ސެމްސަންގް އެސް26 ސީރީޒްގައި ސެޓެލައިޓް ކަނެކްޓިވިޓީ ހިމަނައިފި

ސެމްސަންގް އެސް26 ސީރީޒްގައި ސެޓެލައިޓް ކަނެކްޓިވިޓީ ހިމަނައިފިއެވެ.

ސެމްސަންގުން އަންނަ މަހު ނެރުމަށް ތައްޔާރުވަމުންދާ "ގެލެކްސީ އެސް26" ސީރީޒްގެ ތިން ފޯނެއް އެމެރިކާގެ އެފްސީސީ ޑޭޓާބޭސްގައި ލިސްޓުކޮށް، އެ ފޯނުތަކުގެ ބައެއް މުހިންމު ފީޗާތައް މިހާރުވަނީ ހާމަކޮށްފައެވެ.

އެފްސީސީގެ ލިސްޓިންގައިވާ ގޮތުން ގެލެކްސީ އެސް26، އެސް26+ އަދި އެސް26 އަލްޓްރާގައި ސެޓެލައިޓް މެދުވެރިކޮށް މުއާމަލާތް ކުރެވޭ "ނޮން-ޓެރެސްޓްރިއަލް ނެޓްވޯކް" (އެންޓީއެން) ސަޕޯޓް ހިމެނޭނެއެވެ. މީގެ ސަބަބުން މޯބައިލް ސިގްނަލް ނުލިބޭ ސަރަހައްދުތަކުގައި ވެސް ސެޓެލައިޓް މެދުވެރިކޮށް ކޯލް ކުރުމާއި މެސެޖު ކުރުމުގެ ފުރުސަތު ބޭނުންކުރާ ފަރާތްތަކަށް ލިބިގެންދާނެއެވެ.

މި ފޯނުތަކުގެ ޕްރޮސެސާއަށް ބަލާއިރު، ތިން މޮޑެލްގައިވެސް ބޭނުންކުރާނީ ކުއަލްކޮމްގެ އެންމެ ފަހުގެ "ސްނެޕްޑްރެގަން 8 އެލީޓް ޖެން 5 ފޯ ގެލެކްސީ" ޗިޕްސެޓެވެ.

މީގެ އިތުރުން ވައިފައި 7، ބްލޫޓޫތު އެލްއީ އަދި އަލްޓްރާ-ވައިޑްބޭންޑް (ޔޫޑަބްލިއުބީ) ފަދަ ޒަމާނީ ކަނެކްޓިވިޓީ ވަސީލަތްތައް މި ފޯނުތަކުގައި ހިމެނޭނެކަން ވަނީ ކަށަވަރުވެފައެވެ.

އެސް 26ގެ އަލްޓްރާ މޮޑެލް ހަ ކުލައަކުން ލިބެން ހުންނާނެ ކަމަށް ރިޕޯޓުތައް ބުނޭ ---

ފޯނުތަކުގެ ސްކްރީނަށް ބަލާއިރު، ގެލެކްސީ އެސް26 އަލްޓްރާގައި 6.9 އިންޗީގެ ބޮޑު ސްކްރީނެއް ހުންނައިރު، އެސް26+ މޮޑެލްގައި ހުންނާނީ 6.7 އިންޗީގެ ސްކްރީނެކެވެ. އަދި މި ސީރީޒްގެ އެންމެ އާދައިގެ މޮޑެލްގައި ހުންނާނީ 6.3 އިންޗީގެ ސްކްރީނެއް ކަމަށް މައުލޫމާތު ލިބެއެވެ.

މި ފޯނުތަކުގެ ބޭރުގައި އެކްސެސަރީޒް ހަރުކުރުމަށް ފަސޭހަވާނެހެން ބިލްޓް-އިން މެގްނެޓް ހުންނާނެ ކަމަށާއި، އަލްޓްރާ މޮޑެލް ހަ ކުލައަކުން ލިބެން ހުންނާނެ ކަމަށްވެސް ރިޕޯޓުތައް ބުނެއެވެ.

ސެމްސަންގުން މި ފޯނުތައް ރަސްމީކޮށް ދައްކާލުމަށް ހަމަޖެހިފައިވަނީ ފެބްރުއަރީ 25 ގައި ބާއްވާ "ގެލެކްސީ އަންޕެކްޑް" އިވެންޓުގައެވެ. އަދި އަންނަ މާޗު މަހުގެ ތެރޭގައި މި ފޯނުތައް ބާޒާރަށް ނެރޭނެ ކަމަށް ލަފާކުރެވެއެވެ.