންވެސް ވަނީ އެކަންކަން ނަކަލުކޮށްފައެވެ.
މި ފަހަރުވެސް އައިފޯން 17 ޕްރޯއަށް ފުރަތަމަ ހަޖޫޖެހި މީހުން ވެސް މިހާރު ބުނަމުންދަނީ މި ފަރުމާ މިހާރު ކަމުދާން ފަށައިފި ކަމަށެވެ.
ފޯނުގެ ފަރުމާއަށް އައި ބަދަލުގެ އިތުރުން، ފަންނީ ގޮތުން ގެނެސްފައިވާ ބަދަލުތަކަކީވެސް މި ކާމިޔާބީގެ މުހިންމު ބައެކެވެ. ފޯނުގެ އެތެރޭގެ ފިނިހޫނުމިން ހިފެހެއްޓުމަށްޓަކައި އަލަށް ތައާރަފްކުރި ވޭޕާ ޗެމްބަރާއި އައު ޗެސިސްގެ ސަބަބުން، ގިނައިރު ފޯނު ބޭނުންކުރިޔަސް ސްޕީޑް ދަށްވުމުގެ މައްސަލަ ވަނީ ހައްލުކޮށްފައެވެ. އަދި ކެމެރާގެ ފެންވަރު ރަނގަޅުވުމާއި، ސްކްރީންގެ އަލިގަދަވުމަކީވެސް ކަސްޓަމަރުން ބަލައިގަތް ކަންކަމެވެ.
މި ސީރީޒްގެ ތެރެއިން އެންމެ އާދައިގެ މޮޑެލް ކަމަށްވާ އައިފޯން 17 އަކީވެސް މިހާތަނަށް އެޕަލްއިން ނެރުނު އެންމެ މޮޅު ބޭސް މޮޑެލްގެ ގޮތުގައި ގިނަ ބަޔަކު ގަބޫލުކުރެއެވެ. ޕްރޯ މޮޑެލްތަކުގައި އެކަނި މީގެ ކުރިން ހުރި 120 ހާޓްޒް ޕްރޯމޯޝަން ޑިސްޕްލޭ މިހާރު ހުރިހާ މޮޑެލްއެއްގައި ހިމެނުމަކީ އާދައިގެ މޮޑެލްގެ ވިޔަފާރި އިންތިހާއަށް އިތުރުވެގެންދިޔަ ސަބަބެކެވެ.
އައިފޯން 17 ސީރީޒްއަށް މިހާބޮޑު ކާމިޔާބެއް ލިބުނީ ފަރުމާއަށް ގެނައި ބޮޑު ބަދަލުން ކަމަށް ގިނަބަޔަކު ބުނޭ --- ފޮޓޯ: ފޯންއެރީނާ
އައިފޯން 17 ޕްރޯއަށް މިހާ ބޮޑު ތަރުހީބެއް ލިބުނު އެންމެ ބޮޑު ސަބަބަކީ، އެތައް އަހަރެއްގެ މެދުކެނޑުމަކަށްފަހު ފޯނުގެ ފަރުމާއަށް ގެނައި ފާހަގަކޮށްލެވޭ ބަދަލެވެ. ގިނަ އަހަރުތަކެއް ވަންދެން އައިފޯނުތަކުގެ ފެންވަރަށް ނުވަތަ ފެންނަ ފެނުމަށް ބޮޑު ބަދަލެއް ނައިސް އޮތުމަށްފަހު، މި އައު ބަދަލަކީ ކަސްޓަމަރުން އިންތިޒާރުކުރަމުންދިޔަ އާ ކަމަކަށް ވެގެންދިޔައެވެ.
ފޯނު ބޭނުންކުރާ މީހުންގެ މެދުގައި މަގުބޫލުކަން ހޯދާފައިވަނީ ހަމައެކަނި ފޯނުގެ ފުރިހަމަކަމަކުން ނޫނެވެ. ފޯނު ނެރުނު ދުވަސްވަރު ސިގްނަލްގެ މައްސަލަތަކެއް ދިމާވި ނަމަވެސް އަދި ފޯނުގެ ބޭރުގައި ފަސޭހައިން ލަކުނުލާ ގޮތަށް އޮތް ނަމަވެސް، އެޕަލްގެ ކަސްޓަމަރުން މިކަންކަމަށް މާ ބޮޑު ސަމާލުކަމެއް ނުދެއެވެ.
މިއިން ހާމަވަނީ އެޕަލް ކުންފުންޏަކީ ކޮންމެ ފަދަ ބަދަލެއް ގެނައި ނަމަވެސް، ކަސްޓަމަރުންގެ ހިތްތައް އަތުލުމުގެ ގާބިލްކަން ލިބިގެންވާ ކުންފުންޏެއް ކަމެވެ.