ޗެޓްޖީޕީޓީގެ އެންމެ ފަހުގެ މޮޑެލްތަކުން ލިޔުންތެރިކަމުގެ ފެންވަރު ދަށްވެފައިވާ ކަމަށް އޯޕަންއޭއައިގެ ސީއީއޯ ސޭމް އޯލްޓްމަން އެއްބަސްވެއްޖެއެވެ.
އެ ކުންފުނިން ބޭއްވި ފުރަތަމަ "ޓައުން ހޯލް" ބައްދަލުވުމުގައި ވާހަކަދައްކަވަމުން އޯލްޓްމަން ވިދާޅުވީ، މިކަން މިހެން ދިމާވީ އައު މޮޑެލްތައް ތަމްރީނުކުރުމުގައި ހިސާބު އިލްމާއި، ކޯޑިން އަދި ކަންކަން ދެނެގަތުމުގެ (ރީޒަނިން) ގާބިލުކަން އިތުރުކުރުމަށް މާބޮޑަށް އިސްކަންދިނުމުގެ ސަބަބުން ކަމަށެވެ.
މި ބައްދަލުވުމުގައި ހާމަކުރި ގޮތުގައި، އެންމެ ފަހުން ނެރުނު ޖީޕީޓީ-5.2 މޮޑެލްގެ ކޯޑިން އާއި އިންޖީނިއަރިންގެ މަސައްކަތްތަކުގެ ފެންވަރު ވަރަށް ބޮޑަށް ރަނގަޅުވި ނަމަވެސް، އޭގެ ކުރީގެ ޖީޕީޓީ-4.5 އާ އަޅާބަލާއިރު އާންމު ލިޔުންތެރިކަން ވަނީ ދަށްވެފައެވެ.
"އަހަރެމެންނަށް އެކަން ކުރެވުނީ ރަނގަޅަކަށް ނޫން،" އޯލްޓްމަން ވިދާޅުވިއެވެ.
އޭނާ ފާހަގަކުރެއްވި ގޮތުގައި ކުންފުނީގެ ވަސީލަތްތައް ހުރި ގޮތުން، ވަކި ކަންތައްތަކަކަށް މާބޮޑަށް ސަމާލުކަން ދެވުމުން ބައެއް ފަހަރު އެހެން ބައިތަކަށް އިހުމާލުވެވޭ ގޮތް ދިމާވެއެވެ.
އޯޕަންއޭއައިއިން މި ބަދަލު ގެނައީ ވިޔަފާރީގެ ގޮތުން ބަލައި ބޮޑެތި ކުންފުނިތަކަށް ބޭނުންވާ ކޯޑިން ފަދަ ހުނަރުތަކަށް މާކެޓުގައި އޮތް ޑިމާންޑް ބޮޑުވުމުންނެވެ. ނަމަވެސް، މިއީ ވަގުތީ ކަމެއް ކަމަށާއި ކުރިއަށް އޮތް މޮޑެލްތަކުގައި ލިޔުންތެރިކަމުގެ ފެންވަރު އަލުން ރަނގަޅުކޮށް، ޖީޕީޓީ-4.5 އަށްވުރެ ފުރިހަމަކުރާނެ ކަމަށް އޯލްޓްމަން ވައުދުވެވަޑައިގަތެވެ.
މީގެ އިތުރުން، އޭއައިގެ ސަބަބުން އިންޖީނިއަރުންގެ މަސައްކަތަށް އަންނާނެ ބަދަލުތަކާ ގުޅޭގޮތުން ވާހަކަދައްކަވަމުން އޯލްޓްމަން ވިދާޅުވީ، ކުރިއަށް އޮތް ތަނުގައި އިންޖީނިއަރުން ކޯޑު ލިޔުމަށް ހޭދަކުރާ ވަގުތަށްވުރެ، އޭއައި މެދުވެރިކޮށް ބޭނުންވާ ނަތީޖާ ހާސިލުކުރުމަށް ކުރާ މަސައްކަތް އިތުރުވާނެ ކަމަށެވެ. މީގެ ސަބަބުން ވަޒީފާގެ ބާވަތަށް ބަދަލުތަކެއް އައި ނަމަވެސް، އޭއައިގެ އެހީގައި އައު ފުރުސަތުތައް އުފެދޭނެ ކަމަށް އޭނާ ލަފާކުރެއްވިއެވެ.
އޯޕަންއޭއައި އަކީ އާޓިފިޝަލް އިންޓެލިޖެންސްގެ ދާއިރާގައި ދުނިޔޭގައި އެންމެ ނުފޫޒުގަދަ އެއް ކުންފުންޏެވެ. 2022 ވަނަ އަހަރު ޗެޓްޖީޕީޓީ ތައާރަފުކުރުމާއެކު، އާންމު ދިރިއުޅުމުގެ އެކި މަސައްކަތްތަކުގައި އޭއައި ބޭނުންކުރާ މިންވަރު ވަނީ ވަރަށް ބޮޑަށް އިތުރުވެފައެވެ.
އޯޕަންއޭއައި އިން އެންމެ ފުރަތަމަ ނެރުނު ޖީޕީޓީ-3.5 އާއި އޭގެ ފަހުން ނެރުނު ޖީޕީޓީ-4 އަކީ ވެސް އޭގެ ލިޔުންތެރިކަމުގެ ފުރިހަމަކަމުގެ ސަބަބުން ގިނަ ބައެއްގެ މަގުބޫލުކަން ހޯދި މޮޑެލްތަކެކެވެ. ނަމަވެސް، ފަހަކަށް އައިސް ޗެޓްޖީޕީޓީގެ ޖަވާބުތައް "ފަރުވާކުޑަވެ"، ކުރީގެ މޮޑެލްތަކާ ގާތްކުރާ ފެންވަރަކަށް ލިޔުންތެރިކަން ނުހުންނަ ކަމުގެ ޝަކުވާ ބޭނުންކުރާ ފަރާތްތަކުން ދިޔައީ ކުރަމުންނެވެ.
އޯޕަންއޭއައި އިން މިހާރު މިވަނީ އެ ޝަކުވާތަކަށް ބާރުދޭ ފަދަ މައުލޫމާތުތަކެއް ފުރަތަމަ ފަހަރަށް ރަސްމީކޮށް ހާމަކޮށްފައެވެ.