ތެލުގެ ވިޔަފާރީގެ ދާއިރާއިން ގުޅުން ދަމަހައްޓައި، ތަރައްގީކުރުމާ ގުޅޭ ގޮތުން ދިވެހި ސަރުކާރާއި އޮމާން ސަރުކާރުގެ މާލީ ވަޒީރުން މިއަދު މަޝްވަރާކުރައްވައިފިއެވެ.
ފިނޭންސް މިނިސްޓްރީން މިއަދު ބުނީ، މިނިސްޓަރު މޫސާ ޒަމީރު އޮމާނަށް ކުރައްވަމުން ގެންދަވާ ރަސްމީ ދަތުރުފުޅުގައި އެ ގައުމުގެ ފިނޭންސް މިނިސްޓަރު ސުލްޠާން ބިން ސާލިމް އަލް-ޙަބްސީއާ ބައްދަލުކުރައްވައި، ވިޔަފާރިއާއި ހަކަތައާއި އިގުތިޞާދީ ދާއިރާތަކުން ގުޅުން ބަދަހިކުރުމާ ގުޅޭގޮތުން ދެ ބޭފުޅުން މަޝްވަރާކުރައްވާފައިވާ ކަމަށެވެ.
އެގޮތުން، އޮމާނަކީ ރާއްޖެއަށް އެންމެ ގިނައިން ތެޔޮ އެތެރެކުރާ އެއް ގައުމުކަން ފާހަގަކުރައްވައި، އެ ގުޅުން ދެމެހެއްޓުމާއި ތަރައްގީކުރުމުގެ މުހިއްމުކަން ދެ ބޭފުޅުން ފާހަގަކުރެއްވިކަމަށް، ފިނޭންސް މިނިސްޓްރީން ބުންޏެވެ.
މީގެ އިތުރުން ދެ ޤައުމުގެ ދެމެދުގައި އޮންނަ ވިޔަފާރީގެ ގުޅުން ވަރުގަދަކޮށް، އިގުތިޞާދީ އެއްބާރުލުން ފުޅާކުރެވިދާނެ ގޮތްތަކާ ގުޅޭގޮތުން ދެ ވަޒީރުން މަޝްވަރާ ކުރެއްވިކަމަށް ވެސް މިނިސްޓްރީން ބުންޏެވެ.
އެގޮތުން ދެ ގައުމުގެ ދެމެދު ވިޔަފާރީގެ މުއާމަލާތްތައް އިތުރުކުރުމަށާއި، ކަނޑުގެ ވަސީލަތްތަކާއި މަސްވެރިކަމުގެ ސިނާއަތުގައި ހުރި ފުރުސަތުތަކުގެ ބޭނުން އެންމެ އެދެވޭ ގޮތުގައި ހިފުމާ ގުޅޭގޮތުން މަޝްވަރާކުރެއްވި ކަމަށް މިނިސްޓްރީން ބުންޏެވެ. މިނިސްޓްރީން ބުނީ، އޭގެ ތެރޭގައި ކަނޑުދަތުރުފަތުރުގެ ޚިދުމަތްތަކާއި، ވެލިއު ޗެއިން އަދި އެއާ ގުޅުންހުރި ވިޔަފާރީގެ ހަރަކާތްތަކުން ލިބެންހުރި ފުރުސަތުތައް ހިމެނޭ ކަމަށެވެ.
އަދި ރާއްޖޭގައި ކުރިއަށް ގެންދާ ހަކަތައާ ގުޅޭ މަޝްރޫއުތަކުގައި ދެ ގައުމު ގުޅިގެން މަސައްކަތް ކުރެވިދާނެ ދާއިރާތަކާ ބެހޭގޮތުން މި ބައްދަލުވުމުގައި ދެ ބޭފުޅުން މަޝްވަރާކުރެއްވި ކަމަށްވެސް ފިނޭންސް މިނިސްޓްރީން ބުންޏެވެ.