ޔުއެފާ ޗެމްޕިއަންސް ލީގުގައި ކަޒަކިސްތާނުގެ ކައިރަޓް ބަލިކޮށް، މުބާރާތުގައި ސައްތައިން ސައްތަ މޮޅުވުމުގެ ރެކޯޑާއެކު އިނގިރޭސި ކުލަބު އާސެނަލުން ގަދަ ސޯޅަ ބުރަށް ދަތުރުކޮށްފިއެވެ.
އަމިއްލަ ދަނޑުގައި އާސެނަލް ކުޅުނު މި މެޗު ކާމިޔާބުކުރީ 3-2 ގެ ނަތީޖާއަކުންނެވެ. މި މޮޅާއެކު މުބާރާތުގެ ގަދަ 16 ބުރަށް އާސެނަލް ދަތުރުކުރީ ތާވަލުގެ އެއްވަނަ މަގާމާއެކު އެވެ.
އާސެނަލުން ވަނީ މި މެޗުގެ ތިންވަނަ މިނެޓުގައި ލީޑު ނަގާފައެވެެ. މިއީ ވިކްޓަ ޔޮކެރޭޝް ކާމިޔާބުކޮށްފައިވާ ލަނޑެކެވެ. މި ލަނޑު ޖެހިތާ ހަތަރު މިނެޓުފަހުން ކައިރަޓްއަށް ލިބުނު ޕެނަލްޓީއަކުން ގެބްރިއަލް ޖޮޖީނިއޯ ވަނީ ލަނޑެއްޖަހާ މެޗުގެ ނަތީޖާ ހަމަހަމަކޮށްފައެވެ.
ދެވަނަ ފަހަރަށް އާސެނަލުން ލީޑު ނެގީ މެޗުގެ 15 ވަނަ މިނެޓުގައެވެ. މިއީ ކައި ހަވާޓްޒް ކާމިޔާބުކުރި ލަނޑެކެވެ. ފުރަތަމަ ހާފުގެ ކުޅުން ނިމުމުގެ ކުރިން ގެބްރިއެލް މާޓިނެލީ ވަނީ އިތުރު ލަނޑެއް އާސެނަލަށް ކާމިޔާބުކޮށްދީ ފަރަގު ބޮޑުކޮށްފައެވެ.
އޭގެފަހުން ކައިރަޓް ވަނީ ލަނޑުޖަހަން ފުރުސަތުތައް ފަހިކޮށްފައެވެ. ނަމަވެސް ނިންމާނުލެވި ދިޔަ ދަނޑިވަޅުތަކުގެ ފައިދާ ނަގާ، ގެބްރިއަލް ޖިސުސް ވަނީ ލަނޑެއް ޖަހާފައެވެ. ނަމަވެސް ވީޑިއޯ އެސިސްޓަންޓް ރެފްރީ ނިންމީ އެއީ ލަނޑެއް ނޫން ކަމުގައެވެ.
މި މެޗުގައި ކައިރަޓް އިން ޖެހި ދެވަަނަ ލަނޑު އެ ޓީމުން ކާމިޔާބުކޮށްފައިވަނީ މެޗުގެ އިތުރު ވަގުތުގައި ރިކާޑިނިއޯއެވެ.