ރާއްޖޭގައި ބޮޑެތި އަދަދުތަކުން ވައްކަންކުރާ މީހުންނަށް ހިމާޔަތްލިބޭ ކަމަށް ވިދާޅުވެ، ރާއްޖޭގެ ޖިނާއީ އަދުލުގެ ނިޒާމު އޮތީ އެއްކޮށް ކޮރަޕްޓުވެފައި ކަމަށް، ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމް މިރޭ ވިދާޅުވެއްޖެއެވެ.
ސިލްސިލާކޮށް ޔާމީންގެ ޕާޓީ ޕީއެންއެފުން ކޮންމެ ހަފުތާއަކު ދެ ފަހަރު ބާއްވަމުން އަންނަ ޖަލްސާތަކުގެ ތެރެއިން މިރޭގެ ޖަލްސާގައި ޔާމީން ވިދާޅުވީ، ރާއްޖޭގެ ކޮންމެ ތަނަކުން ބިންކޮޅެއް، ނުވަތަ ވެލިކޮޅެއް ފެންނަން އޮތިއްޔާ ވައްކަންކުރަނީ ކަމަށާއި، އެއީ މި ގައުމުގެ އަދުގެ ހާލަތު ކަމަށެވެ.
ރާއްޖޭގެ ޖިނާއީ އަދުލުގެ ނިޒާމާ މެދު ކަންބޮޑުވުން ފާޅުކުރައްވައި ޔާމީން ވިދާޅުވީ، ޖިނާއީ އަދުލުގެ ނިޒާމު އޮތް ގޮތުން ލަދުވެތިވެވަޑައިގަންނަވާ ކަމަށެވެ.
"ކޮބައިތޯ އެމްއެމްޕީއާރުސީގެ ގާތްގަނޑަކަށް 400 މިލިއަން ޑޮލަރުގެ ވައްކަން؟ ކޮބައިތޯ އެކަމުގެ ޒިންމާތައް އުފުލާ އަމިއްލައަށް އިއުތިރާފުވެ، ކޯޓުތަކުގައި އެކަމަށް އެއްބަސްވި [ކުރީގެ ނައިބު ރައީސް އަޙްމަދު] އަދީބާއި [އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު ޢަބްދުالله] ޒިޔަތާ؟ އެތިބީ މާފުވެގެން ގޮއްސަ، ހައްގުތައް ވަރަށް ކުރިއަރުވައިފަ އެހެރީ،" ޔާމީން ވިދާޅުވިއެވެ.
ރާއްޖޭގެ ތާރީޚުގައި ހިންގި ޚިޔާނާތްތަކުގެ ތެރެއިން އެންމެ ބޮޑު އެއް ޚިޔާނާތް ކަމަށްވާ އެމްއެމްޕީއާރުސީގެ ޚިޔާނާތުގެ ކުށް ސާބިތުވާ ކަމަށް އަދީބުގެ މައްޗަށް އޭރު ހުކުމްކުރިއިރު، 800 އަހަރުގެ ދިގު ހުކުމެއް އަދީބުގެ މައްޗަށް އަންނާނެ ކަމަށް، ކުރީގެ ޕްރޮސެކިއުޓަރު ޖެނެރަލް ޙުސައިން ޝަމީމް ވިދާޅުވި ކަމަށްވެސް ޔާމީން ވިދާޅުވިއެވެ.
"އެހެންވީމާ މި ތަނުގަ ވައްކަންކުރަންޏާ ކޮންމެވެސް ކޮންމެވެސް ކުޑަކުޑަ އަދަދެއްގެ އެއްޗެއް ނުނަގާތި، އެއީ އެ ހުކުމް ތަންފީޒުކުރާނެ މުއްދަތު ނިމެންދެން، ވައްކަން ކުރަންޏާ ކުރަންވާނީ ބޮޑެތި އަދަދުތަކުން، ތަންފީޒެއް ނުކުރާނެ، ތިން ދުވަހު ޖަލުގަ ހުރެފައި ނުކުންނާނެ އިނގޭތޯ،" ވައްކަމުގެ ބޮޑެތި މައްސަލަތަކުގައި ހައްޔަރުކުރާ މީހުން ކުދި މައްސަލަތަކުގައި ހައްޔަރުކުރާ މީހުންނަށް ވުރެ އަވަހަށް ބައެއް ފަހަރު ދޫކޮށްލާތީ އެކަމަށް އިޝާރާތްކުރައްވައި އެމަނިކުފާނު ވިދާޅުވިއެވެ.
ރާއްޖޭގައި މިހާރު އޮތް ޖިނާއީ އަދުލުގެ ނިޒާމަކީ ކޮރަޕްޝަނުން ފުރިފައިވާ ނިޒާމެއްގެ ގޮތުގައި ސިފަކުރައްވައި ޔާމީން ވިދާޅުވިގޮތުގައި، ބޮޑެތި ވައްކަންކުރާ މީހުންނަށް ހިމާޔަތް ލިބި، އާންމުން އެމީހުންނަށް އިހުތިރާމް ވެސް ކުރެއެވެ.
ޔާމީން ވިދާޅުވީ، ފަނޑިޔާރުން އައްޔަންކުރީ އިތުބާރާއެކު ކަމަށްވީ ނަމަވެސް، މަގާމުތަކުގައި ތިއްބަވައި ފަނޑިޔާރުން ޒިންމާ އަދާ ނުކުރައްވާ ކަމަށެވެ.
ފާހަގަކުރެވޭ ގޮތުގައި ޔާމީން މީގެކުރިން ވަނީ، ޝަރުއީ ހަމަތަކުގެ މަތީން އިންސާފުވެރި ޝަރީއަތަކުން އެ މަނިކުފާނު ޖަލަށް ވެއްދޭނެ އެއްވެސް ގޮތެއް ނޯންނާނެ ކަމަށް ވިދާޅުވެފައެވެ. މީގެ ކުރިން ވެސް ވެރިކަމުގެ ދަހިވެތިކަމުގައި ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގައި އެ މަނިކުފާނާ ދެކޮޅަށް ޝަރީއަތްތަކެއް ކޮށްފިކަމަށާއި ނަމަވެސް ނުކުތް ނަތީޖާ ބެއްލެވުމަށް ޔާމީން އެދިވަޑައިގަތެވެ.
"އިރާދަކުރެއްވިއްޔާ ގާނޫނީ ޝަރުއީ ހަމަތަކުގެ މަތީން އަޅުގަނޑު ގައިގައި އަތެއް ނުލެވޭނެ،" ޔާމީން ވިދާޅުވިއެވެ.