ތަޢުލީމުގެ އަސާސީ ބިންގާތަކަށް ލޮޅުން ނާރާނޭހެން ކަންކަން ތަރުތީބުކޮށް، ތަޢުލީމީ ސިޔާސަތުތައް ޒަމާނާ ގުޅޭ ގޮތަށް މުރާޖަޢާކޮށް ހަރުދަނާކުރަން މިއަދުގެ ހުކުރު ޚުތުބާގައި ގޮވާލައިފިއެވެ.
މިއަދުގެ ހުކުރު ޚުތުބާ ޚާއްސަކޮށްފައިވަނީ "ވަށައިޖެހޭ ތަޢުލީމުގެ މަތީގައި އުންމަތް ބިނާކުރާށެވެ!"، މި މައުޟޫއުގެ މައްޗަށެވެ.
ހުކުރު ޚުތުބާގައި ބުނީ, މިއީ އަހަރެމެންގެ ލޮބުވެތި ދަރީން، އައު ޢަޒުމަކާއެކު ދިރާސީ އައު އަހަރުގެ ދަތުރު ފެށި ހަފުތާ ކަމަށެވެ. މަދަރުސާގެ ދޮރޯށިތަކުން ދަރިވަރުން ވަންނަ މަންޒަރުން، އުންމީދުތައް އައުކޮށްދޭ ކަމަށާއި، ދަރީންނަކީ މާތްﷲ އަހަރެމެންނާ ހަވާލުކުރައްވާފައިވާ އަގުބޮޑު އަމާނާތެއް ކަމަށް ޚުތުބާގައި ބުންޏެވެ. އަދި, މިއީ އެ ދަރީންގެ މުސްތަޤުބަލު ބިނާކުރުމުގެ އައު ބާބެއްގެ ފެށުން ކަމަށް ޚުތުބާގައި ބުންޏެވެ.
އިސްލާމްދީނުގައި ތަޢުލީމަކީ ހަމައެކަނި ދުންޔަވީ ވަޒީފާއަކަށް ތައްޔާރުވުމެއް ނޫންކަން ފާހަގަކޮށް ޚުތުބާގައި ބުނީ, އެ ތަޢުލީމާއި ތަރުބިޔަތު ވާންޖެހޭނީ އެ ކުދީންގެ ބުއްދިއާއި އަޚުލާޤަށް ފުރިހަމަކަން ގެނެސްދޭ، ޞާލިޙު އިންސާނަކު ބިނާކުރުމަށްޓަކައި ފޯރުކޮށްދެވޭ ވަށައިޖެހޭ ތަޢުލީމަކަށް ކަމަށެވެ.
މުދައްރިސުން، ދަރިވަރުންގެ ބުއްދި ތަރައްޤީކޮށްދޭ ފަދައިން، އެ ކުދީންގެ ހިތްތަކުގައި އީމާންކަމާއި މަތިވެރި އަޚުލާޤުގެ ބިންގާ އަޅައިދޭން ޚުތުބާގައި ވަނީ ގޮވާލައިފައެވެ.
ލޮބުވެތި ދަރިވަރުންނޭވެ! ތިޔައީ ޤައުމާއި އުންމަތުގެ އުންމީދެވެ. މިއަދު ތިޔަ ކުދީން މަދަރުސާއަށް ތިޔަ ދަނީ، މުޅި ޤައުމުގެ މުސްތަޤުބަލު ތިޔަ ކުދީންގެ ކޮނޑުގައި އުފުލައިގެންނެވެ. ތިޔަ ކުދީންނަށް އުގަންނައިދޭ މުދައްރިސުންނަށް އިޙުތިރާމުކުރާށެވެ! މަދަރުސާގެ އުޞޫލުތަކަށް ޙުރުމަތްތެރިކޮށްހިތާށެވެ! ވަގުތާއި މަސައްކަތްތައް ރާވައިލާށެވެ! ބޭނުމެއް ނެތް ކަންކަމުގައި ވަގުތު ހޭދަނުކުރާށެވެ! ހުކުރު ޚުތުބާ
ޚުތުބާގައި ބުނީ، އުނގެނުމުގެ މަގަކީ ދިގު މަގެއް ކަމަށެވެ. އެއީ ބުރަ މަސައްކަތެއް ކަމަށެވެ. އެހެނަސް، އެއީ ސުވަރުގެއަށް މަގު ފަހިކޮށްދޭ، އަޖުރު މަތިވެރި ޖިހާދެއް ކަމުން، ކުރިމަތިވާ ގޮންޖެހުންތަކަށް ކެތްތެރިވެ، އަޒުމާއެކު ކުރިއަށްދާން ޚުތުބާގައި ވަނީ ގޮވާލައިފައެވެ.
މިސްކިތުގައި ބަޔަކު ނަމާދުކޮށް ކީރިތި ޤުރުއާން ކިޔަވަނީ -- ސަން ފޮޓޯ/ މުހައްމަދު މާނިއު
މުދައްރިސުންނަށް އިޝާރާތްކުރައްވައި ޚުތުބާގައި ބުނީ އެބޭފުޅުންނަކީ ޢިލްމު އުނގަންނައިދިނުމުގެ މަތިވެރި ވަޒީފާ ޚިޔާރުކުރައްވައިގެން ތިއްބެވި މުރައްބީން ކަމަށެވެ. އަދި, އެ ބޭފުޅުންނަކީ ޢިލްމާއި މަޢުރިފާގެ ނޫރުން ދަރިވަރުންގެ ހިތްތައް އަލިކޮށް ރޯޝަންކޮށްދޭ ދަންމަރުތަކެއް ކަމަށާއި ކުރިމަގަށްޓަކައި އެ ކުދީން ބިނާކުރާ މޭސްތިރީން ކަމަށް ޚުތުބާގައި ބުންޏެވެ.
ކޮންމެ މާއްދާއެއް ކިޔަވައިދިންކަމުގައި ވިޔަސް އިސްލާމްދީނުގެ އަސްލުތަކާއި، ތަރަހައިގެ ތެރެއަށް ފެއްތުމަކީ ލޮބުވެތި މުދައްރިސުންގެ މަސްއޫލިއްޔަތެއް ކަމަށް ޚުތުބާގައި ބުންޏެވެ. އެއީ, ނުހަނު ބޮޑު އަމާނާތެކެވެ. އެހެންކަމުން އިސްލާމްދީނުގައި ޢިލްމުވެރީންގެ ދަރަޖަ އެތައް ގުނައަކަށް އުފުލިގެންވާ ކަމަށް ޚުތުބާގައި ބުންޏެވެ. ވީމާ، މި މަތިވެރި މަސްއޫލިއްޔަތުގައި ކެތްތެރިވެ، ދަރިވަރުންނަށް ލޯތްބާއި ޢަދުލުވެރިކަމާ އެކު އިރުޝާދުދޭން ޚުތުބާގައި ވަނީ ގޮވާލައިފައެވެ.
އޭރުން ކީރިތި ޤުރްއާނާއި މާތް ރަސޫލާގެ ޙަދީޘްފުޅުތަކުގައިވާ ފަދަ ދަރަޖަ މަތިވެރި ބަޔަކަށް މުދައްރިސުން ވާނޭކަން ކަށަވަރު ކަމަށް ޚުތުބާގައި ބުންޏެވެ. އަދި, ދަރިވަރުންނާއި ބެލެނިވެރީންގެ އިޙުތިރާމާއި ލޯބި ޙައްޤުވެގެންވާ ބަޔަކަށް ވެސް މުދައްރިސުން ވާނޭކަން ކަށަވަރު ކަމަށް ޚުތުބާގައި ބުންޏެވެ.
ބެލެނިވެރީންނަށް އިޝާރާތްކޮށް ޚުތުބާގައި ބުނީ, ދަރީން މަދަރުސާއަށް ފޮނުވުމުން ބެލެނިވެރީންގެ ޒިންމާ އެހިސާބުން ނިމުނީކަމުގައި ނުދެކޭށެވެ. އެ ކުދީންނަށް ބޭނުންވާ ތަކެތި ހޯދައިދޭ ފަދައިން، އެ ކުދީންނަށް ހިތްވަރުދީ އިތުބާރު ވެސް ހޯދައިދޭން ޚުތުބާގައި ގޮވައިލިއެވެ. އަދި, ދަރިވަރުންގެ ޞިއްޙަތާއި، އެ ކުދީންނަށް އަންނަ ޖިސްމާނީ އަދި ނަފުސާނީ ބަދަލުތަކަށް ހޭލުންތެރިކުރުވާ އެންމެ ގާތް އެކުވެރިޔާއަށް ވާން ޚުތުބާގައި އެދުނެވެ. ޢާއިލީ ނުތަނަވަސްކަމާއި މުޖުތަމަޢުން ކުރިމަތިވާ ތުރާތަކުން ދަރީން ދުރުކޮށްދީ، އެ ކުދީން ރައްކާތެރިކޮށްދޭ އައްޑަނައަކަށްވެ، އެ ކުދިންގެ ކާމިޔާބީގައި ބައިވެރިވެ، ތަރުޙީބުދީ، ނާކާމިޔާބީގައި އަތުގައި ހިފައި، އައު ޢަޒުމަކާ އެކު ކުރިއަށްދާން ހިތްވަރުދޭން ޚުތުބާގައި ވަނީ ގޮވާލައިފައެވެ.
ސްކޫލް ދަރިވަރުންތަކެއް -- ފޮޓޯ/ ސީއެޗްއެސްސީ
ކަމާބެހޭ އިދާރާތަކުގެ ވެރީންނަށް އިޝާރާތްކޮށް ޚުތުބާގައި ވަނީ ތަޢުލީމީ ސިޔާސަތުތައް ޒަމާނާ ގުޅޭ ގޮތަށް މުރާޖަޢާކޮށް ހަރުދަނާކުރަން ގޮވާލައިފައެވެ. މަންހަޖުތަކާއި މުޤައްރަރުތައް އިލާހީ މަންހަޖާ އެއް ގޮތަށް، ދުރު ރާސްތާގެ ސާބިތު އަމާޒުތަކެއްގެ މައްޗަށް ބިނާކުރަން އެދި ޚުތުބާގައި ވަނީ ތަޢުލީމުގެ އަސާސީ ބިންގާތަކަށް ލޮޅުން ނާރާނޭހެން ކަންކަން ތަރުތީބުކުރުމަކީ، އަންނާން އޮތް ޖީލުތަކަށްޓަކައި އެ އިދާރާތަކުގެ ކޮނޑުގައި އެޅިފައިވާ ބޮޑު މަސްއޫލިއްޔަތެއް ކަމަށް ހަނދާންކޮށްދީފައެވެ.
ޢިލްމު އުނގެނުމުގެ މައިގަނޑު ބޭނުމަކީ ހަމައެކަނި މަޢުލޫމާތުތަކެއް ދަސްކޮށް، އިމްތިޙާނުތަކަކުން ފާސްވުމެއްނޫނެވެ. އެހެނެއްކަމަކު، އެއީ އިންސާނާގެ ބުއްދިއާއި ޒަމީރު ހޭލައްވައިލާ ދިރުމެކެވެ. ޢިލްމަކީ ޖާހިލުކަމުގެ އަނދިރީން އިންސާނާ ނެރެދީ، ޙައްޤާއި ބާޠިލު ވަކިކޮށްދޭ ނޫރެކެވެ. ޢިލްމުގެ އަސްލު މަޤުޞަދަކީ އިންސާނާގެ ކިބައިގައި މަތިވެރި އަޚުލާޤާއި، މާތް اللهއަށް ބިރުވެތިވުމުގެ ސިފަ އަށަގަންނެވުމާ އެކު، ބިން ހެޔޮ ގޮތުގައި ޢިމާރާތްކޮށް، މުޖުތަމަޢަށް ފައިދާކޮށްދޭނޭ، ޞާލިޙު ބަޔަކު ބިނާކުރުމެވެ. ހުކުރު ޚުތުބާ
އިސްލާމީ ތާރީޚުގެ ރަންޒަމާނުގައި ދުނިޔެ ދުށް ފަދަ، ދީނީ ޢިލްމާއި ދުންޔަވީ ޢިލްމުގެ މާހިރުންނަށް މިއަދު މި އުންމަތް ބޭނުންވާ ކަމަށް ޚުތުބާގައި ބުންޏެވެ.
ޚުތުބާގައި ބުނީ ތަޢުލީމީ ނިޒާމުގެ ތެރެއިން އަހަރެމެން ބިނާކުރާން މި އުންމީދުކުރާ ޖީލަކީ، އިޚުލާޞްތެރި، އަމާނާތްތެރި، ޢަދުލުވެރި، ޢިލްމުވެރި، ޚުލްޤު ހެޔޮ، ޤައުމީ މަޞްލަޙަތު އިސްކުރާ، ޙައްޤަށް ތަބާވާނޭ ޢަދުލުވެރި ޖީލެއް ކަމަށެވެ. މި އަސާސްތަކުގެ މައްޗަށް ބިނާވާ ޖީލަކީ، ދުނިޔެއާއި އާޚިރަތުގެ ބާއްޖަވެރިކަމަށް ގެންދާނެ ޖީލެއްކަން ފާހަގަކޮށް ޚުތުބާގައި ބުނީ އެއީ އެ ޖީލަކާ މެދު މުޖުތަމަޢު އުފާކުރާނެ ޖީލެއް ކަމަށެވެ.